الأحد، يوليو 06، 2008

يقاس مدي احترام حقوق الانسان في الدول باحترام الانسان لحقوق الحيوان

اضغط علي المكتوب باللون الاحمر لتقرأ الخبر
الغريب في الامر ليس الخبر ... و لكن تعليقات القراء المستفزة ... لا احد يهتم بأنه هناك حيوان يقتل بلا أي رحمة ... الجميع يسخر
المثل الشعبي يقول و لاحظ ان المثل الشعبي يعبر عن مخزون الفكر الجمعي للمجتمع الذي افرزه
اهه كلب و مات
الجنازة حارة و الميت كلب
ملعونة هي تلك الامثال و ملعون هو من اطلقها
يقال في تعريف الديمقراطية الحقوقي أن الديمقراطية هي أن يسود رأي الاغلبية دون الاخلال بحقوق الأقلية
و أزيد عليه
يجب أن يقاس مدي احترام حقوق الانسان في الدول باحترام الانسان لحقوق الحيوان
لا اتصور أن يحترم احد حقوق اخيه الانسان و هو غير قادر علي احترام حقوق الحيوانات الاضعف منه
يكفي أن يتم جمع هذة الكلاب و منعها من التزاوج دون قتلها و لا تقل لي ضحايا العبارات و قتلي الطرق السريعة
لأن احترام حقوق الأنسان يبدأ من احترام حقوق الحيوان
لاحظ ايضا أن القاء اللوم علي هذا الطبيب البيطري لهو درب من العبث لأنه ليس الوحيد الذي يفكر بهذة الطريقة
يكفي أن اخبركم بأنه في ايطاليا لاحظ المسئولين أن الضفادع تعبر من فوق طريق سريع يمر بين الزراعات فتدهسهم السيارات فأنشأوا تحت الطرق السريعة مواسير لتعبر بداخلها الضفادع الطريق بأمان



47 comments:

Blogger Hypatia said...

حلو اوي الخبر بتاع ايطاليا ده
اولع فى نفسي ولا ايه!!!!!!!!!!!!!

10:17 م  
Blogger نعكشة said...

اتفق معك في حكاية مراعاتنا للحيوان
وبتضايق لما العيال يمسكو القطة و يطوحوها بعيد و يبهدلوا في الكلام الصغنطوتة

و اكيد لازم نحافظ علي الحيانات
لانهم احياء
وليهم روح
وبيحسوا برضو

اذكر إن حد قالي قبل كدة إن الفروق( عمر بن الخطاب) رضي الله عنه قال فيما معناه إن لو شاة تعثرت في العراق ليسأله عنها الله ( و دة يدل إننا مفروض نهتم بالحيوانات لانهم ارواح زينا)

اذكر برضو ان لما تبقي فلوس من بيت المال او باين حبوب او مش فاكرة سأل الاول فيه اي حد محتاج معونة لما قالولوا لأ أمر ان الحبوب يرموها علي الجبال عشان الطيور تاكلها
ودة برضو مدعاة اننا نهتم بالطيور

دة غير اني زي ما قلت و حضرتك قلت هيا ارواح برضو

بس سوري يعني

يبقي الناس بتتدبح وبتموت
وعايشة في صفيح
ومش لقية تاكل
و بيبقي حالتهم كرب
ومنعملهمش هما ماسورة ماية عشان يشربوا ماية نظيفة بدل ما يشربو من الجراكنمنعملهمش صرف صحي بدل ما بيبتهدلوا من ان مفيش صرف و كل كام بيت بيشتركوا في حفرة هيا دية الصرف بتاعهم

نسيب دول
و سوري يعني نعمل للضفادع طريق

دول ارواح و دول ارواح
بس الاول نعيش الانسان كويس و بعدين نبص للحيوانات
انا لا اقول
قبل ما نعيش الانسان كويس نعامل الحيوانات وحش
تؤ تؤ تؤ لأ طبعاً

انا اصلا لما بشوف الراجل بيضرب الحصان/ الحمار بالكرباج و هوه اصلا جلدة متسلخ من البتاع اللي محوطينة بيه بحس إن انا اللي بتضرب

بس فيه ناس أولى
مش لاقيين ياكلوا ولا يشربوا ولا يعيشوا
وعايشين في صفيح

كان فية واحد عامل موضوع ان فرنسا عاملة بطاقة أي دي لكل الحصنة و الحمرة في البلد

دول ناس ظبطوا حقوق الانسان فبيبصوا للحيوان
اتمني اننا نصل للدرجة اننا نراعي حقوق الحيوان قوي
ومن قبلة لاانسان

دمت سالماً

سلامون عليك

11:20 م  
Blogger م said...

المبدأ نفسه لا اعتراض عليه
الرسول عليه الصلاة والسلام نهى عن ضرب الدواب فى وجهها ان كان لا بد من ضربها لكى تسير
ولكن حينما يكون الاختيار بين قتل الكلا الضاله
او تركها فى الشوارع وتعريض الناس لخطر مرض السعار الذى يقتل بنسبة مائه بالمائه من الاصابات
او تطعيم كل الكلاب وهو ما يبدو غير ممكن فى ظروفنا الاقتصاديه
يبقى تفتكر نختار ايه؟
ان كان فيه فلوس يطعموا الكلاب او يعملولها اماكن يعيشوا فيها يعملوا بس ياريت من غير ما يفرضوا ضرايب جديده
لو ماكانش يبقى قتلها واجب محتم
كل حيوانات الدنيا لا تساوى روح انسان يموت بالسعار لمجرد ان كلب او قطه فى الشارع خربشه حتى مش لازم يكون عضه
وده للاسف لسه بيحصل وانا بشوفه لأن ده فى مجال شغلى

11:45 م  
Blogger mina said...

ما هو احنا مش حيوانات ... حاول تعتبرنا بكتيريا

12:50 ص  
Blogger karakib said...

Nsreen Bsunee
الخبر بتاع ايطاليا ده مهم اوي
عندي منه كتير
يعني كل بلد بتحترم حيواناتها بشكل غير التاني يا نسرين و اللي يعيش ياما يشوف فعلا

2:00 ص  
Blogger karakib said...

نعكشة

يا فندم ده نوع من انواع التشتيت في الحوار
البني ادمين فعلا بيموتوا و ده لازم نحزن للغاية بسببه و نغضب كمان
لكن ده مش معناه اننا نكون متساهلين في حقوق باقي المخلوقات
ابدا
مش معني انه لأنه في بني ادمين عايشين وحش يبقي نموت الكلاب
دي قضية و دي قضية
و حل الاتنين يجب ان يكون متوازي مش متوالي

2:02 ص  
Blogger karakib said...

محمد على الهنداوى
اولا في معلومة هامة اوي يا دكتور انت نسيتها .. الكلب المسعور لا يتجول بين الناس .. بيبقي دائما مستخبي تحت عربية او في مكان يعني الكلاب اللي بيضربوها بالنار دي كلها غير مصابة بأي فيروسات لأنها تتجول في الشوارع بلا خوف

ثم من قال ان مرض السعار مميت يا محمد ؟؟
هو مش له مصل و متوفر و لا انا غلطان ؟؟
طيب انا موافقك جدا انه ماينفعش نموت بني ادم علشان نحافظ علي حقوق حيوان
متفق معاك جدا
لكن لما تشتري طلقات رصاصية و بنادق و سيارات و توفر مدفن للكلاب المقتولة ده مش هيكلف فلوس برضه ؟؟ يعني لو لموهم و عملوا لهم عمليات اخصاء مش هيبقي اوفر ماديا حتي ؟؟ و لا انت ايه رأيك ؟ بلاش دي
يا سيدي احنا مش قادرين ننضف شوارعنا فجيبنا شركة اجنبية تنضفها لنا و زي ما انت شايف نضيفة عالاخر اهه
افتكر لو طلبنا مساعدة أي هيئة من الهيئات بتاعة حقوق الحيوان في العالم هيوفروا لنا دعم مادي لو هي المشكلة فلوس يعني
قتل الكلاب و القطط شيء في منتهي الوحشية
و ده مش معناه اني مش واخد بالي من الناس اللي بتتقتل
لكن مفتاح ده هو ده
يقاس مدي احترام حقوق الانسان في الدول باحترام الانسان لحقوق الحيوان

2:10 ص  
Blogger karakib said...

mina
لا يا مينا احنا بشر
و بني ادمين و عارفين يعني ايه رحمة و نقدر نرحم بعض و نرحم المخلوقات اللي عايشة معانا
احنا مش بكتيريا يا مينا احنا بني ادمين و لا عمرنا هنكون بكتيريا

2:12 ص  
Blogger Empress appy said...

يا خبر عليك وعلى مواضيعك يا ابنى بجد حلوة
انا طبعا متفقه معاك ان حرام وقتل الحاجات دى بدون سبب برضه حرام لان كل حاجه ربنا خلقها لها الضرر بتاعها ولها النفع يعنى اه اقتل كلب لو جاله بتاع ده وكان هيعض الناس انما غير كده هو بيحمينى من الكتير طيب ما فيه فككرة احسن فى مصر والله عارف ان الكلب البلدى ده اللى فى الشارع لو الناس بتوع الجمعيات اللى بيقتلوهم اخدوهم وحبسوهم اسبوعين تلاته ودربوهم على الحراسه هيستجيب جدا لانه ذكر جدا مش غبى وجرب تجيب كلب بلدى وتربيه وتعلمه هتلاقى افضل بكتير من الكلاب التانيه هىالتانيه حلوة شكلا
المهم فى النهايه احنا معندناش احترام لحقوقنا يبقى عاوز ايه من ناس كده

9:31 ص  
Blogger ^ H@fSS@^ said...

طيب ممكن اتحول لضفدعة و اطلب نقلي لجنينة حيوانات ايطاليا
او حتى يرموني في اي غابة و انا امشي تحت اي مواسير

وجعتلي قلبي يا شيخ
موروث شعبي؟؟
احنا مالنا بصحيح على حكاية الامثال اياها دي
انا موضوعي الجديد في المجلة عن الموروث الشعبي بس من وجهة نظر جديدة شوية

تحياتي يا كبير القلب

9:48 ص  
Blogger نعكشة said...

ممممممممممممم كلام حضرتك فكرني ب القصة بتاعت الراجل اللي نزل عشان يجيب للكلب ماية

أم أم أم

هوه أنا معترضة علي فكرة يجيبو ديل الكلب دية لإنهم كدة بيمثلوا بالكلاب غير إنهم بيذبحوها و بعدين مش هيدل

رد بس علي كلام حضرتك

هوه داء الكلب بيموت بنسبة 100% و خصوصاً لو الكلب عض الواحد كتير أو عضة في منطقة الرقبة

وبعدين الكلاب المسعورة نوعيين مش كلهم بيبقوا من النوع اللي بيخاف و ينزوي
فية نوع بيبقي هائج و ثاير وممكن يعض باقي الكلاب اللي حوالية
وبالتالي يبقي فيه قطيع من الكلاب المسعورين
وبالتالي يعرض المواطنين للخطر و خصوصا الاطفال اللي بيلعبوا في الشارع

اعتقد ان الحل الافضل انهم يعزلوا الكلاب دية يودوها فين معرفش

فبالتالي بيقتلوها

صراحة مش عارفة حل معين
بس من اللي درستوا ان ممكن يطعموا الكلاب
بس التطعيم دة بيبقي لكلاب البيت
معتقدش انهم هيطعموا كل الكلاب اللي في الشارع
لإن التطعيم غالي جداً

اني هاو لو حضرتك عندك حلول مختلفة ممكن تقترح

دمت سالم

سلامٌ عليك

11:58 ص  
Blogger Moon-baby said...

الحكاية دي عملوها من 8 -10 سنين...كنت بسمع صوت الكلام تحت البلكونة...و على فكرة كانوا بيقتلوا الكلاب كلها..مسعورة و غير مسعورة لاني ببساطة كنت بروح المدرسة و بشوف الكلاب كل يوم و كل الكلاب كانت طبيعية!

مش قادرة اوصفللك المنظر كان مقزز اد ايه لما تلاقي كلاب مرمية على اليمين و الشمال...مذبحة

مفيش اي مبرر لقتل حيوان بالشكل ده و كمان قطع ديله!!! ده الضرب في الميت حرام! دكتور ايه و زفت ايه! ده لو منظمه معنية بحقوق الحيوان سمعت كدة اكيد هتاخد اجراءات قانونية ضده

و عندك حق..احنا بنعامل الحيوانات اسوأ معاملة..في اطفال في الشارع بتتفنن في تعذيب القطط و الكلاب و اهلهم بيبقوا معاهم و لا بيقولولهم ان كدة غلط!

و اخيرا هقولك حاجة علشان تشوف الاوروبيين( الكفرة الملحديين لعنة الله عليهم) بيعاملوا الحيوانات ازاي و ده كان موقف شوفته في فيلم و تنحت...كان الراجل علشان يتبنى كلب لازم يبقى فيه شروط...من بينها
1 انه يبقي في حد متواجد في البيت و ميغيبش كتير عن الكلب
2 يكون في مكان مناسب ينام فيه الكلب و مساحة خضرا
3 المتبني بيمضي على اوراق و لو خالف الشروط بيدفع زي غرامة كدة و بيتاخد منه الكلب

2:33 م  
Blogger م said...

اسمح لى بس يا هانى اصحح اخطاء بسيطه وردت فى كلامك وهى للأسف أخطاء شائعه بخصوص السعار او مرض الكلب
وانا مصدر حضرتك هى دراستى وشغلى لمدة سنه ونص فى مستشفى الحميات اللى بتستقبل المصابين بالسعار وبتوفر المصل للى عضه كلب او قطه او فار مثلا

انت بتقول:
الكلب المسعور لا يتجول بين الناس .. بيبقي دائما مستخبي تحت عربية او في مكان يعني الكلاب اللي بيضربوها بالنار دي كلها غير مصابة بأي فيروسات لأنها تتجول في الشوارع بلا خوف
**
ده صحيح بالنسبه للكلب اللى ظهر عليه المرض بالفعل مش حامل الفيروس
عاوز اقولك ان الكلب ممكن يكون حامل لفيروس السعار فى لعابه وما يظهرش عليه اى اعراض ويكون طبيعى جدا لحد ما يعض اى انسان بعدها يظهر عليه المرض
وده مالوش تفسير علمى لحد دلوقتى بس جايز يكون ليه علاقه بدورة حياة الفيروس
بمعنى ان الكلب بنعرف انه مسعور بعد ما يكون عض حد ونقل ليه الفيروس بالفعل
****
بتقول كمان:

ثم من قال ان مرض السعار مميت يا محمد ؟؟
هو مش له مصل و متوفر و لا انا غلطان ؟؟

***
اللى قال ان مرض السعار مميت حضرنك هو كل كتب الطب والتجربه العمليه
مميت بنسبة 100 بالميه بمعنى انه ما فيش ولا حاله تعيش لو اصيبت وخصوصا لو كانت العضه فى الاصابع او قريبه من الرأس
بخصوص المصل مافيش مصل فى الدنيا بيحمى بنسبة 100 فى الميه وانا شفت حاله ظهرت عليها اعراض المرض بعد الحقنه الرابعه من المصل من اصل خمس حقن
ده غير ان الحقنه تمنها حوالى 65 جنيه مضروب فى خمسه
يعنى تكلفه غاليه على حساب الدوله لانه مش بيتباع فى الصيدليات

11:55 م  
Blogger م said...

كمان الكلب المسعور بيموت فى خلال 10 ايام من عضه للشخص يعنى حكاية انه الكلب المسعور بيفضل مطلوق فى الشارع على طول دى مش مظبوطه
بس فى خلال ال 10 ايام دول ممكن يعض 100 واحد

11:58 م  
Anonymous غير معرف said...

هأقولك حاجه الخبر مش مستفز ولا بتاع
في الأرياف الكلاب مرعبه مش طيبين زي اللي في المدن ... لأنهم في مناطق واسعه وهاديه ومتعودين علي الصيد بالتالي الكلاب الضاله ممكن تسبب مشكله فعلا
بجانب كسل الناس اللي ممكن ينامو في بيوتهم ويقولو خرجنا عملنا المأموريه ورجعنا
أعتقد الهدف من القرار كان التأكد من تنفيذ المهامات فقط

وبعدين أنا أول مره أختلف معاك
أنت زعلان علي حقوق الحيوان ... هو أنت مش شابف حالنا ولا أيه؟؟
لما نكون بنحصل علي اساسيات الحياه أولا نشوف موضوع حقوقنا
وبعد مانشوف موضوع حقوقنا أوعدك هنشوف موضوع حقوق الحيوانات ده
(:
تحياتي

1:32 ص  
Blogger karakib said...

نعكشة

انا قلت الحل يا فندم انه يلموهم و يمنعوهم من التزاوج
بس كده

4:29 ص  
Blogger karakib said...

appy
ما هو يا أبي لو احنا بنحترم بعضنا
يبقي هنحترم الحيوانات
و مش عايز اقع في فخ البيضه الاول و لا الفرخة
نحترم كل المخلوقات

4:31 ص  
Blogger karakib said...

HafSSa
تقصدي مجلة مصر الجديدة يا حفصة ؟ علي فكرة انا عايز اقول لك انه استراليا كمان منعت لفترة تصدير الماشية لنا علشان احنا كنا بنعاملها وحش
اللي بيحترم الحيوانات بيحترم البني ادمين و كل المخلوقات حتي لو كانت نباتات

4:32 ص  
Blogger karakib said...

Moon-baby
الموقف الأخير اللي ذكرتيه ده انا اعرفه كويس من حكاية لواحد صديق رفضوا يدوا له كلب لأنه ما عندوش وقت و فلوس و مكان كفاية
:) تخيلي مش باقول لك بيقولوا له حدد النسل علشان انت ما معاكش فلوس
لأ ده بيقولوا له انت غير قادر علي رعاية حيوان

4:34 ص  
Blogger karakib said...

محمد على الهنداوى

مش هاقدر اجادلك يا محمد لأني مش دكتور و خصوصا انه ده مجال عملك
و شكرا لتصحيحك معلوماتي لأني كل اللي اعرفه انه طول ما الكلب مش خايف مني يبقي مش مسعور
لما سألتك هو مميت و لا لأ كنت فاكر انه المصل أكيد بيعالج
اول مرة اعرف انه في احتمال انه ما يعالجش الشخص المصاب
بس انت ايه رأيك في قتل الحيوانات دي عموما ؟؟ انت عارف انه في فرق من الامم المتحدة بتنزل في دهب تلم الكلاب دي و تخصيهم و تسيبهم يعيشوا طبيعي لحد ما يموتوا وحدهم ؟ تفتكر لو طلبنا من أي هيئة .. أي هيئة انها تيجي تصرف هي و تتصرف كمان هي مع الحيوانات الضاله دي ايه اللي هيحصل ؟
فاضل بس اقول لك انه بعد البلاغ اللي قدمته لهيئة اسمها spare
تم الاتصال بمكتب المحافظ و بيقولوا انهم هيعملوا حاجة صدقني يا محمد احترام البني ادمين لنفسهم و بعضهم بيبدأ من احترامهم للمخلوقات اللي عايشة ما بينهم حتي و لو كانت نباتات
و شكرا للمعلومات القيمة و لو تقدر تقول لي معلومات عن هذا الفيروس اكثر يبقي شيء جميل

4:45 ص  
Blogger karakib said...

Basma
الاختلاف شيء جميل يا بسمة و الحوار شيء يثري الاطراف المتحاورة
تعالي نتفق علي انه اكيد في حل تاني غير اننا نقتل الكلب و نقطع ديلة او نفقع عينة بعد ما يموت
ده غير اني ما باقولش حقوق الانسان زي الفل و كله تمام بس ده مش معناه اننا نسكت علي أي انتهاكات سواء لحيوان او انسان
ملاحظة بسيطة .. أي بلد بتحترم الحيوانات اللي فيها بتحترم البني ادمين كمان
لأنه مينفعش اكون عندي رحمة بالانسان فقط
كتير اتكلمت عن انه في ظلم للبني ادمين بس ده مش معناه انه مادام البني ادمين متهانين يبقي عادي نموت الكلاب و نقطع ديولها
ده حل سادي و غريب للغاية
انا شايف حالنا و عنوان التدوينه كان عن انه احترام حقوق الانسان يبدأ من احترام حقوق الحيوان
:)
نورتيني
و علي فكرة الاختلاف ده شيء جميل :)
تحياتي

4:51 ص  
Blogger The Alien said...

حقوق الإنسان وحقوق الحيوان متوازيان
اللي بيحافظ علي حقوق الإنسان لازم هيحافظ علي حقوق الحيوان
ومتنساش إن كلنا ف اﻷخر حيوانات :)

تحياتي

10:55 ص  
Blogger د. مونى said...

اولا احييك عل اختيارك للموضوع ، ثانيا انا من زمان وانا عندي مشكلة بخصوص الموضوع ده.... يعني كنت بحب القطط جداا لدرجة اني كنت بجيب القطط الصغيرة النضفة شوية واحميها وكمان كنت بأكلها معايا واشربها لبن... اد ايه الحيوانات دي كائنات ضعيفة محتاجة الل يهتم بيهامثقال ذرة علي طول بتتعلق بيه .
لكن لمي الله يسامحها كانت علي طول بتستغل عدم وجودي وتسربها والقطة كان واضح انها بنت ناس ونضيفة ( ال ايه بتجيب امراض) المهم اما كبرت طبعا مقدرتش اشتري قطة احسن تسربهالي!!!!!ومش هيحصل خير خااااااالص
الموضوع بجد جميل واسفة لو كان التعليق مش عل مستواه لكن ده اللي اقتكرته اما قريته وافتكرت اد ايه احنا فعلا معندناش شعور بسيط حتي بان الحيوانات دي كائنات حية بتحس وتتألم وعندها حاجات كتير مشتركه معانا لكن ممكن تقابل ناس بتتلذذ بإنها تضرب القطط بالشاللوت او تحدف الكلاب بطوبةاعجبتن مدونتك وسعدت بمرور بها وفي انتظار مرورك الكريم لمدونتي المتواضعة فانا حقا يهمني رأيك ومتابعتك
د. موني

2:51 م  
Anonymous غير معرف said...

بالظبط هو ماقلت وأتفق معك
هو حل سادي من شخص مقهور
ربما لأنه مثل الكثيرين لم يحظي باي حقوق ولا يمارس اي سلطه سوي علي بعض الحيوانات الضاله
شئ يفرغ فيه طاقات القهر

مؤلمه جدا هذه الصوره - ان يبحث الانسان عن تحقيق ذاته بقهر حيوان - ولكنها الحقيقة

4:38 م  
Blogger alzaher said...

أدعوك الى تأبين الدكتور المسيري
فقيد مصر والأمة
يوم الخميس القادم ان شاء الله
بنقابة الصحفيين المصريين
الساعة السابعة مساءا

7:30 م  
Anonymous غير معرف said...

هاني النهارده قريت حاجه عجبتني ... حسيت انها بتزن في رأسي حوالين نفس موضوعك
في دول الحريات الناس تنقض نفسها وتقارن سلوكها بالحيوانات
http://gharbeia.net/?page=2
بذائات جورج كارلن

2:03 م  
Blogger lastknight said...

انت عاوز تغيظنى يا جدع انت ؟ عاوز تحرق دمى يعنى ؟ أنت ماسمعتش عن قتيل شها ؟ الطفل اللى عنده اتناشر سنه و اتقتل عمدا من التعذيب فى الحجز و المستشفى رمته و رجعته الحجز من غير علاج ؟ ماسمعتش عن العامل اللى اترمى من شباك بيته فى الدور الرابع عشان اشتكى أمين شرطه سرقه فى مية جنيه ؟ ماسمعتش عن نجار المنصوره اللى اتقتل ضربا بالعصا قدام أمه عشان كانوا عاوزين يقبضوا على أخوه ؟ ماشفتش فيديو عماد الكبير ؟
ضفدعة أيه و نسناس أيه اللى بتتكلم عنهم يا باشمهندس
على رأى اللى قالك .. أحنا بكتريا

3:42 ص  
Blogger هشام علاء said...

عزيزى هانى

الموضوع فى جوهره ليس احترام حقوق الحيوان

و ليس دائما احترام حقوق الحيوان يوصلنا الاحترام حقوق الانسان

فهناك من يفضل صداقة الحيوان و يحترمه اكثر من الانسان

عارف المشكلة جوهرها ايه؟

المشكلة جوهرها غياب الرحمة و العطف من قلوب البشر

المشكلة غياب التراحم بين الانسان و البيئة المحيطة به بالكامل

هذه البيئة تحتوى على اشجار..طيور ..حيوانات ..حتى الجماد يشعر بنا و يتأثر...و هذه البيئة تحتوى ايضا...على بشر

فاذا غاب مفهوم الرحمة عموما ..تمثلت القسوة حولنا فى كل فعل و رد فعل نحو ما يحيط بنا مهما كان هذا المحيط

لى صديق قالى فى احدى نقاشتنا عن ما و صل اليه حال الشعب المصرى و ما بين الاراء و التحليلات للتاريخ و السياسة و غير و غيره قال لى هذا الصديق المشكلة الرئيسية فى غياب كلمتين

الرحمة و العدل


تحياتى
هش

2:21 م  
Blogger micheal said...

هاني..بجد أتمني أن أستيقظ لاجد مصر كلها بتفكر زيك
أحييك بشدة

11:03 م  
Blogger يا مراكبي said...

موضوع مثير للجدل زي ما هو باين من التعليقات كده .. الناس منقسمه ما بين حاجتين .. الإعتراف بأهمية إحترام الحيوانات .. لكن ظروف ونظام بلدنا بتخليهم يتكلموا عن إعطاء الأولوية لحقوق الإنسان الأول

والإتنين صح على فكرة لو فكرنا بموضوعية

2:51 م  
Blogger Dr. Eyad Harfoush said...

عزيزي كراكيب
قد يكون رأيي متخلفا بعض الشيء، لكنني ما زلت أرى أولوية التفكير في أطفال الشوارع قبل كلابها، في مصر أعني، أما في بلاد تجاوزت ما نحن محبوسين فيه فأهلا و سهلا بالاهتمام بكل حيوان بل و نبات

تحياتي و تقديري

11:41 م  
Blogger karakib said...

The Alien
فعلا
كلنا في الأخر مخلوقات لازم نحترم خلق الله

12:02 ص  
Blogger karakib said...

د. موني
بالعكس التعليق يحكي خبرة شخصية لكي اشكرك لأنك شاركتني بها

12:03 ص  
Blogger karakib said...

Basma
كل من يضربك علي قفاك هو واخد شلوت من واحد تاني مضروب علقة اللي ضربه الشلوت و هكذا
ده حقيقي فعلا

12:04 ص  
Blogger karakib said...

alzaher
شكرا لدعوتكم الكريمه
اعتقد انه اهم من تأبين هذا الرجل هو فهم ما كان يقول و محاولة تطبيقة بشكل سليم بدون تفسيرات تخدم اهداف معينة لفصيل او لأخر

12:06 ص  
Blogger karakib said...

basma
انت بعتي لي لينك مدونة من اشهر و انضف المدونات المصرية يا بسمة
مدونة بالفعل تستحق أن تقرأ كاملة

12:07 ص  
Blogger karakib said...

lastknight
سمعت و تألمت للغاية لكل هذة الاخبار
و لكن الحلول تكون متوازية
و ليست متوالية
يعني لازم احترم كل المخلوقات و الا مش هاحترم اي مخلوق
لما حقوق الانسان تبقي فعلا متوفرة في مصر
هتلاقي حقوق الحيوان في نفس اللحظة متوفرة
الموضوع مش منفصل .. لأ ده موضوع متصل

12:09 ص  
Blogger karakib said...

hesham
الله يكرمك يا عم هشام
الرحمة ... هي الرحمة
فعلا ده حقيقي جدا في غياب لهذا المفهوم من حياتنا
و تلاقيه برضه في الامثال من عينة
اللي يصعب عليك يفقرك
و ان قابلك الاعمي كل عشاه مش هتكون احن عليه من اللي عماه
المثل التاني ده في رأيي مصيبة سودا لأنه بيعبر عن حالة من الانتقام الغير مبرر من الضعفاء

12:11 ص  
Blogger karakib said...

micheal
اتمني مصر كلها تفكر
مش لازم زيي ... بس يفكروا
كفاية يفكروا مش لازم زي اي حد يا عم مايكل

12:12 ص  
Blogger karakib said...

يا مراكبي
يا بشمهندس الحلول تكون متوازية و ليست متوالية حتي لا نترك مشكلة تتفاقم و يصبح حلها مستحيل
و لا ايه رأيك ؟

12:13 ص  
Blogger karakib said...

Dr. Eyad Harfoush
اطفال الشوارع دي قنبلة موقوتة ستنفجر اجلا كان او عاجلا لأنه كل يوم بيزيدوا و كل يوم الناس بتغمي عينيها عنهم اكتر و تنبذهم اكتر و تؤذيهم اكتر
شيء مقلق فعلا موضوع اطفال الشوارع ده
بس برضه الحلول تكون متوازية و ليست متواليه حتي لا نترك مشكلة تتفاقم فيصبح علاجها بعد فترة مستحيل

12:15 ص  
Blogger مغرم ..ولكن said...

روبابيكا
في منطقتنا زمان كان فيه كلاب ضالة بتفزعنا ومش بتخلينا مرتاحين ولا نقدر نتاخر بالليل وكان فيه واحد اسمه شمام كان مهمته قتل الكلاب الضالة دي ولما كان بيجي كانت كل المنطقة بتكون مرتاحة
اه علي فكرة هي مش الذبابة دي روح برضه يا تري اي رايك في المبيدات الحشرية والصراصير اظنها روح برضه
ياخوفي بعدين حد يقول حق الذباب والصراصير في حياة افضل

2:19 ص  
Blogger karakib said...

مغرم ..ولكن

من الواضح انه سعادتك بتسخر من كلامي
و بتشبه الكلاب و القطط و الحيوانات الضالة عموما بالذباب
شوف معلومة لسيادتك ... المبيدات الحشرية مؤذية لنا نحن مش للذباب و الصراصير
ممكن يكون كلام بيضحكك العطف علي الحيوانات .. ممكن يثير سخريتك
لكن ده مش معناه انه اللي قلته في التدوينة خاطيء ... لأنه في المجتمعات التي تحترم حقوق الحيوان يكون الانسان ايضا له حقوق تحترم
و العكس صحيح
عموما انا لا تضايقني السخرية لأن صاحب هذا المنطق هو الخاسر دائما لأن الحوار قيمة نفتقدها في مجتمعنا .. تم تأصيل عادة تسفيه الرأي او الفكرة التي لا تعجبنا
لاحظ اني ابحث عن حقوق الانسان ايضا لو كملت قراءة المدونة .. و ده مش دفاع عن نفسي او عن رأيي دي معلومة لك انت

1:32 ص  
Blogger abderrahman said...

زي في العصور القديمة والوسطى
كانوا بيجيبوا معاهم راس القتيل او القائد في الحرب عشان المكافأة وتأكيد ودليل على شغلهم
:)

6:54 م  
Blogger Desert cat said...

اعتقد اننا لا نحترم انفسنا سيدى كى نستطيع احترام او تقبل انسان او حيوان

9:43 م  
Blogger karakib said...

Abdou Basha
ده علي كدة كان فاكر نفسه هولاكو بقي يا عبد الرحمن
ههههههههه

5:06 م  
Blogger karakib said...

Desert cat
أي شخص ليس لديه تقدير لذاته
يصعب عليه أن يحترم الأخرين
ايا كان من هم هؤلاء الأخرين

5:07 م  

إرسال تعليق

<< Home