حظر نقل الاعضاء بين المسلم و المسيحي !؟
في حقيقة الأمر ليس لدي أي تعليق علي هذا الخبر
و لكن وردت الفقرات التالية في عدة جرائد و مواقع انترنت
ونفى نقيب الأطباء الدكتور حمدي السيد بشدة اي أبعاد طائفية أو دينية للقرار.
وسأل: إذا كان بعض الأقباط استاء من القرار فلماذا لم يستاء المسلمون أيضا؟
وسأل: إذا كان بعض الأقباط استاء من القرار فلماذا لم يستاء المسلمون أيضا؟
انا عن نفسي اعرف عدد لا يقل عن مئة مسلم مستاء من هذا القرار
وقال السيد لصحيفة الحياة: قررنا حظر نقل الأعضاء بين مختلفي الديانة والجنسية في محاولة منا لوقف تجارة الأعضاء التي انتشرت في الفترة الأخيرة فليس من المعقول أن يتبرع قبطي لمسلم ولا العكس
ليس من المعقول
مش معقول
مش معقول ليه يا سيادة النقيب !؟
posted by karakib at 1:33 م
27 comments:
و الله ما عارف اقولك ايه يا هاني
بس هو لو حرام نقل الاعضاء في راي المتشددين المسلمين فهو حرام نهائيا للمسلم و المسيحي و البوذي
انما الكلام اللي بيتقال ده
يبقى على راي دبور
ايه سيفن ايه
مش معقول؟ انهي عقل اللي قال انه مش معقول؟ حاجة تفقع. اللي مش معقول بجد ان الوضع يتحسن في ظل جلوس امثال حمدي السيد على كراس النقابات وغيرها
ولقد ثبت علميا ان دم المسلم يختلف اختلاف كلي وجزئي عن دم المسيحي
فدم المسيحي يجري فيه كرات حمراء وبيضاء وصلبان كمان وبالتالي لا يجوز ان ينقل لجسد مسلم والا يكون قد ارتد
ههههههههههههه
تحياتي
مش لاقى حاجة اقولها غير حتة من مسرحية مدرسة المشاغبين ..." ايه هو اللى مش معقول ؟؟" قول لخرب بيتك قول
أهو ده بقي الخبر المستفز مش اللي فات
يعني روح إنسان تتوقف علي خانه البطاقة؟؟
وعلي اعتبار أيه؟؟ أن واحد في الجنه وواحد في النار ؟؟ وأن اللي هيدخل الجنه مينفعش يأخد حته كانت المفروض تروح النار؟؟
سواء ثبت الخبر أو تم نفيه الناس دي فاضيه قوي كده ... مافيش مشاكل محتاجه يقعدوا يحلوها؟؟
طيب ما يللا علي رأي سمير لما واحد يروح يتبرع بالدم يكتبوا علي الكيس الديانه كمان
أنا مؤدبه ومش بأشتم قدام الناس بأشتم في سري
ما احنا بنروح الصين ندفع ملايين في كبد وقلب وفشه ... ساعتها حد بيسأل دين اللي جابوه أيه؟؟
بص يا هاني طول ما الدنيا ماشيه كده هنفضل نرجع لغايه ما نتلاشي... وحقيقي بأحس أن مش باين لنا أي أمل
بجد اتنرفزت
ثم نقل أعضاء أيه اللي حرام ؟؟ ياريت يكون هنا قانون للتبرع بالأعضاء في حاله الموت الفجأة والحوادث .. كان الواحد عمل حاجه مفيده بعد ما يموت بدل ماهو عايش وحاسس أنه مش عارف يعمل حاجه
تاني بجد اتنرفزت
معقول تكون وصلت للدرجة دي
ربنا يستر علينا
طبعا المسلمين مش مستائين
ماهو اي حد يعترض على كلام الحاكومة يبقى خرج عن دين الاسلام يافندم
ما تفهموها بقى لازم نفهمكوا كل حاجة كده بنفسنا
صديقى هانى
سيادة النقيب بيتكلم على الاغلبية اللى يعرفها ... مش ال 100 مسلم اللى انت تعرفهم
اقولك على حاجه ... اغلب المسلمين يرفض بشكل قاطع نقل اعضاؤه الى مسيحين ... والعكس قد يكون صحيح
والموضوع برمته مش جديد
المصريين - فى الغالب - بيفكروا بشكل طائفى ... ودا يمكن لان ماعندهمش بدائل وطنية او حتى انسانية ودى حقيقة مرة لكنها على اى الاحوال حقيقة
حالة التقسيم الدائم والمستمر مش فى صالح الوحدة الوطنية ابدا
فاكر الاستبيان ؟؟
وفاكر انا قلتلك ايه ؟؟
مش لازم نضحك على بعض ونقول ان المسلمين زعلانين ومستائين... لا بالعكس الاغلبيه فى الشارع شايفه ان القرار دا صح
وطبعا كلام السيد النقيب بيناقد نفسه و بيدارى طائفية مقيته .. الا انها تعبر عن طائفية الشارع المصرى بوضوح
عزيزى هانى
اذا كنت تعرف مائة مسلم معترض .. فارجو ان تجعلهم مائة وواحد
لااجد شيئا اعتذر به
يمكن يكون بيفكر ان لو دوكه داخل الجنة و دكهومة داخل النار يبقى مينفعش يدخل بكلية دكهة اللي داخل الجنة
اكمن يعني حنحاسب الناس قبل ما ينقلوا اعضاءهم
لو طلعوا داخلين النار سوا يبقى ينفع نقل اعضاءهم لبعض و لو كل واحد رايح حتة يبقى مينفعش
كده يبقوا مية و اتنين
اوروفوار
حعلق وأقول إيه بس
رحمتك يا رب
تحياتي
الي يجننك ان الكلام دة يطلع من نقيب الاطباء يعن يعقلية النفترض انها واعية و المفترض انها فاهمة ابعاد التصريحات الي بتطلع منها
بس الي معلق معايا في التصريح كلمة " مش معقول"!..دة حتي مش قادر يتصورها في خياله!
دى عالم فاضية يابا
سطحية ما بعدها سطحية يعنى
طب و على كده بقى طالما نقل الاعضاء ماينفعش يبين المسلم و القبطى و كده يعنى
نمشيها ميرى بقى
يبقى اللى يتبرع بالدم بعد كده يقول فصيلة دمه و ديانته
عشان يبقى فى اكياس دم مسلمين و اكياس دم مسيحين و اكياس دم بهائيين و تبقى حاجة فل يعنى
لا حول و لا قوة الا بالله
بقى فى الوقت اللى بيسعى فيه البعض اننا نشيل خانة الديانة من البطاقة
يطلع لنا الخبر ده
عالم فاضية فاضية يعنى
leh !!! w yrg3 ye2olo w7da watnya w btfr2o ben el moslem w el mese7y !!! y3ni eh da 7al l ta2lel tegaret el a3da2... meeen el 2al el kalam da :S ouf
المشكلة ان هناك البعض اللي بيحاولوا يبرروا قرار النقيب و التفسير ان دي محاولة لمنع نقل الاعضاء و الاتجار بيها
قال يعني لما القرار حيصدر بالشكل ده حيحد فعلا
او انه المشكلة انه كان بيتم سرقة اعضاء المسيحين و نقلها للمسلمين بطريقة بمالغ فيها فقالوا نوقف الموضوع شوية
لو القرار فعلا كان للحد من تجارة الاعضاء كان حيتلاقي الف صيغة و صيغة ليه عشان تحد من الاتجار من غير المساس باي ديانة او اهانة لاي معتقد
بس تقول ايه في قصر النظر و سواد القلب؟؟؟
و لسه حندور على مبررات
بلا شك إن القرار غريب وتفسير إصداره هو الأغرب بكثير .. وهو بالفعل ينمي الطائفية من غير لف ولا دوران ولا تجميل للحقائقن .. بلاش كده .. تخيل إني عايش ف أمريكا مثلا وإحتجت في يوم لنقل دم أو عضو من الأعضاء .. هل هتفرق ديانة المتبرع في الحالة دي؟ هنا بقى يبان إن فعلا قراراتنا غريبة وغير منطقية
حين تصرب الطائفية جسد الوطن من الوريد الى الوريد
فإنها تشمل كل الفئات
ولا تستثني الأطباء
مش عارفه ليه لما قرأت كلمة " مش معقول" الظريفه دي، حضرتني كلمة اللمبي: Absolutely :))))
و الله العظيم دي حاجه تفطس من الضحك...
طب أنا شايل معايا كارت بأتبرع بيه بأى عضو صالح فى حالة وفاتى وبدون الرجوع ﻷفراد أسرتى حتى..والكلام ده مسجل أيضا فى رخصه القياده وبطاقه التأمين الصحى..الكلام ده هنا ف كندا..فهل بكدا أنا خرجت من الدين..؟؟ حد والنبى ينوبكوا ثواب يفتى ليا..؟؟ﻷنه ف اﻷغلب اﻷعم المستفيد من هذا التبرع لن يكون مسلم..أذا أخذنا بنسبه المسلمين لعدد السكان..وأحتمال حتى يكون يهودى..!!كدا أنا خنت القضيه كمان..يالهوى يالهوى..بأقولك أيه ياهانى..!! طنش وكبر ومياميسا..تحياتى ومودتى..خالد
انا مش فاهم بجد الناس دي انسانيتها اضمحلت للدرجة دي ازاي
انا مندهش من الناس اللي شايفة ان اندهاشي من القرار ده مش بديهي
الواحد حاسس انه مش موجود على الارض مثلا وللا ايه
يعني انا اتكلمت مع ناس مش حاسين باي غضاضة في القرار
ايام وسخة
اخي هاني
بعيدا عن الموضوع و احتفاء ببركة هذه الايام جعلها الله مليئة بالخير لنا جميعا
كل عام و مصر بخير بمناسبة شهر رمضان الكريم
رمضان كريم اعاده الله علينا جميعا بالخير و اليمن و البركات
ليك فانوس عندي تعالى خده بسرعة يالا
karakib
اسف يا جماعة لعدم قدرتي علي الرد علي كل التعليقات
شكرا لكل من اعطي اهمية للتدوينة بتعليقة عليها
عين الحسود فيها عود يا نقاوة.. نقيب "مهلبية" ونقابته حلاوة..
بالمناسبة.. إلى الـ(#%$#%#$) الذي يطالبوننا بتطبيق كل ما يطبق في السعودية وإيران.. ما الذي ضمن لنا أن عمليات نقل الأعضاء التي تقوم في هاتين الدولتين تجري بين أشخاص من نفس الديانة ، وليست من بوذي إلى مسلم أو العكس؟
بالرغم انى اعرف الدكتور حمدي السيد شخصيا الا ننى تعجبت عندما قرأت الخبر والحقيقه انى لم اسأله عنه وشهاده حق انا لم اري فى الرجل قبل هذا اي شبه طائفيه لكن فى النهايه الموضوع فى مضمونه محض تخلف
أنا كمان اتعجبت جدا من الهبل ده، ايه يعني ديانته وللا جنسيته؟ بعدين س هو المحروس ده بكده بيحارب تجارة الاعضاء؟
دي مش طريقة أبدا !!
معلش يا هاني, دي عالم متخلفة..
اااه تاني مرة اقولها بعد ما قلبت في مدونتك ولقيت ان الخبر المضحك المبكى ده له علاقة بموضوع كلنا ليلى شوف المسيحي في البلد ده مقهور مع انها بلدهم اساسا وسيبك من كل التعليقات اللي هاتصرخ في المدونة وتقول لالالالالالالالالالالالا ازاى ما احنا اهه مع المسيحيين لا انتم كام في مجتمع كام عدده انا ضحكت بهستيريا لما اكتشفت ديانك عارف ليه لان معظم اصحابي في طفولتى مسيحييين(اكرة التصنيف مسلم /مسيحي) لانه تخلف بس مضطرة المهم وكمان اتربيت معاهم ودلوقتي بعدنا عن بعض وما ليش غير زميلة كانت معي في عملي السابق وتصدق انا مسلمة باعانى ليه؟ لانى متهمة بالصداقات دى ومش هادخل في تفاصيل يكفي اني لما باقول ليهم كل سنة وانتم بخير في اعيادهم ويكون جنبي اي حد مسلم بينهرني ويقول لي على فكرة دة حرام على فكرةزمان ماكانش الكلام ده بيتقال بس بعد فتاوى الفضائيات تربية السعودية انتشر الكلام ده ومش عايز النقيب يكون حذر البلد دى كلها مقهورة ارجع للتاريخ لكن مش هاسود الدنيا لسه في ناس وعقول محترمة المطلوب تعافربس يمكن خايفين ان العضو لما يتنقل تتغير الديانة وتحدث فتنه والله جايز ربنا يشفي
إرسال تعليق
<< Home