بين الحال و الحال
ما بين كل حال و حال
فيه الف الف احتمال
يا طريق يا طويل
يا أغرب موال
قلبي الصغير عليل
و الفرح صبح محال
و يسألوني عن الحال
أرد و أقول عال العال
ما هو الحزن مهما طال مسيره الزوال
و الحزن كله جلال
و الفرح أبو الدلال
طال السهاد و البعاد
فيه الف الف احتمال
يا طريق يا طويل
يا أغرب موال
قلبي الصغير عليل
و الفرح صبح محال
و يسألوني عن الحال
أرد و أقول عال العال
ما هو الحزن مهما طال مسيره الزوال
و الحزن كله جلال
و الفرح أبو الدلال
طال السهاد و البعاد
يا مصر يا أم العباد
يا غرقانه في سواد
مافيش أجابات لأي سؤال
مافيش أجابات لأي سؤال
أصله الحال ما بقاش الحال
و ما عادش فيها أحتمال
ارجع و أقول ده موال
و أغرب موال
و مابين كل حال و حال
الف الف أحتمال
و الحال هيتبدل و يتغير
و الحلم راح يتحقق ... يتفسر
و ما عادش فيها أحتمال
ارجع و أقول ده موال
و أغرب موال
و مابين كل حال و حال
الف الف أحتمال
و الحال هيتبدل و يتغير
و الحلم راح يتحقق ... يتفسر
و الخوف يتفتفت يتكسر
ماهو بين الحال و الحال الف الف احتمال
ماهو بين الحال و الحال الف الف احتمال
يمكن بكره جايب معاه راحة البال
و أجابات للكام مليون سؤال
.............................................................................................
......................................................................
......................................................................
هاني جورج
posted by karakib at 2:43 م
36 comments:
بصراحه موش باقدر أتحكم في دموعي لما اقرا شعر عن مصر أو أسمع أغنيه وطنيه بتتكلم عن مصر
فعلا قصيده أكتر من رائعه
اشكرك على زيارتك لمدونة الدكتور علاء الاسوانى
وهى مدونتة بالفعل وشاملة لكل كتاباتة وحواراته وما الى ذلك
ولكن لى انا نيفين عمر شرف ادارتها ووضع الإدراجات فيها باالاتفاق مع الدكتور علاء
اشكرك مرة اخرى وتحياتى لك
بصراحة انت بتعجبنى كل مرة عن الى قبليها ربنا بجد يوفقك وتسعدنا عالطول بكلامك الجميل دا
روعه يا هاني ما كتبت عن مصر...سعدت بلقائك في لقاء المدونيين لاني فعلا منت واثق من مقابله شخصيه مثقفه محترمه
تحياتي لك
مفيش محال!!!!ضحكوا علينا و قالولنا كده
لا فيه مستحيل
تحياتي
هانى انا اول مرة ادخل عندك العنوان ماكنش شددنى قلت روبابيكيا اكتر من اللى احنا عايشبن فيها
لكن الصراحة البوست ده جميل وجميل جداومش ممكن اللى يقول الكلام الا ولازم يكون عنده احساس راقى فى كل حاجة وتذوقه الفنى يرقى لكا مستويات الفنون
عزيزى هانى امل ان تدوم الصداقة وتتوطد بغض النظر عن البلوجات او خلافة انا فى دماغى فكرة بسيطة ومش معنى الكلام ده الانفصال عن البلوجرز ولقائتهم ابدا انا قصدى يكون يكون لينا اتصالات من خلال الشاتنج وكمان اللقاء فى غير مواعيد اللقاء الشهرية زى مثلا الحفلة الموسيقية اللى فى الساقية يوم الثلاثاء الجاى لفرقة الصحبجية اللى بيكتب لها محمد حامد فروزن لف..او فى اى تجمعات ثقافية اخرى او حتى على قهوة او كوفى شوب..يعنى ماتلقاش الحكاية تعليق على البلوجات وخلاص
انا اصل عجبنى كلامك وفكرك فى الاجتماع
ياريت
eih ya Hany
yesterday I came here and found a post that I liked much (about the peaks of emotions as I remember)... when I came back to comment I found it disappear... eih el 7ekaya??
I want it back malish da3wa!
أنتوك
بجد كل يوم الواحد بيلاقي فيك حاجة جديدة
حلو أوي الشعر
بصراحة كنت و أنا بقرا حاسس إني هالاقي إسم سيد حجاب و لا أبو النجوم تحت بس إنت مش أقل منها يا صاحبي
اعتذر منك سلفا
فقد سرقتني الصورة قبل الكلام
مصر بلد المحال
تراه محال أن يتحقق
وهو في الحقيقة محال أن لا يتحقق
مع تحياتي لشعرك النابض
بأتمنى إني أعيش لحد ما أشوف الحال غير الحال .. إحنا عايشين بالأمل ده
أسوأ شعور ممكن يعدي علينا خو إن العمر يخلص ونلاقي إن اللي مستنيينه .. ماجاش ومش هاييجي
هاي روبابيكيا
مــــــــــــــــــا أروعك
صديقك الاصيل
يارب تكون لسه فاكره
سلام
انا جيت
بس انت عارف
انا لا اعلق من القراءة الاولى
لي عودة
فاتتني تدوينتين ,,,,
ان شاء الله
بين حال وحال يجي الحال اليي كلو حمال امال
لغد افضل
يا رب
كلام جميل واكثر من رائع
ازيك هانى اخبارك اية
كان نفسى اتعرف عليك اكثر بس نعمل اية فى الزحمة
تحياتى
قلبي الصغير عليل
و الفرح صبح محال
........
يمكن بكره جايب معاه راحة البال
........
ممكن
حلو بجد
نحياتى
طبعا رائعة ياهانى
واعتقد ان اى تعليق اى كان لن يعبر عن مدى روعتها
انت موهوب فى نقل احاسيسك البسيطة بذاتها نفس الطريقة البسيطة..البديعة...التلقائية
بس انا ملياش فى الوزن وكده..وبوزن بودنى..فيها حتت كتير مكسورة...وكمان..انت اعتمدت على القافية كتير وتمسكت بيها فى اماكن كان ممكن تتنازل عنها ..دى رأى غير متخصص..بس بحكم التعود على سماع نقد الشعر والعامى فى الجلسات الادبية...انا تخصص قصص قصيرة فقط فمقدرش احكم حلو على الشعر والعامى
لك كل تحياتى ياهانى
لولو
القصاص لشهدائنا من الاسرى
الحال ما بقاش الحال
و ما عادش فيها أحتمال
ارجع و أقول ده موال
و أغرب موال
و مابين كل حال و حال
الف الف أحتمال
و الحال هيتبدل و يتغير
و الحلم راح يتحقق ... يتفسر
الجزئية ده عجبتنى جدا
رجاء خاص يا هانى
يارة مدونت ى وقرأءة اخر بوست بعنوان
من سيدفع ثمن دم اسرانا
و التفاعل معنا
تحياتي
ما شاء الله
دايما كتابتك حلوة ..بس هنا انت احلي من كل مرة
عجباني جدا بجد حلوة اوي
بجد اسلوبك بفتقده جدا جدا
كان بقالى فتره كبيره مش قادره اكتب
ولا حتى انى ادخل عند حد
او اعلق
بجد اول ما جيت تانى عندك
و زرت مدونتك
بجد حسيت ان اسلوبك السهل الممتنع ده
واحشنى مووووووووت
بجد انا مش عايزه اروح هنا
:)
بجد كانت واحشانى مدونتك جدا جدا
البوست بجد رائع جدا جدا
واحساسك بيه حسيته اوى
بجد ما تحرمناش من كتاباتك ابدا
منتهى الروعة
MAKSOFA
أزيك يا مكسوفة عاش من شافك كلنا بنحبها أوي أوي
نيفين عمر
دكتور علاء الأسواني مرة واحدة أو ناس من طرفه عندي هنا يا هلا يا هلا بالناس الكبيرة نورتي المكان و سعدت جدا بزيارة المدونة بتاعته
MoHaMeD HoSSaM
تعيش يا باشا أتمني ان أكون دائما عند حسن ظنك
micheal
يا فندم أنا الأسعد بلقائك كنت مبسوط جدا علي فكرة
Sampateek
مستحيل لا توجد في القاموس الفرنسي كلمة بهذا المعني (قالها نابليون) و لا توجد في قاموسنا أيضا يا أجمل كلبوزة
hosnysoliman
الفنان الجميل حسني سليمان عندي هنا في مكاني المتواضع ده يا هلا يا هلا نورتني يا أستاذ حسني كانت فرصه جميلة أوي اني أتعرف علي حضرتك فاللقاء ده كان من حسن حظي بجد و كلام حضرتك بالأسلوب ده عني شهادة اعتز بها جدا من شخص أقدره
Christa
بصي هو كان بوست قديم هتلاقيه في أول شهر عندي بس مش عارف ليه اترددت و شلته تاني من الشهر ده هو موجود لسه بس بالتاريخ القديم هرجعه بس لما أظبط الكلام فيه شويه معلش حسيت أني لازم أشيله
مصرى
سيد حجاب مره واحده يا عم يحيي لا لا ده انا كده أخد قلم في نفسي أوي عموما رأيك يهمني زي ما قلت لك لأنك متذوق جيد .. و هندسة كمان :)
فاتن
من اول ما بدأت المدونة حافظت اني أنزل صورة جنب الكلام أحيانا تصبح الصور و المشاهد أبلغ من أي كلمات
حائر في دنيا الله
أحب نبرة التفاؤل دي أوي أوي
يا مراكبي
أن شاء الله هييجي يا بشمهندس و لو ما جاش هنروح نجيبه بنفسنا طول ما البلد فيها ناس زيك يبقي لسه في أمل
el_assel
أكيد فاكرك رغم أني مصاب بالزهايمر بشكل مخجل أوي ... لما زرت المدونة عرفتك علي طول :) اهلا بيك منورني دايما يا أصيل
bluestone
لازم أسمع رأيك ما تنفضيش لو سمحتي حتي لو مش عاجبك قولي لي وحش
Nada
الحياة أمل و من غير الأمل يبقي الحياة بلا طعم فعلا
tamer
انا تمام يا عم تامر كنت سعيد أني شوفتك أن شاء الله المرة الجاية تكون الفرصة أفضل و اقدر أتشرف بمعرفتك أكتر
FrEe.PhArAoH
أكيد ممكن
ست المرتفعات
:) ازيك ؟ أنا مش باعرف أكتب شعر بمنتهي الصراحه و لا أعرف أوزن قافية و لا أعرف يعني أيه مكسور :) بمنتهي الصراحة بأجاوب عليكي أنا حسيت بحاجة فكتبتها ده كل اللي أقدر أقوله و أكيد رأيك متخصص عالأقل بالنسبة ليا
كويس انها عجبتك لكن انا كمان مش متخصص أبدا
جبهة التهييس الشعبية
شكرا لأستجابتك لطلبي ... القصاص لشهدائنا نطالب به كلنا يا نوارة
بنـت ســعد
تشرفت جدا بمعرفتك أنت و شمس في اللقاء كان شيء جميل أني أشوفكم
اما عن التفاعل فده شيء أكيد اني معكم بالطبع و كنت طلبت من نوارة تقول لي ممكن نعمل أيه و في عندها لينكات و عناوين بريد نبعت عليها
نورتيني
و يا ريت توصلي سلامي لشمس
saso
يا اهلا بأصحاب المكان مبسوط انها عجبتك يا رب دايما
ساعه الغروب
كلام كبير ما اعرفش أرد عليه :) يا رب أكون دايما عند حسن ظنك كده
المكان منور بجد
tazart
شكرا جزيلا .. الأجمل هو تشريفك لي
هانى
جميلة او كتابتك
من المحال دوام الحال... تفتكر ده
كلام بجد؟
انا لسة عند رايي فيك فعلا..فعلا كلامك معبر جدا وغير انه معبر..فهو سهل وبسيط جدا..على فكرة انا مش بجامل..بس الحاجة الي بتعجبني لاي حد احب اسجل اعجابي بها مش اكتر
بس مش عارفة ليه جت عليا موجة ضحك لما شفت الصورة وعرفت انك بتقول ان هي دي مصر مقارنة بالاعلانات السياحية عن مصر الاهرامات والنيل والفنادق الخمس نجوم وشرم الشيخ والذي منه
تعرف انك لو اشتغلت في مجال الاعلانات هتنجح جدا خصوصا لو كانت اعلانات عن السياحة في مصر :)
من غير كلام مزوق...القصيدة حلوة فعلا
حلوة أوى فعلا ومش عارفة ليه فكرتنى بعبد الرحمن الابنودى كأننى بقرأله
makhlouf
بيقولوا الشيء الثابت الوحيد فالدنيا هو قانون التغيير
بيقولوا كده و اللي يعيش ياما يشوف
بيسوو
ما هو في كذا مصر يا عزيزتي
في مصر عالكورنيش فالزمالك
و في مصر برضه عالكورنيش بس في حكر أبو دومة
في مصر في دريم لاند و الشروق و 6 أكتوبر و مدينتي و الرحاب
و في مصر في أرض اللوا و عزبة القرود و بيجام و جربديان و البكرية
لو ناويين نتكلم عن مصر في مرسي علم و شرم الشيخ و الغردقة و السخنة و الساحل الشمالي و ما شابه .. أذن هي مصر جميلة جدا بلا مشاكل بلا أمراض بلا فقر ... يبقي البوسترات بتاعتها لازم تبقي أحلي من شواطيء الريفييرا و جزر الباهاماس كمان .. أنما لو هنتكلم عن مصر في القري و النجوع فلا داعي لأن نأخذ كاميراتنا معنا فلنتركها في أماكنها
bocycat
الأبنودي مرة واحدة ... يا خبر أبيض
يا ريت بس مبيتهيأليش قصدك الشاعر المشهور عبد الرحمن الأبنودي الصعيدي الأسمراني الجميل ده ... أكيد تشابه أسماء في واحد أسمه محمد الأبنودي بيقعد معايا عالقهوة يمكن له أخ أسمه عبد الرحمن أنت تقصديه ؟؟ يمكن :)
جميله جدا
قريتها 3 مرات عجبتني جدا
بحب الكلمات الي مليان
امل و تفاعل
ابدعت
ام العيال
أهلا بيكي يا أم العيال مبسوط انها عجبتك يا ريتك تقري الموضوع اللي بعدها
شعرك عجبنى قوى ودى اول مرة اقراء شعر يعجبنى كده من وسط شعر بعض المدونين بتوعنا بغض النظر عن الموضوع الى عاجبنى جدا وهوا ده المهم لكن الى بيميزك محافظتك على وزن الشعر والقافيه والصور الجماليه وده الى عجبنى فيك وملقتوش عند حد تانى
الأرمـوطــي
شكرا يا عزيزي لكني مش شاعر و لا أفهم يعني أيه وزن القافية و لا باعرف أكتب شعر بشكل محترف الموضوع كله أحساس مش أكتر من أحساس
شرفتني
أرجو مايكونش تعليقى ده قليل الذوق
بس أنا بتعجبنى جدّا اختياراتك للصور التى ترفقها مع موضوعانك .. يمكن عشان باحاول على أدّى كده أتعلّم تصوير
زمان الوصل
طبعا التعليق محترم من واحدة محترمة جدا
و الحمدلله أنه أختياري للصور موفق مع الموضوعات لأني دايما باشوف أنه الصور بتقدر تلخص كتير أوي من الكلام في مشهد واحد
و لذلك بعد ما بأخلص كتابة الموضوع بادور علي صورة جيدة له ... و معني كلامك أني باعرف الاقي الصورة اللي بتقول اللي أنا باقوله
شكرا و مرحبا بتعليقك و بكي في أي وقت أيا كان التعليق حتي لو كان نقد صريح لمدونتي و لما أكتب مش هازعل أبدا بالعكس هابقي شاكر جدا
إرسال تعليق
<< Home