الجمعة، مايو 23، 2008

مدرستي المحترمة ... مجلس الشعب ... دينا الراقصة

هكذا قال موشي ديان عندما نشر خططه وعاتبوه "أن العرب لا يقرأون وإذا قرأوا لا يفهمون وإذا فهموا سرعان ما ينسون" بالطبع هذة المقولة الشهيرة يمكن تطبيقها بسهولة علي رواية عمارة يعقوبيان
لكن عندما نبدأ في تطبيقها علي الفيلم ايضا نضيف عليها ... المصريون لا يشاهدون ... و اذا شاهدوا لا يفهمون .. و اذا فهموا فسرعان ما ينسون
لا انسي المشهد الذي نظر فيه خالد صالح "كمال الفولي" الي نور الشريف "الحاج عزام" و قال له بعد أن نجح بالرشوة في الانتخابات .. عجبني اوي استجوابات الفيديو كليب و الرقص اللي اتكلمت عنهم
لا يخفي علي احد انه تمت مهاجمة هذة الرواية و هذا الفيلم لفضحهما و تعريتهما تماما للواقع
قرأت مؤخرا خبر عن استجواب ل23 نائب بالبرلمان عن رقص دينا في احدي حفلات المدارس الخاصة
و بعدها سمعت عن انهم يستنكرون هذة الفعلة الشنعاء .. لا افهم عن اي شيء يتكلمون !؟ لأن هذة المدرسة التي تمت مهاجمتها هي مدرستي .. من سن الحضانة و حتي الثانوي مدرسة دي لا سال الفرير بالظاهر .. و لأني اعرف أن حفلات البروم ينظمها طلبة المدرسة و يدعون بها فنانين من كل المجتمع ... و تكون في احدي الفنادق و يحضرها اولياء امور الطلبة بالطبع ... فقد تمت دعوة دينا
و طبعا دينا رقاصة ... يعني بترقص ... ما علاقة المدرسة بحفلة تخرج يقيمها الطلاب خارج اسوارها في احدي الفنادق الخاصة !؟ علما بأن المدرسة تقيم حفلة اخري بداخل اسوار المدرسة تكرم فيها الطلبة المتفوقين و لا يحضرها الا الطلبة و اولياء امورهم و كيف يتم الزج باسم هذة المدرسة العريقة التي تخرج منها عصمت عبد المجيد الامين العام لجامعة الدول العربية و وزير خارجية مصر الاسبق و الكثير و الكثير من امثاله من صفوة المجتمع في استجواب في مجلس الشعب ... و لماذا لا يتم ذكر اسم المدرسة كنموذج مشرف للتعليم في مصر
لماذا يذكرون فقط انه في حفل التخرج في احدي فنادق الخمس نجوم و خارج اسوار المدرسة رقصت راقصة و غني مطرب !! و سيحاسبون مسئولين المدرسة عن ما حدث ... ما كل هذا العبث !؟
لماذا لم يتكلم احد النواب الموقرين عن برامج التعلم بطرق اخري التي تطبقها المدرسة !؟ لماذا لم يتحدث احد عن النشاطات الطلابية و حفلات الموسيقي العربية التي تقام بداخل المسرح المدرسي !؟ لماذا لم يتحدث احد عن مستوي اجادة طلاب هذة المدرسة للعربية و الانجليزية و الفرنسية و كل المواد !؟ و عن نسبة دخول طلابها المرتفعة جدا الي كليات القمة الحكومية !؟ لماذا لم يطالبوا بتعميم هذا النموذج و التعلم منه !؟
ثم انه دينا راقصة و رقصت في فندق ... هو الرقص ممنوع !؟ ... و ان كان ممنوع و انا لا اعرف ... هل هو الموضوع الاهم لتقديم استجواب عنه في مجلس الشعب ! هو في ايه !؟ انتوا ما بتشوفوش افلام ! بلاش قراءة بس اتفرجوا علي الافلام
انا فخور بأنني احد خريجي هذة المدرسة ... و ليتكلم النواب الموقرين عن مستوي التعليم بالمدارس الحكومية ... بدلا من أن يدينوا حفلة اقامها طلاب المدرسة في فندق

38 comments:

Anonymous غير معرف said...

السلام عليكم

الدكتور عصمت عبد المجيد خريج كلية سان مارك بالاسكندرية و ليس Collège De La Salle فى القاهرة .

و قد حضر حفل المدرسة بمناسبة مرور 75 سنة على انشاءها

مع الشكر

مؤمن

Saint Marcian

11:45 م  
Blogger karakib said...

و هي سان مارك مش تابعة لمدارس الفرير ؟؟ مش هي هي نفس الهيئة المالكة و نفس الادارة ؟ و لا انا غلطان ؟

11:48 م  
Blogger coffee break said...

الموضوع طلع نزل ليه علاقة بالهيئة التابعة للمدرسة اللى حضرتك بتتكلم عليها
بعد ما استلموا فرنسيسكان قصر النيل اليومين اللى فاتوا جه الدور على كوليدج دى لاسال
و بدل ما يتشطروا و يتصدروا فى الفارغة مش بيتكلموا ليه و لا يقدموا استجوابات على الناس اللى بتموت من الجوع و الأكل المتهرمن و الشباب اللى مش عارف يتجوز و الحديد اللى ولع؟
خلاص مابقاش عندنا مشاكل غير ان دينا رقصت فى بروم مدرسة!

12:03 ص  
Anonymous غير معرف said...

عزيزى
تعليقى كانت منطلق من هذه الجملة :
"كيف يتم الزج باسم هذة المدرسة العريقة التي تخرج منها عصمت عبد المجيد الامين العام لجامعة الدول العربية و وزير خارجية مصر الاسبق..."
و اردت تصحيح المعلومة فقط ...

لا خلاف بيننا فى المبدأ .

تحياتى ...

مؤمن

12:50 ص  
Blogger karakib said...

يا استاذ مؤمن المعلومة اللي حضرتك وضعتها سليمة 100 بالمئة و لو تلاحظ اني عامل لينك علي اسم الدكتور عصمت عبد المجيد للويكيبيديا و اول جملة في صفحة الويكيبيديا ذكرت اللي بتقوله تماما ... افتح اللينكات اللي جوا المقال خصوصا الاخير اللي اسمه قراءة
فيه تحليل و نقد لفيلم عمارة يعقوبيان كتبه الاستاذ جمال الغيطانب و باعتبره من افضل التحليلات اللي اتكتبت عن الفيلم
نورتني بزيارتك و اتمني دوام المرور :))

12:54 ص  
Blogger عباس العبد said...

أزال المؤلف هذا التعليق.

1:57 ص  
Blogger عباس العبد said...

أزال المؤلف هذا التعليق.

2:01 ص  
Blogger عباس العبد said...

هانى
ايه التوافق ده
انا كمان كاتب عن مُزتى المفضلة دينا الفاضلة .
المشكلة زى ما أنت قلت محدش بيفهم ولا عايز يفهم و لا ناوى يفهم . قناة العربية بتقولك حفلات البروم أنتشرت من سنتين بس هى و الى أسمه نبيه الوحش .شفت هبل اكتر من كده ؟
انت عارف ايه الى بيحصل طبعاً
كبار الدفعة بيحجزوا صالة فى الفندق و بيجيبوا أى حد يغنى و يرقص و بيجيبوا صحباتهم البنات و أولياء الأمور و كل الى بيحصل أنهم بيحطوا على مدخل القاعة فى الفندق يافتة عليها أسم المدرسة و كلمة بروم لرقم الدفعة
دول كانوا كاتبين
مدرسة دى لا سال
بروم دفعة 2008
المدرسة معملتش حاجة و مش ممكن تعمل كده , لكن تعمل أيه فى الناس الى يحبوا الهيصة , مدرسة خرجت عظماء يجوا ناس ميعرفوش ينطقوا كلمة أنجليزى من بتوع بى تقيلة و بى خفيفة يرفعوا عليها قضية
حاجة قلة ادب . بجد
مدرسة زى دى المبنى الكبير فيه يعتبر أثرى بسبب المعمار و يروحوا ناس عاملين كده ؟ . قلة ادب ....
بجد مدرستنا دى تتف على أى حد فى مصر
-------
مؤمن
انت من سان مارك
يعنى من أعدائنا زى ما الجيزويت أعدائنا . أذاً هى الحرب
هههههههه

2:11 ص  
Blogger Nsreen Bsunee said...

هانى
معلش يا جميل متنرفزش نفسك كده
:))
ياريت فعلا كل المدارس فى مصر تعمل حفلات للخريجين يارييييييييت نص المدارس فى مصر
مش نصهم ربعهم بس يكونو زى سان مارك وفيكتوريا كولدج وكولدج دى سال مكانش بقي ده الحال يا عبدالعال
:))
كمان يا عم ديه عالم فاضيه المشاكل اللى فى البلد كلها بح خلاص ومش لاقيين حاجه يعملو عليها استجواب اعذرهم معلش

2:31 ص  
Blogger e7na said...

تخيل سعادة هذا النائب حينما يرى صورته فى صدر احد الجرائد الى جوار صدر دينا
انه شىء يدعو الى الفخر طبعا وسيجمع اولاده ويحتفل بهذا الفعل البطولى

جتنا خيبه على خيبتنا
احنا انتخبناهم علشان يعملوا اعلانات لدينا

2:52 م  
Blogger e7na said...

تصحيح بسيط التحليل فىا لرابط الاخير لروائى اسمه محمود الغيطانى وليس الروائى جمال الغيطانى
شكرا

2:53 م  
Blogger hesham said...

عزيزى هانى

المشكلة مش فى عدم القراءة و بس

ياريتها جت على كده

المشكلة فى القراءة المبتورة

يعنى خد العنوان اللى هو مغلوط اساسا و ابنى عليه اللى حصل من دماغك و ابدأ اشتم اللى كان نفسك تشتمهم من زمان

الحقيقة دينا عداها العيب ..رقاصة و رقصت فى فندق

و المدرسة عداها العيب ..معملتش حاجة غير لائقة جوه جدران المدرسة

بس تعمل ايه فى ناس فاضية نفسها تتكلم عن العيب اللى كان نفسهم انه يحصل

ناس عايزة جنازة و تشبع فيها لطم

تحياتى
هش

2:14 ص  
Anonymous غير معرف said...

بصراحة يا جماعة انتو كلامكم قطع قلبى لانكم جهله . كل المدارس اللى بتتكلموا عنها هى مدارس تبشيريه ولتخريج ناس ولاؤهم ليس لبلدهم ولكن الولاء يكون للبلد المؤسسة للمدرسة يعنى تخريج طابور خامس وعوضنا على الله

محب لبلده

8:55 ص  
Blogger karakib said...

عباس العبد

يا رامز انا فعلا فخور بأني خريج المدرسة دي و مندهش للغاية من نواب مجلس الشعب اللي بيتكلموا عن الفيديو كليب و الرقص و منع الخمور في الوقت اللي فيه ناس بتموت كل يوم بسبب حوادث طرق و بسبب اهمال في الرعاية الصحية
اخلاق ايه اللي بيقولوا عليها !!؟ و هما هيربونا
يا سيدي انا بحب الرقص و باتفرج عالرقص و في البروم بتاع ابني هاجيب دينا ترقص
لأ مش دينا بس كمان رقاصات مصر كلهم هما مالهم
دي حرية شخصية انها تلبس اللي هي عايزاه
و لا هي الحرية الشخصية دي علي مقاسهم
ما كل واحد حر و اللي عايز ما يشوفش رقاصين بلاش لكن كمان هيحجروا علي الناس في حفلاتهم الخاصة في الفنادق و يقولوا لهم بلاش رقاصة !! اما شيء غريب صحيح
هو العيش بقي كتير و البنزين رخص و الجناين و الورد بقيت قدام كل البيوت اللي سلموها للمشردين و اطفال الشوارع خلاص
ده حاجة تحرق الدم يا رامز

2:33 م  
Blogger karakib said...

Nsreen Bsunee

اعذرهم علي ايه
هما دول دخلوا المجلس ليه !؟ انا فعلا دمي محروق
و واحد يطلع يقول لك مدرس ملتحي بيتكلم و يدافع عن اللي عملوه الطلبه
المدرس الملتحي ده رجل في منتهي الاحترام
و عالم لغة عربية مش بس مدرس ثانوي
و فعلا اللي بيشوفه بيقول ده اديب او شاعر
و عنده مدرسة علي نفقته الخاصة بيعلم فيها الشعر لطلبة ثانوي و مجانا
يعني لما راجل زي استاذ سمير طاحون اسمه يتقال عليه مربي فاضل موافق علي رقاصه في فندق
و بعدها بشوية بقيت جوا المدرسة .. مه انه ما حصلش و لما طلع يدافع عن المدرسة في العاشرة مساء قالوا عليه ما في الخمر يا ليل يعني تطاول علي راجل يصلح انه يكون وزير تربية و تعليم
و علي مدرسة نموذج في تطبيق الحريات الشخصية اللي مش بمقاسين
و حاجة تحرق الدم

2:37 م  
Blogger karakib said...

e7na

شكرا للتصحيح
راعي اني بس باكتب و انا متنرفز
اما عن صورهم في الجرايد
فالحمد لله لا باشتريها و لا باقراها بقيت
كلها معارضة و حكومية

3:08 م  
Blogger karakib said...

hesham

دي مش ناس فاضية
دول وراهم شغل مهم جدا اللي هو محاسبة الحكومة لو ضيعوا وقتهم في استجوابات زي دي يبقي في هدف و سكوت عن امور اخري كان لازم يتكلموا فيها و ما اتكلموش
يعني في مصيبة كبيرة و لازم كل الناس تبقي فاهمه
هما مش هيربونا
و لا من حقهم يربونا و يتكلموا عن الاخلاق ابدا
كل واحد حر يخلي عياله يشوفوا رقاصة هو شخصيا يلبس شورت و فانلة كاط و ينزل الشارع هو ومراته محدش له دعوة بحد
هي دي الحرية الشخصية و محدش يقول لي اخلاق علشان ما اقولش الاخلاق دي نسبية و كل واحد حر
دي حاجة تحرق الدم
-----
نورتني يا عم هشام :)) بس الموضوع نفسه مستفز بالنسبة لي اوي

3:27 م  
Blogger عباس العبد said...

هانى
هو أنت بس الى دمك محروق , يعنى انا دمى مش محروق
أنت عارف أبويا محامى و بيقولى انه مستعد يدافع عن المدرسة مجاناً
ناس غباءها أسطورى و معندهمش دم
مدرسة فيها مدرسين دكاترة
كليلة و روجيه و فايز بهجت و القصبجية و النمر و طاحون و مدرسين ملهمش عدد معروفين بالأسم على مستوى مصر , خرجوا تلاميذ هم الى فالحين فى البلد دى
مش بتوع بى تقيلة و بى خفيفة , واحدها عصايتها لفوق و التانية عصايتها لتحت , دول بجد الى عايزين عصايا بس مش يضربوا بيها لأ يلبسوها .
انا مشفتش الحلقة أنت عارف شغلى بالليل , مين الى تطاول عليه , و انت متصلتش ؟ , انا لو كنت مكانك كنت اتصلت و شرشحت لهم , هى ناقصة كمان بتوع بمبة كشر الثانوية بنات دول , انا قلتها و بقولها تانى
مدرستنا تتف على أى حد فى مصر
و لا بلاش تتف عليهم دى , علشان تفافتها متتوسخش .
ده مين ده بروح أمه الى يتطاول عليها ؟
لو فى تسجيل للحلقة ياريت أشوفها و حولع فيهم

3:29 م  
Blogger karakib said...

غير معرف يقول

شوف يا غير معرف ... غالبا لما حد يشتم مدرستي اقول له احترم نفسك .. لما يتهمها بأنها اخلاقيا فاسدة و بتخرج طلبة فاسدين نقعد سوا و نتناقش و صوتنا يعلا ... بس برضه مناقشة
اما بقي انك تقول لي انه خريجين هذة المدارس ولائهم للدول المؤسسة مش بلدهم و هما طابور خامس جديد و تتهم المدرسة بالعمالة و تتهمني انا كمان
فاقول لك بكل صراحة
امك لبوة

3:37 م  
Blogger karakib said...

عباس العبد
شوف يا عم الغير معرف اللي داخل يقول لي دي مدارس بتخرج طابور خامس ولائه للدول المؤسسه
ده جهل غريب و اصرار علي الغباء
مشكلة الغبي انه مش عارف انه غبي
هي دي مشكلته الحقيقيه
انا ما شفتش الحلقة يا رامز لكن واحد صاحبي من ايام المدرسة حكي لي اللي حصل فيها .. و لقيت واحد في مدونة مش فار فين بيقول انه الرجل اللي بيدافع عن المدرسة ملتحي
يقصد استاذ سمير طاحون ... الراجل الكبرة ده واحد مدون جاي يقول لك انه بيدافع عن الرقاصين
جهل .. لو يعرفوا الراجل ده خرج اجيال شكلها ايه في اللغة العربية و حبب ناس كتير قد ايه في الشعر و النثر
لو يعرفوا انه ده كان في حصته كأنه بيقدم برنامج ثقافي مش مجرد حصة عربي لثانوية عامة
حاجة تغيظ و تحرق الدم
ثم انه مجلس الشعب بيتكلم في كلام غريب اوي ... يعني مرة عضو رقص مع رقاصة و اتسجل له ده فيديو عملوها فضيحة
هو الرقاصين دول مش واخدين تصريح عمل و لا انا غلطان ؟؟ و بعدين هي مش دي ام الحرية الشخصية اللي بيتكلموا عليها
و لا هي الحرية الشخصية في اتجاه واحد بس
اما امر عجيب غريب
قال بيحافظوا علي الاخلاق !! حد قال لهم ان دي شغلانتهم !! و هي اخلاقهم دي تناسب اي حد اساسا يتكلموا في الهايف و يسيبوا المهم

3:44 م  
Blogger أبوفارس said...

ياخبر أسود
..رقاصه..
طب خليهم أتنين
..وكل خريجى المدرسه طابور خامس
..خد عندك بنتى الكبيره..أبن أختى..أبن أخت مراتى..ثلاثه من بنات وأبناء عمومتى..واحد منهم أبوه بعته م الكويت وأقام مع عمته هنا ليتعلم فى نفس المدرسه التى تخرج منها أبوه..
كفايه كده أحسن العيله كلها شرفت ف المعتقل..
ومش حانلاقى حد يجيب لنا عيش وحلاوه..
ألا هما أعضاء البرطمان الموقر بيقبضوا بالحته..يعنى لما يقدم أستجواب أو أستسخاف زى ده بيدوه بدل زياده مثلا..والا هى بتتحسب على مستوى خفه دم اﻷستسخاف..والله فعلا حرقتوا دمى..وأحنا الحد الصبح والجو جميل بره..تحياتى ياشباب..خالد

7:34 م  
Blogger karakib said...

يا استاذ خالد اللي سعادتك مش واخد بالك منه انه الناس ما بتصدق تهيص علي اي حاجه و كله بيتهم كله بأنه ما عندوش انتماء و لا وطنية اول ما يختلفوا في الرأي ... ده موروث ثقافي كل اللي يخالف يبقي عميل و وحش و كخه
شيء غريب جدا
يعني مدرسة وسط القاهرة و تابعة لمانة عامة و بقي لها 100 سنه موجودة و اهدي الخديوي توفيق ارضها الي الارسالية و تعلم فيها العديد و العديد من المصريين الشرفاء
ييجي واحد يسخن مع اللي بيسخنوا و يقول لك .. انتماء للدولة المؤسسه
بالذمه ده يبقي كلام
يعني ده بقي الطبيعي انه الناس تتهم بعضها في الوطنية ! شيء غريب
مشكلة فوق مشكلة بقيت كمية مشاكل غريبة

3:14 م  
Blogger DantY ElMasrY said...

لاحظ يا هانى ان الأعضاء الموقرين هما نفسهم اللى بيجيبوا رقاصات المناسبات بتاعتهم
!!!!!!!
دا غير ان الرقص فى كل بيت ان مكانش لايف بيبقى عالهوا
واخيرا و ايه يعنى كلنا بنحب نتفرج على اى حاجة حلوة.

مش هاقول ان الرقص لاسمح الله حرام ولا عيب .
الموضوع اننا بنقول حرام واى حد فينا يفتخر ان جاب فى فرحه او فرح بنته دينا او فيفى .
يمكن المشكلة انها رقصت فى المدرسة .او فى مكان مرفوع عليه شعار المدرسة ؟
والمدرسة ليها حرمة !!!
طيب ماهو البيوت ليها حرمة بردك
ومع ذلك بنجيب فيها رقاصات وبيرقصوا ؟

3:43 م  
Blogger mariam said...

عارف يا هانى
انا اول ما سمعت عن الموضوع ده افتكرته شكوى من اولياء الأمور
رغم ان طبعا احنا متعودين على حفلات البروم من زمان مش من سنتين او تلاته لأ اكتر كتير بس قلت اكيد اهل الطلبه مش عاجبهم
اشوف التقارير الاقى اهل الطلبه مش متدايقين
و بعدين الطلبه مبسوطين و المدرسين عادى
الله امال مين قدم الشكوى؟
يعنى واحد مالوش اى دخل بالموضوع
انا عايزه اقول ياريت الأول يشوفوا تعليم الحكومه الرائع شكله ايه
و يا ريت النواب يخلوهم فى قانون الطوارىء اللى اتمد للفتره الألف و يا ريت يشوفوا تصدير الغاز لأسرائيل و يشوفوا قانون الأرهاب و الخمسين فى الميه تحت خط الفقر و الغلاء و العشوائيات و ال 500 احسن جامعه اللى و لا فيهم واحده مصريه
اقول كمان و لا كفايه
اما الناس اللى بيقولوا تبشير
فين ده ؟ مدارس الراهبات و الرهبان بجد بتقدم تعليم مستواه هايل و تربيه بجد مش موجوده دلوقتى انا بقول الكلام ده و انا مسلمه و خريجة احدى المدارس دى
لو فيها شبهة تبشير اكيد الأهالى كانوا مش هيدخلوا اولادهم مدارس علشان يتم تبشيرهم يعنى
اعتذر للتطويل

7:49 م  
Blogger Sherif said...

عفوا .. اعتقد أننا والحمد لله انتهينا من كل مشاكلنا فلم يتبقى سوى دينا

علما بإنى باحبها جدا .. لكن حينما أجد تلك النوعيات من الاستجواب .. بدلة فيفى عبده .. ورقصة دينا فى حفلة بروم .. أجدنى رغما عنى أتسائل هو جدول الاعمال .. قصدى الاجندة مكتوب فيها ايه ؟ ولماذا لانجد مثل تلك المناقشات فى مجلس اللوردات أو ..

تصبح على خير

10:14 م  
Blogger sarah la tulipe rose said...

انا برضه مفهمتش سبب الهيصة الي عملوها دي ليه..بصرف النظر عن تاريخ المدارس الفرنسية في مصر الذي لا ينكره احد
معروف ان حفلات البروم لا دخل للمدرسة و لا لادارتها فيها من اصغر تفصيل لاكبره ..فهو امر يديره الطلبة و ينظمونه خارج اسوارالمدرسة و لا دخل لها بالحفل و لا بمن سيحضر لانه يقام في فنادق الخمس نجوم اي كانه فرح مثلا او حفل عادي لكن دي الطبيعة المصرية الي تحب الهايفة و تتصدرلها و لازم يتشطروا علي اي بردعة في وشهم طالما الحمار هو الي راكبنا اليومين دول
de la salleوغيرها من مدارس الفرنكفون في مصر معروف اتجاهتها و طريقة تربيتها و مش محتاجة دليل انها خرجت ناس عظام و مازالت حتي الان
كون بقي ان نواب مجلس الشعب شايفين ان رقاصة رقصت دي حاجة غريبة يبقي المفروض نعاقب برضه اي رقاصة ترقص في فرح و حفل في اي فندق
وفعلا اديني في الهايف و انا احبك يا ننس

8:58 م  
Blogger lastknight said...

هاهاه .. جميل قوى الواد الغير معروف ده ... و الله اتسليت جدا بكلامه .. الله يحرقه
المهم .. شوف يا باشمهندس .. فيه مثل فى الفلاحين بيقولك الواد قال لأبوه يا با علمنى الهيافه .. قاله تيجى يابنى فى الهايفه و تتصدر
هذا مافعله المجلس الموقر بجلالة قدره
ماتخليك فى الرومانتيكى و تسيبك من العك ده ؟ مافيش أمل خلاص
المهم .. شرفنى عشان أنكد على حضرتك بموضوع جديد ..

12:25 ص  
Blogger أسوور said...

قرر رئيس مجلس ادارة الجريدة مشكورا أن يتبنى كل ما يكتبه المدونون
وان يفرد مساحة لا بأس بها لبوستات البلوجرز
كما وافق على نشر البوستات المرشحة بتوقيع كتابها وصورهم
وذلك ايمانا منه بقوة التدوين وبأنها صوت المصريين
***
على كل مدون يرغب فى نشر مقالات - تحقيقات - قصص - نقد - ادب - شعر - سياسة او أى كتابات لم يرد ذكرها
ان يرسل البوست المرشح مذيل بتوقيعه وعنوان المدونة والإسم الحركى ان اراد
مرفق بصورة شخصية له
على الإيميل التالى

amyasser@hotmail.com

أو ترك اللينك الخاص بالبوست والمعلومات الخاصة بالمدون فى تعليق على العنوان التالى

www.amyasser.blogspot.com

تحت عنوان خاص لجريدة الأسرة العربية
الجريدة تصدر الإثنين من كل أسبوع

6:32 م  
Blogger appy said...

هاني انت بتتكلم عن نبيه الوحششششش فاهم يعنى واحد قاعد لاي حاجه ختي لو واحده قلعت الحجاب بيرفع عليها قضيه
الا قولى علشان دي تفرق فى المتاقشه دينا كانت بترقص على ايه علشان المنهج بسسسسسس
يا سيدي البرومو بيحصل فيه كتير وهى مشاكل التعليم الاساسيه خلصت لما يمسك فى دي كانوا اولى بصوا للهرتله اللى بتحصل هدي نفسك

8:15 م  
Blogger karakib said...

DantY ElMasrY
المشكلة انهم بينتقدوا حاجات ماينفعش حد ينتقدها اساسا
بس اهه لملء فراغات زمنية بمساحات صوتية يا استاذي ... اهم بيتكلموا

8:35 م  
Blogger karakib said...

mariam
بالعكس انت ما طولتيش نهائي .. كلامك و المواضيع اللي فتحتيها يا دكتورة محتاجة مجلدات للشرح
شيء فعلا غريب ناس بتنتقد حاجات مينفعش حد ينتقدها في الوقت اللي كل الحاجات مش طبيعية من حواليه بينتقد الطبيعي

8:38 م  
Blogger karakib said...

Sherif
مجلس اللوردات !! يا خبر ابيض :) تصدق ضحكتني
يا راجل محدش فاضي هناك

8:39 م  
Blogger karakib said...

sarah la tulipe rose

المفروض اساسا الرقاصة ما ترقصش
هو ده المفروض :))) يعني رقاصة و ساكتين
تبقي بترقص كمان
لأ لأ كده مينفعش نهائي يعني

8:40 م  
Blogger karakib said...

lastknight

يا باشا الرومانتيكي فوقه علي طول بس اصله في حاجات ما يتسكتش عليها بالذات لما تكون فاهم كويس ايه اللي بيتقال
اما عن الموضوع اللي عندك ... فأنا قريته بس باحاول افهم اكتر بصراحة

8:41 م  
Blogger karakib said...

أسوور

شكرا لأهتمامك يا ياسمين :))

8:42 م  
Blogger karakib said...

appy
الاول انا انبسطت اوي لما شفتك في حفل التوقيع :)) اما عن الجزء بتاع المنهج بالظبط فالرد كما وصل لي من احد الطلبة
انها كانت شاطرة اوي في الاحياء و خايبة في الكيمياء
ههههههههههههه

8:44 م  
Blogger ana ga3an said...

دة احنا زمايل بقي
انا كنت في فرير صلاح الدين
بس علي ايامنا
كان اخرهم بابا نويل
دلوقتي بقت ابلة دينا


انا مش عارف الناس واجعة دماغها بالموضوع دة لية
والله احسن مدارس في مصر مدارس الرهبان
سواء مستوي تعليمي او اجتماعي

ما يروحو يشوفوا اللي بيحصل في مدارس الحكومة
نصهم مجوزين عرفي و النص التاني حوامل

11:01 ص  
Blogger karakib said...

ana ga3an
اعتقد انها نظرية المديتشي
الكلام عن شيء لتوجيه النظر اليه
لأنه كان في حاجة بتحصل في نفس الوقت مش مطلوب انه الناس تبص عليها
و اللي يعيش ياما يشوف

5:11 م  

إرسال تعليق

Links to this post:

إنشاء رابط

<< Home