عباسية... عباس العقاد... عبدالباسط حمودة

أركب الميكروباص من دوران شبرا ... ذاهبا الي ميدان الساعة ... المشوار بياخد حوالي عشرين دقيقه لنصف ساعة ... أسلح نفسي بالام بي ثري دائما ... أعلم جيدا هذة الأغاني التي يطرب لها هؤلاء و التي تصلح كملين للبطن مع أهتزازات الميكروباص و الأصوات التي تعذب أذني بلا رحمة
نزلت مبكرا عن موعدي بساعة لكي أخذ مكان جيدا في الميكروباص قدام بجانب السائق ... و لما أكتمل العدد وضعت يدي في جيب الجاكيت ... و أذ بي أفوجيء بالكارثه ... لقد نسيت الام بي ثري ... و بات من الواضح أنني سأستمع مرغما لأغنية جديدة تضاف الي رصيدي القديم من الأغنيات اللوذعية
و يصدح صوت الكروان ... ياللي صاحبت الخسيس (أقول لنفسي يا سلام شكله موال و حكم ) ... و فتحت له بيتك ... ازاي تأمن لشيطان و تدخله بيتك
و بحسن نية ليه ... ليه ليه ليه دخلته في حياتك ... (يبدو هنا أن جرعة الملين تزداد ) عامل حبيبك ... عامل حبيبك أأأأأأأأه
و هو عينيه علي مراتك !!!!!!!! أه أه أه علي مراتك
يا خبر أبيض أيه ده جريمة قتل هتحصل فى الأغنية يا جدعان
و مرة واحدة مع لفة دركسيون شديدة من السائق الذي يظهر علي وجهه امارات الغضب تفاعلا مع الأغنية
تهتز النظارة علي وجهي
تأخذ المزيكا أن كان يجوز أن نسميها بالمزيكا منحني اخر ... منحني سعيد و فرحة و تسقيف ... و يقول لها
قولي لي يا خاينه ... ليه الشيطان وزك ؟؟ و بكدبه أكل عقلك بكلمتين

ده انت شمتان فيها بقي يا عم المطرب
سلمتي ليه نفسك هتقولي مظلومه من الحب محرومه ... ستات كتير زيك .. ما بيعملوش زيك

هيضربها بالقلم دلوقتي المفروض بقي زي الافلام العربي
يا زوجة حالها يغم ... نسيتي أنك أم ... لا مش ندم يا جميل
دول دمعتين تمثيل !!! دي حكايه مالها مثيل هاقولها بالتفصيل

يا دي الفضيحة .. تفصيل ايه بقي ما ينفعش خالص يا هندزة
دي قصة فيها موضوع بطلها زوج مخدوع ... تملي صاحبه معاه .. يروح و ييجي وياه
صاحبنا راح و يا ريت ما كانش دخل البيت ...لاحظ أن كل ده المزيكا ممكن ترقص معاها
الزوجة جات يا لطيف و لابسه لبس خفيف
الدنيا حر عادي يعني

و جات و جايبة الشاي و رحبت بالضيف
يا سلاااام هي دي الاخلاق برضه أكيد ظلمها

بجمالها بقي مفتون .. كلمها فى التليفون
فضل صاحبنا يقول كلام جميل معسول
من كتر زنه عليها الحلوه جت رجليها
علشان بتحب المال ... بسرعة قلبها مال

عاشت معاه فى الدور ... و وقعوا فى المحظور

لم يحدد التفاصيل جيدا و لم يذكر عاشت معاه في أنهي دور بالظبط
و سلمت له قوام ... دول يا ناس شياطين في شكل بني أدمين
عايشين حرام في حرام
و جوزها يا ولداه عايش في توهه و بس طول النهار شقيان علشان يجيب المال ... ما هو عنده ست عيال

الدمعة هاتفر من عيني خلاص مش قادر

يا سلام يا مدام سحر
يا عيني عالانسان مافيهش الا لسان ... الله يجازيك يا شيطان

المخلصين قلوا و الغدارين هلوا
صاحب و زوجة يا ناس ما يعرفوش اخلاص يا رب يا ساتر أصل الشيطان شاطر
باحلف بربي يا خاينة ... (وهنا تزداد الطبول و المزيكا و لازم تسقف معاها ) ما أبكيش خلاص
مالكيش خلاص مالكيش خلاص دييييييااااااااااااااااااااااااااااااااا

يقصد بالدياااااا (الدية) و هو ما يدفع لرد الشخص الذي أختطف عنوة

يعني غصب و أقتدار علي رأي عمنا اللمبي

و هنا كان لازم أنزل لأنه الدم هيطرطش فى الميكروباص فأخدت بعضي و هربت

حقيقي الدنيا دي حياة .. الانسان فيها بني أدم ... لو مات بيتوفي ... حقيقي يا عم عبباسط