بوب مرعي ..مجلة ثقافية ... ميريت أصفر ... بوستر فيه قلوب بتلمع

زمان لما كان عندي 10 سنين كنت مشترك في أتوبيس المدرسة ... أيامها كان بيقعد جنبي واحد أكبر مني و كنا بنتخانق كتير لأنه كان عايز يقعد جنب الشباك و لما مشرف الاتوبيس حل الموضوع و قال لنا كل واحد يقعد يوم ... بطلنا خناقات و بقينا أصحاب شوية شوية
و في مرة لقيته قاعد بيتفرج علي مجلة ثقافية و هو مستخبي و خايف ... سألته أيه ده .. قال لي أوعي تقول لأي بني أدم علي المجلة دي و خباها ... و بعد بعض الالحاح و بعض التهديد رضي يخليني أشوفها .. ما كنتش فاهم حاجة ... و لما بدأ يشرح وقفت كلامه و سألته .. يعني أنت عايز تقول لي أننا كلنا جينا للدنيا بالطريقة دي ؟؟ ضحك و قال لي أه .. فرديت عليه بس أنا أبويا راجل محترم استحاله يعمل اللي أنت بتقول عليه ده .. و كانت أجابته بقدر ما هي صادمة الا أنها مقنعة ... في صورة أسئلة ... أنت مش أبوك راجل محترم !؟ قلت له أه طبعا
راح سألني تاني .. مش بيخش الحمام زي باقي الناس .. و هنا صمت و بدأت في قبول.. علي مضض ... أول حقائق هذا الكون الصادمة في هذا السن

-------------------------------

لما بقي عندي 12 سنة كان في مدرس دين كنت باكرهه بدون سبب واحد واضح .. يمكن علشان كان بيشتم و هو

مدرس دين ... يمكن علشان كان دائما مكشر ... و في مرة فتح شنطته قدامي و لقيت علبة سجاير ميريت أصفر جواها .. و حسيت أنها فرصتي أضايقه شويه ... و من يومها أول كل حصة دين و هو داخل أرفع أيدي
يقول لي في أيه ... أسأله هو السجاير حرام و لا حلال ... يقعد يقول و يطول في الشرح طبعا حرام و ده شيء مضر جدا بالصحة الخ الخ ... المهم في مرة واحد صاحبي كان عرف الموضوع مني .. رفع هو أيده في أول الحصة و سأله ... يا أستاذ هي السجاير حرام و لا حلال ... رحت رادد عليه بصوت عالي " الميريت الأصفر حلال حلال حلال"
طردنا أحنا الاتنين من الفصل و لما أبويا راح المدرسة قابله الاستاذ و قال له أني مش متربي كويس .. تقريبا الميريت الاصفر كانت حرام و لا ايه مش عارف

-------------------------------

لما كان عندي 13 سنة أشتريت بوستر فيه حروف الابجدية الانجليزية علي شكل قلوب حمرا بتلمع .. و كان عندنا سرير بدورين أنا كان مكاني في اللي تحت ... لزقت كل حروف البوستر في خشب السقف اللي هي الواح السرير اللي فوقي .. و قعدت اسأل يا تري اللي هاحبها بجد هيبقي أول حرف من أسمها أيه في كل الحروف دي ... و كنت باقول لنفسي أكيد واحد من القلوب دي بيلمع أكتر من الباقيين و أقعد أدور علي أكتر واحد بيلمع
و مع أول قصة حب فشلت بصيت علي القلب اللي فيه أول حرف من أسمها و قلت أنه أكيد مش هيتكرر و أقنعت نفسي أنه مش بيلمع خالص .. لكن الحرف اتكرر بعدها ييجي بعشر سنين .. لكن ما بقاش في سرير بدورين و لا أي قلب عليه حروف خلاص .. و لما بابص فى السقف مش باشوف غير وزرة غريبة أشتروها و انا باجدد الأوضة من غير ما يقولوا لي ... فيها زرعه شبه ورد النيل .. حد يحط ورد النيل في سقف أوضته و يبقي عايز يحب !! ده كلام !؟

---------------------------

و لما بقي عندي 24 سنة .. شوفت أول واحدة حبيتها ماشية فى الشارع و أنا راكب الميكروباص و واقف في أشارة ... و قاعد باسمع بوب مارلي .. نو وومان نو كراي ... ما عرفتهاش فى الأول .. بس بعد شوية ميزت ملامحها خصوصا بعد ما قلعت نضارة الشمس اللي شبه برابريز الهيونداي .. شوفت عينيها اللي كتبت فيهم أشعار زمان
يا خبر أبيض !! طلعوا وحشين أوي !! صحيح مراية الحب عامية تخلي الكوسة بامية
الله يرحمك يا عم بوب ... أي ريممبر وين وي يوز تو سيت ... و أستغرقت في أفكاري بعدها يا تري لو كانت وافقت نرتبط زمان و كنت ماشي معاها دلوقتي فى الشارع و عدي شاب بيسمع بوب مارلي و راكب ميكروباص كان قال عليا أيه ... و توصلت لأنه أكيد كان هيقول عليا .. نفسي (بكسر النون) حلوة ...ده غير أني كيس قطن ... أبو جنيه و نص ده
نو ومان نو كراي ... نو ... ومان ... نو ... كراي ... ... جود فريندز وي هاف ... أور جود فريندز وي لوست الونج ذا واي ... نو ... وومان ... نو ... كراي
الله يرحمك يا عم بوب مرعي