لا تحزق ... عزيزي المدون
عزيزي المدون ... اليوم عندما مررت كعادتي اليومية علي المدونات اكتشفت ظاهرة جديدة ... الا و هي ظاهرة حزق المدونين
اولا يجب تعريف ما هو الحزق جيدا ... الحزق هو أن تحاول التبرز و امعائك فارغة ... فتنفر عروق وجهك محاولة لأخراج شيء وهمي لن يخرج ابدا ... نفس الفكرة تماما هي أن تحاول الكتابة و ليس لديك افكار جديدة او شيء لتقوله ... تكتب لمجرد أن تكتب ... أو باختصار ... انت بتحزق
الخلطة الشهيرة ( حركات المعارضة - حقوق الاقليات - حقوق الاناث - الحقوق بشكل عام - خوف البشر من
المستقبل و الحنين للماضي - بعض الامراض النفسيه - الوصم و الافكار المسبقة ) لا تكفي هذه الخلطة لأنجاح تدوينتك لأنك يجب أن تقدم بداخلها قيمة ما
المستقبل و الحنين للماضي - بعض الامراض النفسيه - الوصم و الافكار المسبقة ) لا تكفي هذه الخلطة لأنجاح تدوينتك لأنك يجب أن تقدم بداخلها قيمة مابالطبع كل ما هو بداخل القوسين هام للغاية لمجتمعنا بل و مطلوب و لكن ... يا عزيزي لا تحزق
امثلة أخري عن الحزق الذي يسمي عند اخواننا المثقفين بالكيتش ... زكية زكريا .. بانرات الحملات ... اللمبي و اشباهه
هل وضحت فكرتي ؟
لا اعرف ... لكني سأحاول توصيف الحزق التدويني بشكل ابسط في الفقرة التاليه
الحزق التدويني هو أن تتحدث عن اشياء كل المدونين يتحدثون عنها لمجرد أنهم يتحدثون عنها ... ليس لأنك علي دراية بها أو لأن لك رأيا فيها ... و لكن لأنها موضة ... عزيزي المدون رأسي ليس بمرحاضا لكي تحزق فيه
ثم انه الحزق ممكن يجيب لك بواسير ... انها نصيحتي الثانية لك ... الاولي كانت ... لا تكن قفا ... و الثانيه لاتحزق ابدا
تذكر جيدا
ارجوك لا تحزق حتي لا يترك احدهم لك هذا التعليق ... أأح
-----
-----
تحديث : برجاء عدم الربط بين النص و اشخاص معينة ... فأنا اتحدث عن اسلوب كتابة و ليس أي شخص بعينه فللجميع كامل الاحترام و التقدير و لكن من حقي ان انتقد سلوك ما او اسلوب كتابة
posted by karakib at 12:32 م
67 comments:
ههههههههههههههه
هي صحيح يمكن الظاهره منتشره اوي خصوصا في الموضوعات اللي بتبقي عامله زي ماسورة مجاري وضربت في المدونات كلها
اخر حاجه كانت نهي رشدي ، ياتري القادم هايكون ايه ؟؟
بس ماتزعلش ممكن اوي تقفل الصفحه اللي مش عاجباك ولا تقرا ولا تعلق او تشد السيفون علي اللي مايعجبكش وتخلص نفسك
ههههههههههه
" اسفه علي الاسلوب بس اهو عشان يبقي لايق علي كلام البوست "
سلام
يا ربنا ، هو انت لسه واخد بالك من الحزق دلوقتي؟ يا عم ده انا من اول ما كتبت و انا باحزق لحد ما جالي بواسير في الحنجرة ، بس و الله كان غايب عن بالي موضوع الحزق ده ، وصف جميل برضو
خمسة فضفضة
الفكرة مش نهي رشدي او غيرها
ممكن كل الناس تتكلم عن نهي رشدي بس لو كل واحد هيقدم الموضوع من وجهة نظر مختلفة تزود حاجه علي الموضوع تدي له بعد جديد لكن كله يكرر نفس الكلام شكلها غريب اوي
--
فعلا باشد السيفون كتير بس بعد ما باقرا الحزقة
ربيع
لا يا بشمهندس انت مش من الاحزاق :) لأنه لا تتوفر فيك الشروط
ههههههههههه
مش عاجبك الكلام او لاقيتة مكرر اقفل الصفحة صحيح
هوه اللي يجبر حضرتك تكمل قراية؟؟؟
وبعدين يمكن الموضوع مثلا لما اُثير ناس كتير كتبت عنه في لحظة واحدة
او كل واحد بيناقشة من وجهة نظرة
لا اتفق مع نظرة الحزق اي التدوين بلا هدف من اجل التدوين و خلاص عشان كلو كتب نكتب احنا كمان بس يعني الواحد يحب يبرر
اتخذ لأخيك سبعين عذرا
امتاً كما قالت الاخت خمسة فضفضة
لو مش عاجبك اقفل الصفحة
سلام
نعكشة
من حقك تماما انك لا تتفقي معايا
انت حرة
لكن انا قلت لو كل واحد تناولها من وجهة نظر مختلفة يبقي ما بيحزقش
و لو كان واحد شغلانته صحفي اساسا و بينقل خبر زي ما هو يبقي لا يحزق
خد بالك أن المدون بيكتب أفكاره و ما يدور فى ذهنه بشكل عفوى مستمد من واقع الأحداث الدائره حواليه
و صعب بجد أن المدون قبل ما يكتب بوست أن يدور على كل المدونات يشوف هما كاتبين فى أيه و يكتب فى حاجه تانيه أو يستوعب الموضوع اللى كل الناس كاتبه فيه و يخرج برؤيه جديده و وجهة نظر جديده
سيب الناس تكتب و تحزق و تطلع اللى فى قلبها لعل الرؤيه تتضح و الصداع يزول
عمرو
يا سيد عمرو انا احترم كل من يكتب وجهة نظره الشخصية و لكن لو قعدنا اسبوعين كلنا بنكتب نفس الكلام بالمللي يبقي ايه الجديد ؟؟ لو خلطها بخبراته الشخصية و الكتب الي قراها يبقي وجهة نظر و تضيف جديد
اما اعادة ما قاله الاخرين فده اسمه في رأيي المتواضع
حزق
ياترى ايه هى البواسير الفكرية؟
يا هاني دماغك , سيبك , والله سيبك , بلا لجنة مدونين بلا حزق بلا قفا بلا تدوين من اصله , كلمه بايخة في حد ذاتها , احلي حاجه الخباثة (;
اكتب في الخباثة , انا بصراحة مش بتابع مدونين من اصله , انا بس متابع ناس معينه ومش بوجع دماغي بالزحمة
بقرأ في الخباثة برده
D:
بعيدا عن موضوع التدوينه :)
مالك يا "هانى" انت ليه بقالك فتره عنيف شويه كده و بتكتب حاجات غريبه؟
لو التعليق ده ضايقك احذفه بدون تردد بس بجد مستغرباك أوى :)
هاني
موافقك
لكن في حاجة
خد بالك ممكن جدا يتاخد عليك موقف انك يجوز مدي لنفسك حق تقييم او ما شابه
لاحظ اني شخصيا موافقك
لكن اللي يتابع ده و يتابع المدون القفا ممكن
تعلق معاه على انك مدي لنفسك حق لتقييم المدونات او كدة يعني
ارجو ماتزعلش من الراي ده بس هو خاطر حبيت اوصلهولك
طيب ايه المقياس يا هاني اننا نفرق ما بين ما هو اعادة لكلام الاخرين و بالتالي يقال عليه حزق
و ما بين ما هو جديد؟؟
ما هو كل واحد بيكتب عن حاجة لكن باسلوبه هو او زي ما هو شايف انه عاوز يعبر على اساس ان دي مدونته هو حر يكتب فيها اللي هو عاوزة
يعني بصراحة انا شايفه ان كلامك ده ميفرقش حاجة عن الاخوة اللي كانوا عاوزين يعملوا وثيقة تدوين من كام يوم و فقعولنا المرارة
و حديك مثال تاني
انا مثلا كنت ناوية اكتب عن موضوع نهى رشدي في حكاية انها من عرب 48 لاني انا كمان لو مكنش جدي انطرد شر طرده كنت حبقى من عرب 48 و كان حيبقى جواز سفري اسرائيلي و يا ترى ده كان حياثر عليا ص
لكن بعد ما شفت اللي انت كاتبه
حصلي اجهاض و حسيت انه مافيش اي داعي لا كتابة
و ان الحكاية بعد كدا حتبقى من سبق اكل النبا زي ما بيقولوا
المدونات اتخلقت عشان كل واحد يفضفض بالكلام اللي محشور في قلبه و عقله و حابب يخرجه براة نفسه
لكن بالطريقة دي اسمح لي يا عزيزي
انت احبطت ناس كتير اوي
انا منهم
خلاص انا مش شايفة اي لازمة لاغلب الحاجات اللي كان ممكن اكتبها
او يمكن يجيي يوم و احب اعلق عليها لاني حفتكر كلامك ده و مؤكد مش ححب ان حد يعتبرني بحزق
و بناءا عليها بدل ما افكر و اطور افكاري و انشرها عشان تتصقل و تتناقش مع ناس تانية
حقفل عليها و عنها ما اتنشرت و يا دار ما دخلك شر لحسن ابص الاقي نفي في مسابقة بيزو لانيل مدون ولا حاجة
من خاف سلم برضو
تحياتي
An Egyptian
:) ههههه سؤال خبيث
Islam Attia
ما هو زي ما بنقرا في الخباثة :) لازم نعلق فالخباثة
زمان الوصل
لأ التعليق لا يضايقني خالص علي فكرة يا زمان الوصل :) بالعكس تعليقك بيبسطني دايما
علي المستوي الشخصي ما عنديش مشاكل
انما علي مستوي المدونات
فكنت كتبت تعليق علي الجايكو قلت فيه
ويل لكم يا من تصنعون الاساطير ثم تحطمونها بعدها بساعات
ويل لأكلي العجوة في كل زمان مكان
كان تعليقا علي موضوع نهر رشدي المخرجة
اللي طلعوا بيها فوووووووووق و تاني يوم عملوا لها اربع جروبات و صور متفبركة و نفس اللي شكروا فيها
شتموها
مع انه هي المفروض لا تتشكر و لا تتذم
واحدة و خدت حقها !! عادي يعني
و كأننا بنقول انه القطارات في مصر زي الفل و الدليل علي كده انه في قطر طلع الساعة 11 من القاهرة وصل بنها 12 و تلاتين دقيقة و ما حصلوش اي حاجة خالص !! لأ و اللي يفقع بقي انه الناس تقعد تكرر مقولة زيدي علي اساس انه القطارات في مصر كويسة
فهمتيني ؟؟
محمد الكومي
انا ليا حق اقيم المدونات :) بسبب موضوع زي ده !؟ في واحد يقول حزق
حززززق
و يبقي له حق يقيم أي حاجة اساسا !؟ يا راجل يا طيب و بتقول لي ما تزعلش من رأيي !!!؟ ازعل ليه يا محمد بس ؟ انت شفتني
بقي بذمتك ده شكل واحد ممكن يحطوه في لجنة تحكيم أي حاجة !؟ يا راجل انا اخري احزق تدوينة زي اللي حزقتها دي
^ H@fSS@^
يعني انا مش فاهم يا حفصة .. انت شايفة مدونتك انت خصوصا من المدونات اللي باتكلم عليها ؟؟ ده انت في ناس كتيره متضايقه منك بسبب ان اسلوبك في التفكير مختلف !! هو تدويناتك شبه الباقيين ؟؟ تاني بقي اقول من اول و جديد و خدي بالك معايا
بس قبل ما اقول لازم تعرفي اني مش جهة تقييم مدونات و لا عمري هاكون كده
و لا بادعو لتأسيس لجنة مدونين و لا وثيقة و لا أي حاجة كل ما هنا لك انا بانتقد الاستنساخ اللي بيحصل لقصة زي اللي هاقولهالك دي
كنت كتبت تعليق علي الجايكو قلت فيه
ويل لكم يا من تصنعون الاساطير ثم تحطمونها بعدها بساعات
ويل لأكلي العجوة في كل زمان مكان
كان تعليقا علي موضوع نهي رشدي المخرجة
اللي طلعوا بيها فوووووووووق و تاني يوم عملوا لها اربع جروبات و صور متفبركة و نفس اللي شكروا فيها
شتموها
مع انه هي المفروض لا تتشكر و لا تتذم
واحدة و خدت حقها !! عادي يعني
و كأننا بنقول انه القطارات في مصر زي الفل و الدليل علي كده انه في قطر طلع الساعة 11 من القاهرة وصل بنها 12 و تلاتين دقيقة و ما حصلوش اي حاجة خالص !! لأ و اللي يفقع بقي انه الناس تقعد تكرر مقولة زي دي علي اساس انه القطارات في مصر كويسة
مع انه ده تأكيد علي انه في مشكلة اننا نقول قطر وصل بعد ساعة و نص كويس !! هيييه هيييه قطر وصل يالا نقول لكل الناس انه وصل
و نزيد و نعيد في مدوناتنا انه وصل
مع انه الطبيعي جدا انه يوصل و اللي مش طبيعي انه غيره مايوصلش !! اللي مش طبيعي اننا نفرح انه في قطر واحد بس وصل !!
---
طبعا اللي سبق اكل النبق ده معناه اننا كلنا واحد و بنقول نفس الكلام و مين هيكتب اسرع
حاجة كده زي
هيييييييييه لحقت اول تعليق !! لأ طبعا اللي سبق اكل النبق في حاجات تانيه مش في التدوين
الفكرة انه لو حد حس انه في 20 مدون كتبوا نفس الكلام الاسبوع اللي فات مالوش لازمة بقي يكرره و يقعد يعيد و يزيد فيه لأن ده له اثار سلبية علي الناس .. يفكر بقي و يخلط شوية من معرفته بخبرته الشخصية و يكتب زي ما كنتي بتقولي علي موضوع عرب 48 ده
حابب اقراه عندك و مهتم بده لأنه دي كده حاجة جديدة واحدة عدد كبير من المدونين يعرفوها و شافوها شخصيا بتقول طيب ما انا كمان كان ممكن اكون من عرب 48 كان ساعتها التحرش بيا هيبقي حاجة حلوة !؟ ده مضمون جديد و في منتهي القوة و الجرأة
--------
--------
اما عن مسابقة بيزو لأفضل مدون لصاحبها و مؤسسها بيسو ابليس فانت عارفه قد ايه الجايزة دي مهمه و حلوة و مينفعش اي حد ياخدها :)) بيزو دي كانت من اجمل اختراعات بيسو
محدش هيترشح لها الا اذا كان يستاهلها
هههههههههه
دي عايزة كفاءات خاصة يا بنتي
-------
يومك سعيد يا حفصة يا جميلة
وهو كذالك
مش عارفه يا هانى بدون زعل بحس ليه اللى بيسيب كل حاجه فى الدنيا وقاعد يتكلم فى اللى الناس بتكتبه مش بيكون لاقى موضوع يتكلم فيه ونفسه يكتب حاجه ومش عارف
علشان كدا بيخرج نفسه الوحيد اللى عبقرى وفاهم كل حاجه علشان كدا قاعد يقول ده بيكتب كويس وده وحش
بالرغم من ان المفكر او المثقف مهما وصلت بيه اقصى درجات الثقافة والمعرفه بيحس انه ما زال محتاج يقرا اكتر واكتر ليزود ثقافته ومعرفته
الشخص اللى بيملك فكر كويس وعقل كويس دائما يترك الآخرون يقولون ما يشاؤا وهو ايضا يقول ما يشاء دون الانقاص من قدر احد ولا الزيادة
ده صاحب الفكر اللى بجد
تحياتى لحضرتك
يا باشا انا عارف و الله
و بعدين مانت زي الفل و تحكم كاس العالم للتدوين و الاولمبياد التدويني كمان
بس و حياتك هي حاجة جت في بالي و انقلتلي برضه من حد قبل كدة فحبيت انقلهالك يا بوب
و بعدين انا عارف انك مش هتزعل بس انت فاهم بقى اتيكيت الكتابة و الاختلاف في الراي لا يفسد للوز جناح ولا منقار و كدة يعني
قشطة يا عم
سلامووووووووووووووووووووووووووز
بالمووووووووووووووووووووووووووز
Desert cat
شكرا للنصيحة الغالية
بس انا مش مثقف و لا عبقري و لا اي حاجة و لا ادعي ذلك يا فندم
و لو عايزة تقولي لي تدوينتك نفسها حزقة او المدونة بتاعتك كلها كده هاكون شاكر جدا لأنه ده رأيك و قلتيه بصراحة
محمد الكومي
يا محمد علشان نكون واضحين
انا لا استطيع و لا ارقي اني اكون محكم لأي حاجة نهائي
كل ما في الموضوع اني شرحت القصة لحفصة و لزمان الوصل في ردي علي تعليقاتهم
---
علي فكرة مش هازعل فعلا لو اعتبرت تدوينتي دي او مدونتي كلها حزقة كبيرة
بالعكس يا استاذ
عادي جدا انه يكون هو ده رأيك
ياترى سامعني وأنا بأصقف لك من هنا؟
بجد برافوا .. أنا سعيد إنك بتواجه الناس بصراحة كده أو زي ما بيقولوا ""وش" كده على طول
فعلا مدونين كتير ""بيحزقوا" وكأنهم مغصوبين إنهم ينشروا بوست وخلاص .. مع إن ماحدش هيضربهم لو إتأخروا شوية .. عايزين كواليتي مش كوانتيتي
بأحييك بجد
انا تعبت و الله من كتر ما بعمل السيفون :))
الموضوع ده على فكره خانقنى اوى
على الرغم من انى متعود قرايه فى الخباثة
زى اسلام عطية
ايه يا وحش ده ؟
هى وصلت لمدونين يحزقون !!
شفت بقى كنت عايزنى اكتب و خلاص ..
بس بينى و بينك
زمان الوصل ليها حق
انت بقالك فترة عنيف
--
بس انا مش بحب لفظ حزق لأنه مرادف للخرى
افضل لفظ
طرطرة فكرية
كل الناس لازم تتطرطر
فاكر بوست العلمانية اللى أنا كتبته
--
هو في ناس بتعتبر المدونه وجود موازي ومساوي لها شخصيا!!
بمعني انا ادون اذا انا موجود..
ودي حيله نفسيه عبيطه جدا زي استجداء الزوار والتعليقات المجامله وغيره
نصيحتك انا مش شايفه انه اهانه لاي حد بالعكس دي ناعمه وقويه وكلها حنيه:P
انا شفتها بمعني
عزيزي المدون ما تهريش روحك وتعصر ذهنك انك لازم تتواجد وتكتب
عندك حاجه تقولها قول مفيش استني شويه
بدل ما تجتر
كل الناس كتبت عن نهي
والبعض اتقمص دور الصحفي{ مش بحب كده} وجري ينزل الفيديو والحوارات بس اني شفت لقاءات البنت في مدونات مرفوعه علي اليوتيوب
يعني انا شخصيا استفدت:))
خلي بالك من حاجه تانيه الناس كل ما بتقدم في التدوين بتهدا
الجداد بس اللي كده بيحزقوا
:))
غالبا اه كنت بقول كل الناس كتبت عن نهي وانا كمان
لكن الحمد لله الكل اشاد بوجهة النظر اللي بصيت منها سواء بوست مش كلنا نهي او الانسه ضحية وكانت انفعال او رد فعل علي بوست شقير يعني الكتابه مش لمجرد الكتابه( انا بدافع عن نفسي ليه؟)
:))الريدر في اختراع عبقري اسمه مارك از ريد
رغم اني مش بستعمله ودايما بدي فرصه للي بقرالهم انه يكون في
point of view
في اخر البوست
عموما اعتقد ان ثقافه الزحام طالت برضه عالم التدوين
تحياتي... والله ينور
تابعت التعليقات اللي اشرت ليها يا هاني و فهمت قصدك تمام
بس ماتنساش ان كلامي فيه سنة هزار و تهريج في الكومنت التاني تحديدا
و طبعا ولا شايف المدونة حزقة ولا التدوينة
هيبس فيها حتة حبيت اوضحها و مش معنى كدة ان انا صح او العكس
هو نوع من تبادل الاراء يا برنس
يمكن علشان ما بلفش مدونات كتير ما حستش بظاهرة الحزق دي في موضوع نهى رشدي ، لكن حسيت بيها اوي في نقطتين ، حسيت بيها في ظاهرة البنارات اللي انتشرت فترة كده بطريقة مستفزة اوي اوي ،وبحس فيها برده في موضوع الأمراض النفسية ،
بوست جريء على فكرة وكويس
معاك حق يا هاني..انا بصراحة عن نفسي عاوز ابطل حزق عشان صحتي
:)
تحياتي
انا مش شايف إن فيه حزق .. انا شايف إن فيه إسهال
عايزين أنتوسيد
يا مراكبي
انا سعيد للغاية انه رأيي في بعض التدوينات عجبك يا بشمهندس احمد لأنه فعلا كتير باقرا حاجات باحس انه اللي كتبها متغصب يعني ما عندوش فكرة جديدة او حتي اسلوب كتابه بيعرضه
مجرد كلام و بس
كان هدفي من النقد اني اكون صريح فعلا
اما موضوع كواليتي نوت كوانتيتي فده مطلوب فكل حاجة من حولنا .. كل حاجة فعلا
FATMA
طيب لو السيفون باظ بقي اعمل ايه
qwert anime
ما هو زي ما باقول لك زي ما بنقرا كلام كتير في الخباثة و ما بنعلقش
لازم مرة من المرات ننشر تعليق كبير عام في شكل تدوينة اعتراضا علي هذة النوعية من التدوينات
عباس العبد
بالعكس يا رامز ماكنتش عايزك تكتب و خلاص بس كان يهمني انك تكمل
مع انه اخر بوست عندك مش مفهوم نهائي و لازم توضح اكتر قصدك ايه
--
ايه موضوع العنف ده بقي؟ مش فاهم برضه عنيف ليه
مش معترض احتمال اكون كده و مش واخد بالي ... بس ليه ؟؟
---
فاكر بوست العلمانية بتاعك :) ههه بس ما هي الطرطره برضه مرادف لحاجات تانيه مقرفة :)
بنت القمر
هو ده بقي استجداء الزوار و التعليقات .. دي نقطة بتتعبني اوي اوي فعلا لأنه مش معيار التدوينه الناجحه التعليقات
اكبر دليل علي كده مدونة العشب
واحدة بتكتب بمزاج و روقان و بافكار في منتهي القوة و الذكاء و قافلة التعليقات اساسا ... لما سألتها قافلة التعليقات ليه
قالت ما اعرفش بس بيتهيألي اني مش هاعرف اكمل كتابه لو سبت التعليقات مفتوحه .. هي من الاردن و كنت قابلتها في المؤتمر بتاع الايدز
---
الحمدلله انه في حد شافها لطيفة و ناعمة مش عنيفة
لأنها كانت في الاول اطول من كده و قعدتن اقصر فيها و اقلل من حدتها لأني لا احب العنف في الكتابة بس مع ذلك عباس العبد و زمان الوصل قالوا لي انت بقيت بتكتب بعنف مش عارف ليه و اتمني منهم يوضحوا لي رأيهم
----
فكرة المدون القديم
و المدون الجديد انا مش متفق معاكي فيها
لأنه في مدون جديد افضل من مدون قديم بكتير أوي ... الفكرة مش بعدد السنين او الشهور علي يمين او شمال المدونه
الفكرة في المكتوب ... حلو و لا لأ
بيقدم لي جديد و لا لأ
اما عن فكرة المدونين القدامي و الهة الانترنت علي رأي واحد صديقي و هو مدون برضه فأنا لا اعترف بأي فترة زمنية ... في واحد بدأ اول امبارح احسن من واحد بدأ من 3 سنين بكتير
-----
ثقافة الزحام طبعا طالت كل شيء في حياتنا حتي التدوين .. و يمكن ده محتاج تفصيل شوية و كتابة بعض التدوينات عنه لأنه مهم اوي ما يبقاش تأثيره قوي علي الناس زي ما بيحصل في الشارع و في المواصلات و في كل مكان
محمد الكومي
يا فندم انا اشكرك لصراحتك الشديدة في انك تقول لي الكلام ده
و ارجو اني اكون وضحت وجهة نظري تماما
و مرة اخري
انا لا انتقد اشخاص بعينها انا انتقد تدوينات .. فللجميع وافر الاحترام و التقدير
محمود محمد حسن
ما هو انت لو خدت لفة كل اسبوع مرتين بس هاتفهم قصدي كويس اوي
متشكر لثنائك علي التدوينة و اتمني دايما مرورك
micheal
بس انت يا مايكل لا تتوفر في مدونتك مقومات الحزق :) نهائي يعني
بالعكس يا استاذ
Ahmed Shokeir
:) طيب ده نجيبه من فين ؟ مفيش صيدلي يكون مدون و يعرف يجيب لنا انتوسيد تدويني ؟
هههههههه ... قشطة اوي ... انا تقريبا كدة وصلتني الفكرة ... :))
انت ممكن تنمي الفكرة و تعمل لك جروب على الفيس بوك .... لا تحزق ....
اول زيارة .. انشاء الله تتكرر
تحياتي
ههههههههههههههههههه
لا والله يا هانى مش ده قصدى خالص
شكلك فهمتنى غلط
يا هانى انا كلامى كان بوجه عام
ساعات بلاقى ناس اصلا بتكتب اى كلام
وبتعمل اى حاجه اهو اسمها بتكتب وخلاص وبياسيروا الموجه .. هما حرين بقى فى اللى بيقولوه هما مش فاتحين مدونة علشان نعين نفسنا عليهم رقباء .. لكن اللى ممكن يخليك مش قادر تبطل ضحك انك تلاقيه قاعد ينقض اللى المدونين بيكتبوه .. طيب انت فين اكشتافاتك المذهله اللى غيرت العالم وتدويناتك اللى خلت مصر فى مقدمة الدول وابحاثك العلمية اللى بتنشرها لمحو امية المدونين اللى يععععع بتنتقضهم .. تلاقيه عامل نفسه مش من هنا او جه هنا غلط لما تقوله كدا .. القصد من كلامى ايه بقى .. إن المدونة دى المفروض انها بتعبر عن رأى صاحبها .. يعنى يكتب شعر يعمل فيها وصفات اكل هو حر بقى يعمل اللى يعمله محدش عين حد رقيب عليه ولا المفروض قبل ما يكتب موضوع يروح ياخد الاذن ؟؟؟ يعنى انت قاعد فى بيتك عايز تشرب قهوة دلوقتى عايز تخرج عايز تنام انت حر مش يبقى انا جارتك وافرض عليك تعمل ايه او اقولك ييييع اساس بيتك وحش .. والله عاجبك اتفضل مش عاجبك فى حاجه اسمها خروج بضغط عليها وامشى انت مش فيثاغورث مثلا ولا اينشتاين .. الغريب كمان ان المدونين المحترمين واصحاب الفكر والرأى اللى بجد عمرهم ما عملوا حاجه زى كدا .. وده مش فى التدوين بس ده بيحصل فى مجالات تانية وعلشان ااكد لك تانى كلامى مش موجه ليك بشكل شخصى والله انا كلامى بشكل عااام ينطبق على اللى بيحصل فى التدوين وينطبق على اللى بنشوفه فى الحياة عموما
مودتى واحترامى
انا بطلت احزق من فتره ليس تغييرا فى المعتقدات لكن خوفا على صحتى
تحياتى
هاني
:)
كنت هأعلق بأن الحزق الكتير بيعمل بواسير ... لكن لقيت الموضوع تم طرحة
قريت مره لذكي نجيب محمود أن الانسان كلما علا صخبة كان علامة علي فراغة الداخلي
وانت جبت من النهاية
بأحييك
بسمه
بسمة
اعتقد هي نفس معنى الجملة دي بس بصراحة معرفش اذا كان زكي نجيب محمود هو اللي قالها
و ان كان منكرهاش عليه لانه صاحب جمل فلسفية عبقرية كتيرة اوي
"
كلما ازدادت الفكرة هشاشة
كلما ازداد إرهاب أصحابها، في الدفاع عنها
"
تحياتي
انا معاك مائة بالمائة فى ظاهرة الحزق
بس برضه فيه ظاهرة تانية وهى ظاهرة عبلة كامل
معرفش ليه بحس انه فيه عدد لا بأس به من اصحاب المدونات متقمصات شخصية عبلة كامل وأسلوبها فى الحوار والمجادلة؟ يمكن لأن عبلة كامل اكتر ممثلة بتعكس الشخصية المصرية الفطرية؟ يمكن
كلمة فى تدوينتك انتبهت لها وهى كلمة مدونة ناجحة او انجاح المدونة
اعتقد انه من الصعب جدا الحكم على مدونة بانها ناجحة أو نصف ناجحة من عدمه، فما هو معيار النجاح؟ بالتأكيد ـ من وجهة نظرى ـ ليس بعدد الزوار او التعليقات ، ولا أن تكون الموضوعات المطروحة تتحدث عن "كلام كبير" ولا بمدى ابهار الصورة والالوان الخ
بل حتى لا اعتقد ان كلمة نجاح هى الصفة الهامة فى المدونة، ولكنى أميل الى كلمة تميز اكثر من كلمة نجاح لأن قيمة كل مدونة بمدى تميزها واختلافها او تناولها جانب لا تتناوله مدونات أخرى وبأسلوب مختلف عن المعتاد حتى ولو لم يتعد قراءها او تعليقاتهم ثلاثة او اربعة تعليقات
يعنى مجرد رأى
... amr
اتمني ان تتكرر
شرفتني
Desert cat
يا عزيزتي حتي و لو كان النقد موجه ليا ده يبقي شيء رائع لأنه النقد شيء جيد للغاية ما دام موضوعي و لا يمس الاشخاص و لكن الافكار
فكرة انه الناس تتدخل فيما يفعله الاخرين انا مش معاها
لكن اني ما اقولش رأيي و اني حتي ما اعلقش و اقول وجهة نظري فيما يحدث من حولي ده يبقي غلط مني
هو ده كان قصدي
:)) نورتيني و صدقيني ما بزعلش من أي نقد بالعكس ده شيء جميل جدا انه حد يكون مهتم بانه ينقد تدوينتي
ahmEd_H
يا باشا انت مش من الاحزاق
بسمة
في اختبار نفسي شهير عن الاله الموسيقية المفضلة
و منها بيتم تحليل الشخصية علي اساس الالة
^ H@fSS@^
أه يا حفصة انت ممكن تتكلمي عن الموضوع ده براحتك :)) هههه
blackcairorose
متفق معاكي تماما في انه نجاح المدونة لا يخضع لكل هذة الاشياء التي ذكرتيها
لكن نجاح التدوينة اني اقدر اوصل الفكرة اللي انا عايز اقولها (ده لو في فكرة) او حتي الاحساس او الاستنتاج اللي وصلت له ... لمن يقرأها
مايهمش قد ايه قرأها و لا قد ايه هي كلامها كبير
لكن الاهم انها تكون فيها فكرة او معني و بيوصل لمن يقرأه
حتي لو اللي هيقراه واحد بس
فاهمة قصدي اكيد
هاى
ايه الصورة اللى ما يعلم بيها الا ربنا دى ؟؟
طبعا من حقك تقيم , لأنك متلقى برده زى ما أنت منتج
تصدق أن أنا لسه عاملة بوست عشان مر شهر على مدونتى , كاتبة فيه انطباعاتى عن التدوين و المدونات , بس اللى مضايقنى فعلا نقدر نقول الاسهال التدوينى , تلاقى المدونة الواحدة ينزل عليها اتنين بوست فى اليوم مالحقش , أقرأ حاجة فى يوم و أعلق عليها اللى وراه مثلا .( ايه مصطلحات المسالك البولية اللى طالعة علينا دى ؟ )
ما علينا تحياتى ليك يا باشا
شفيـــتم
أزال المؤلف هذا التعليق.
هى دى اكبر مشاكل التدوين الموجودة حاليا و هى التدوين من اجل التدوين..مش التدوين من اجل التعبير عن فكرة او حتى التعبير عن النفس و بالتالى اصبح التدوين غاية فى حد ذاته و ليس و سيلة
عزيزى المدون
ليه تحزق اكتر...لما ممكن تجزق اقل
سارة نجاتى
قريت البوست بتاعك :) اما عن المصطلحات فهي بالفعل مقصوده
غير معرف
عفيتم
hesham
بالظبط يا هشام اصبح غاية و ليس وسيلة
للأسف
والله ممكن نكلم علاء أو أي حد بيجمع المدونات إنه يعمل تصنيف جديد إسمه "حزقة" لمحاولة القضاء على هذه "الرياح" حتى و إن كان من باب الحرص على الذوق العام !!
Geddo Iskandar
فعلا ممكن نبقي نكلم علاء في الموضوع ده
ههههههههههه
ههههههههه
انا جيت متأخر بس الموضوع لذيذ وان كان لي بعض التحفظات
ساعات بيبقى التدوين وسيلة لتثقيف الذات
يعنى مثلا موضوع نهى رشدى الى ذكر ده
انا كنت بتابع تطورات الموضوع وبكتب اللى فهمته وبكتب رأئى ممكن ده يعتبر نوع من انواع الحزق
حاجة مثلا زى كلنا ليلى
انا ما كنتش حابب الموضوع لكن ادليت بدلوى فيه بقصص ومقالات وتهييسات وده يعتبر نوع من انواع الحذق لان كل الناس كاتبة فيه
وناس كتير كتبت فيه حاجات عجبتنى وحاجات لأ
وشوفت عندك موضوع اسمه السيجارة المنتصبة او حاجة زى كدة وعجبنى اوى
وهكذا
اذن الحزق شئ اساسى فى حياة كل انسان
لان مش المفروض الانسان يشوف الناس كاتبة فى ايه قبل ما يكتب او انه لازم يقدم الجديد .. لان المدونة دى مش جرنان او مجلة
لأ
المدونة دى بتعبر عن صاحبها يكتب كلام جاد كلام هبل تهييس حزق مش مطالب انه يكتب معلومات قيمة ومفيدة ودقيقة وعلمية
ورغم اختلافى شوية مع وجهة نظرك لكن مفيش شك كلامك بيفيدنى وبيفتح عنيا على حاجات ممكن ما اكونش شايفها
تحياتى
Ahmed Al-Sabbagh
بص يا احمد انا عارف مدونتك ماشية ازاي و عارف انك فعلا واخدها وسيلة لتثقيف نفسك زي ما بتقول ... وده شيء اكتر من رائع .. كمان انت ناجح في ده بشكل كبير يعني تدويناتك اول ما بدأت ليست هي هي الأن في تطور حلو اوي
علشان كده ده رأيك في التدوين و هو فعلا رأيك بصدق اللي قلته في التعليق
لكن اختلف معك أنه الحزق مش شيء اساسي رغم اتفاقي ان المدونة ليست جريدة او مجلة لأن لازم الواحد يشوف الناس قالت ايه عن الموضوع ده قبل ما يبتدي يكتب عنه علشان يكون فكرة عنه الا لو كان هو اللي شافه مثلا و بيغطيه تغطية شبه صحفية ... لأن لو كل المدونين كتبوا نفس الكلام يبقي ايه الجديد ... ازاي ممكن نستفيد من بعض و نشوف وجهات نظر مختلفة ؟ اتمني اكون وضحت وجهة نظري ليك و اتمني دوام مرورك
أزال المؤلف هذا التعليق.
مش معنى أن " ساعات بيبقى التدوين وسيلة لتثقيف الذات" .. أن أنا "واخدها" وسيلة لتثقيف نفسى!!
أنا كلامى معناه ان ممكن يكون أحد فوائد التدوين هو ثقيف الذات عن طريق متابعة الاحداث والكتابة عنها برؤية شخصية .. وذلك من ضمن فوائد عديدة أخرى مثل التشجيع على ممارسة الكتابة ، وأكتشاف نقاط خلاقة جديدة فى شخصية المدوّن ربما لا تظهر فى أوساط أخرى ، التواصل مع أشخاص متشاركون فى نفس الإهتمامات الخ
ورغم احترامى لرأيك..لكننى أعتقد أن الشخص الذى يمتلك مدونة لا يجب عليه أن يقرأ ما كتبه "معشر المدونون" قبل أن يبدأ فى كتابة خواطرة عن الموضوع.. هذا يختلف عن مفهومى عن التدوين الحر
قد يقوم الشاعر أو الكاتب الناشر أو الصحفى المحترف بذلك لكن المدون .. لا اظن
شكرا لرأيك فى تدويناتى .. وايضا الكثير من تدويناتك أكثر من رائعة
تحياتى لك
سلام
http://alwaandykes.blogspot.com/
إرسال تعليق
<< Home