ظلطه ملونه بتلمع

لما كنت صغير كنت بادور عالظلط الصغير اللي بيلمع و أحوشه و أخبيه في مكان أنا عارفه و من وقت للتاني أروح أبص عليه و أبقي فرحان بيه كنت لما باقع أتعور و انا بالعب ما كانتش بتفرق كتير لأني كنت دايما متعور كان عندي في كفوف أيديا و رجليا يعني مناطق التلامس مع الاخرين و العالم الخارجي مرض جلدي أسمه الصدفيه كان بيخلي الايدين تنشف أوي و تتشقق جروح عميقة لما أمسك اي حاجه و كنت متعود علي ده أوي و قادر أتعايش معاه ... حتي نظرات الشفقة الاصطناعية اللي كان ساعات ناس كبار حوليا بيبصوا عليا بيها اتعودت عليها و ما كنتش باعطيها اي اهتمام لأنهم مش عارفين و لا حاسين أني مش متضايق و أنه في حاجات بتفرحني مهما حصل
ما كنتش بالعب كورة مع باقي الاولاد للسبب ده و لحد دلوقتي ما بعرفش العب كورة لا قدم و لا سلة و لا فولي
و متعقد من الكور كلها و حاليا فالمصايف لما أصحابي بيلعبوا كورة باقف جون زي قلته لا بيصد و لا أي حاجه و ممكن يجيبوا له كرسي و شيشه جنب الجون يقعد يريح عليهم و يبقي أحسن لهم كمان
الولد الصغير ما بقاش موجود و نسي مكان الزلط الصغير اللي بيلمع اللي كان محوشه فوق السطح ... بقي في واحد جديد
ما عندوش الصدفية اللي قعدت معاه حوالي 12 سنه لحد ما بقيت صاحبته ... و الجروح اللي في الاماكن الخارجيه اختفت و تم استبدالها بجروح جديدة ... لكنها داخليه عميقة لكن مع الوقت أصبح يدرك قيمتها الحقيقية ... الجروح الجديدة و القديمة
و لحظة ميلاد الفرح كان فيه حبيب رايح ... بس كان في بني أدم جديد بيتولد جوايا ... غريب شويه عني
يمكن لو كنت قابلتني و أنا صغير ما كنتش هعرف مين ده و ليه عامل كده
لكن الانسان الجديد لما بيقابل الاتنين القدام بيعرفهم و بيحبهم ... متصالح معاهم و مع الدنيا اللي خدت منه حاجات بس علمته حاجات أهم كتير... سابت له شوية ظلط بيلمع صغير محدش عارف هو بيفرحه ليه و هو نفسه عارف انه فالحقيقة الظلط ده مش مهم و مش لازم يخبيه أوي كده ... لكن الحقيقة مش دايما واحدة و حقيقتي غير حقيقتك غير حقيقة واحد تالت ... الموضوع نسبي أوي و الظلط ده مهم و أنا مش لاقيه
ممكن تدوروا معايا عليه لو سمحتوا علشان انا عايزه أوي دلوقتي
هو صغير و ملون و بيلمع و ملمسه ناعم علي عكس ايدي اللي كانت خشنه أوي