الجمعة، يناير 26، 2007

حتي يأتي الصباح

في نفس هذا المقهي العتيق تغطينا ظلمة الليل و لا يجرح هذا السكون بين الحين و الأخر الا صوت سيارة مسرعة .. نتلفت اليها قليلا و نستكمل حديثنا الباسم .. احساس الصداقة الدافيء هو هو الذي عهدناه .. كأكواب الشاي الزجاجيه الشفافه التي تدفئنا و تحمينا من لسعات البرد ليلا ... منذ فترة ليست بالهينة ( حوالي أسبوعين أو أكثر قليلا) لم نلتق ... و لمن لا يعلم تعتبر هذه فترة طويلة جدا .. صحيح الدنيا تلاهي .. نبدأ في بعبعة الأحداث التي مرت علي كل منا دون أن يعلمها الأخر ... في هذه الجلسه الحميمية فقط تتحول أصعب و أثقل همومنا لأشياء مضحكة بشدة ... فعمق مشاعر الصداقة فقط هو القادر علي تسفيه مشاكلنا بطريقته السحرية ... ألا و هي السخرية ... السخرية اللاذعة من كل شيء و أي شيء ... حتي القهوجي الوحيد الذي يسهر ليلا لا يسلم من سخريتنا منه و من بلدته الريفية التي أتي منها الي المدينة رأسا فأصابته الصدمة الحضارية كما يقولون و كان كلما رأي أي فتاة تمر من أمام المقهي تتحول تعبيرات وجهه الي تعبيرات كائن مفترس غريب ... ينظر الينا معاتبا و لكن يضحك هو الأخر متقبلا هذه الروح و كأن سعادتنا أمتدت لتصبغ كل ما حولنا بلون الفرح ... و يذهب ليأتي بأكواب جديدة مملؤة بالشاي الساخن اللذيذ و يبتسم عندما نداعبه بكلماتنا الساخرة مرة أخري .. حتي يأتي الصباح و يضج المكان بأصوات المارة و السيارات ...و يذهب كل منا في طريقه ... علي أمل اللقاء قريبا
تحديث : انا باستقبل مكالمات من برايفت نامبر .. واحد بيقعد يقول الو و يقفل الخط علي طول يا تري يبقي أيه ده ؟؟ اللي يعرف يقول لي الله يخليكم علشان دي حاجه غريبه أوي

40 comments:

Blogger Gid-Do - جدو said...

في نفس هذا المقهي العتيق تغطينا ظلمة الليل

حتي يأتي الصباح و يضج المكان بأصوات المارة و السيارات ...و يذهب كل منا في طريقه ...

واد ياهانى

اذا كان اللى انت كاتبة دة ـ قطعة ادبية ـ اهنيك عليها فهى سلسة ومعبرة ومبهجة وواقعية الخلاصة عجبتنى

اما اذا كان دة اللى بيحصل فعلا انكم تباتوا فى القهوة ـ وحسب قوانين تربيتى ـ كدة تبقوا عالم صيع ـ تحياتى

6:24 ص  
Blogger عاشقة الوطن said...

هانى

لو على الصداقة فده أجمل حاجة فى الدنيااا كلهااااااااااا

وبجد الصداقة الحقيقية اللى مش وراها استفادة يعنى واحد مصحبك عشانك انت وبس ده بقى أروع انواع الصداقة

تحياتى لك وتحياتى للصداقة الحقيقية التى اعشقها بجد

10:15 ص  
Blogger karakib said...

Gid-Do - جدو
العزيز جدو ... أزيك ؟ يا رب تكون بخير أنت و كل الأسره ... هي الحقيقه شيء واقعي يا جدو .. بس مش كل يوم يعني ده بيبقي يوم من الايام اللي لازم يكون في بعده اجازه طويله و ظروف مناسبه يعني للسهره دي .. مش صياعه و لا حاجه يا جدو ما انت عارف أنه ماليش فيها خالص بس هي بتبقي دمها خفيف و أحساسها مختلف خصوصا لما يكون فات وقت طويل ما شفتش حد من أصحابي بيبقيس الموضوع فعلا لذيذ و ما بنبقاش عايزين نروح :) من كتر ما عمالين نضحك و نهزر


عاشقة الوطن
الصداقه :) المنزهه عن أي نوازع نادرا ما تكون موجودة
لكن الصاحب علي عيبه .. كل الناس فيها عيوب
و أن كنت في كل الأمور معاتبا صاحبك لن تلق الذي تصاحبه ... مفهوم الصداقه و معناه فعلا أشياء غاليه جدا
تحياتي ليكي يا عاشقة الوطن و منوره المدونه

3:11 م  
Blogger Sampateek said...

فعمق مشاعر الصداقة فقط هو القادر علي تسفيه مشاكلنا بطريقته السحرية

الله حلوة قوي الجملة دي
فعلا عندك حق

اه من الغربة و البعد عن الاصدقاء

يا سلام نفسي اعملها مرة و اسهر في قهوة على كورنيس اسكندرية للصبح

تحياتي

4:15 م  
Blogger micheal said...

يا سلام عليك يا هاني...فعلا أد اية مشاعر الصداقة الحقيقية جميلة و قادرة عاي استخلاص أجمل ما فينا من مشاعر رقيقة...ربنا يسعدك كمان و كمان

4:31 م  
Blogger micheal said...

يا سلام عليك يا هاني...فعلا أد اية مشاعر الصداقة الحقيقية جميلة و قادرة عاي استخلاص أجمل ما فينا من مشاعر رقيقة...ربنا يسعدك كمان و كمان

4:31 م  
Blogger Gid-Do - جدو said...

واد ياهانى
وصفك للقعدة شوقنى ليها ـ وان شاء الله لما انزل مصر اجازة ـ اسالك تعزمنى على القعدة بس المشكلة فى صحابك يمكن ميوفقوش ـ لكن نحاول ـ خاصة انى مش حغرمكم غير حق فنجان ينسون ـ وملكوش دعوة ببقشيش الاهوجى ـ مش لسة البقشيش نص فرنك ـ قرشين صاغ ونصف ـ انا راح اديلو شلن بحالة ـ انشاالله ما حد حوش ـ اية رايك فى التبذير دوة ـ تحياتى مع تمنياتى ليكم بالسعادة دائما فالاصدقاء ثروة الانسان

1:15 ص  
Blogger مصرى said...

أنتوك فعلا قطعة أدبية هايلة أحييك عليها يا صاحبي

بس إنت وصفت موقف متكرر بالنسبة لي من قعدة القهوة لبعبعة الأحداث ل .... إنت بتراقبني و لا إيه

:D
شكلك عاشق لقعدة القهاوي زي حالاتي يا أنتوك

موضوع جميل يا أنتوك

1:48 ص  
Blogger كائن العزلة الكئيب said...

فكرتنى بالقهوة اللى بنقعد عليها و فكرتنى بصحابى
برافو

2:29 ص  
Blogger sarah la tulipe rose said...

"لع عليم الصبح و انتو علي القهوة لسه
يا بخت الولاد فعلا !!حاحقد بقي
بس فعلا يا انتوك الصداقة هي الي تقدر تدوب تلال الهموم من علي قلبك في لحظة واحدة عشان كدة الي يلاقي صديق بجد مايسبيهوش يتبت عليه كويس لان كل حاجة حلوة بتضيع اليومين دول لو مامسكناش فيها كويس
تحياتي يا انتوك

11:12 ص  
Blogger pegasuselmasry said...

موضوع جميل وصورة اروع

القهوة دى ملتقى الاصحاب كل يوم و خاصة ايام الدراسة

ما اجمل الرفيق والصديق الحقيقى

2:54 م  
Blogger karakib said...

Sampateek
فعلا يا سمباتيك .. المشاعر دي و الأحساس ده قادرين علي تحويل أي شي سييء لضحك .. أنا من يومين خرجت مع 6 أصحاب قدام عايز أقولك أني ضحكت بنص مليون جنيه فاليوم ده ضحكت لحد ما حسيت أنه نفسي أتقطع من الضحك و مش قادر أبطل و لأني كنت حاسس بالأمان و الهدوء وسط ناس يقبلونني كما انا و هذه هي أحدي اهم مميزات الصداقه
ربنا يقرب منك البعيد يا سمباتيك و يكون اصحابك جنبك

micheal

مشاعر االصداقه .. صاحبك هو أخوك اللي اهلك ما جابوهوش و اللي أنت فعلا اخترته .. كان في واحد في مسلسل عربي قديم بيقول فكره علقت معايا أوي مع أني شفته و أنا صغير كان نفسه لما يموت يتكتب في نعيه فالجريده أسماء أصدقائه و ليس أقاربه ... زوجته و ابنائه و أصدقائه ... مفهوم الصداقه قليلين اللي أختبروه فعلا و كثيرون يحاولون أن يشعروا به ... و لكن الموضوع مش سهل أبدا
تحياتي ليك يا عم مايكل

4:45 م  
Blogger karakib said...

Gid-Do - جدو
يا جدو يا جميل ما انا قعدت أقلك تعالي .. مش هتضايق لكنك أصريت أنه لأ مش هتروح مكان معايا :) المره القادمه أن شاء الله لازم تيجي معايا .. علي فكره يا جدو القهوه دي مش قاعد عليها شباب بس لأ .. لأ خالص و لا صنايعيه بس برضه لأ و لا دكاتره و مهندسين برضه ... القهوه دي مزيج سحري من المدير السابق ببنك الي قومسيونجي عربيات نقل الي ظابط شرطه الي مهندس و دكتور و سباك و نقاش و طلبه في كل الكليات و كهربائيه و كل دول قاعدين مع بعض و يعرفوا بعض كويس ... طبعا مش كلهم أصحاب ...انما معارف .. أما عن أصدقائي يا جدو فهم بيرحبوا بكل الناس و علي فكره لما يشوفوا حضرتك بالذات و طريقة كلامك الحكيمه دي في كل المواضيع هيرحبوا بيك أوي .. بس يا جدو الله يخليك بلاش حساب و بقشيش ده واجب علينا ده غير انه واضح أنه فكرتك عن البقشيش قديمه أوي :) يا جدو الشلن ده صدقني قريب أوي هيتلغي أساسا لأنه مش بيشتري أي حاجه


مصرى

يا عم يحيي ما أنت عارف اللي فيها :) كليه غريبه تحول حياتك الي تروس ساعه منتظمه مافيش حاجه بتكسر التروس دي الا صخب القهوه و الخروجات اللي بنسرقها من وسط المعمعه اللي أحنا فيها
أنا مش باراقبك بس لازم يكون فيه توارد خواطر ... واضح أننا بتحب نفس الشعراء و الاماكن و الأفكار .. يعني شباب من اللي بيدوروا عالحقيقه لسه و كل ما يمسكوها تهرب منهم و يجروا وراها زي ما تكون الحقيقه دي فراشه صغننه بارعة الجمال بنجري وراها و نمسكها بالراحه لا تموت تقوم تضحك علينا و تهرب من أيدينا لأنها عارفه خوفنا من أنها تموت

5:00 م  
Blogger karakib said...

كائن العزلة الكئيب


نورت المكان و مبسوط أني فكرتك بأصحابك و مكان تجمعكم .. لكن هو انت بطلت تقابلهم ولا أيه ؟؟






sarah la tulipe rose


أااه حقد بقي و الكلام ده ... لعلمك أنا حاطط خرزه زرقا علي شاشة الكمبيوتر من فوق ... بس علشان تبقي عارفه يعني ... :) القعده دي مش بتتكرر كتير يعني بس هي بتبقي تحفه بالذات في لحظات الفجر اللي أنت كنت كاتبه عنها .. لو كنت فالشارع و مؤتنسه بأحد أصدقائك كمان و كرسي كده و الجو مروق هتحسي بمعني اللي قولتيه بس شكل مضاعف جدا
الأصحاب هم الثروه الحقيقيه فعلا في حياتي لم اترك أحدا الا مرغما و الا بعد محاولات كثيره لعدم البعد ... لم اخسر من صداقاتي الا ثلاث و كان الموضوع خارج عن أرادتي تماما





pegasuselmasry

أشكرك يا عزيزي .. فعلا كلامك حقيقي أرجو دوام المرور

5:10 م  
Blogger egiziana said...

"فعمق مشاعر الصداقة فقط هو القادر علي تسفيه مشاكلنا بطريقته السحرية"
اه من قعدة البعبعة دي اد ابه مفتقداها
تعبيراتك جميلة اوى يا كراكيب لانها صادقة

10:01 م  
Blogger ohbebo said...

عارف انا مبسوط جدا من كلامك
لانك مبسوط لحد ما وده شيء حلو فى نفسه انك تلاقى حد بيتبسط الايام دى
وانا عارف اكتر الشعور بانك تسهر لل ال الليل وتشوف من مكانك ع القهوة النهار والزحمه وهى بتبتدى
احساس رائع ببداية خلق اليوم
حتى لو بعديها تروح تكمل نوم

3:56 ص  
Blogger lastknight said...

مصرى جدا يا باشمهندس .. القهوه .. و الدفا اللى ماتعرفش جاى من الشاى السخن ولا من لمة الصحبه الطيبه .. التريقه على خلق الله بحب وود .. يخلوا حتى اللى بتتريقوا عليه يقرا صفا قلوبكم و يضحك معاكم على نفسه .. سهر للصبحيه .. و شغل مع طلوع الشمس تمسك متشبث بكل معانى الجمال فى الحياه رغم الظروف و الهم و القهر ..طاقة حياه بجبروت ..وسعاده حتى من بق شاى سخن على قهوه .. مصرى بجد ..

4:42 ص  
Blogger يا مراكبي said...

ليا تلاتة أصحاب من 15 سنة ممكن فعلا يقعدوا معايا على القهوة من بالليل للصبح .. ونعمل زي ما إنتوا بتعملوا كده بالظبط .. بس التلاتة من هندسة عين شمس

1:00 م  
Blogger zordeak said...

يا بختكم


حسستنى بالدفا وانا بقرى كلماتك


شكرا ليك بجد

5:02 م  
Blogger أنـــا حـــــــــرة said...

الله عاجبنى اوى الجو ده

11:21 م  
Blogger hebaz said...

الصداقة أحلى شىء فى الدنيا فهى قادرة على مسح الهموم تماما
ما أجمل جلسات الفضفضه أو حتى التهييس مع الأصدقاء
عارف أنى أكتشفت أنى مبضحكش من قلبى و أكركر من الضحك كدة غير مع أصحابى
و حشنى الضحك اوى لأن زى ما أنت قلت بالضبط الدنيا تلاهى و مبنتقابلش بالشهر
تحياتى :)

11:21 م  
Blogger صفصف لادي said...

مش حقولك غير الله عليك يا انتوك
وصفك جمييييل
**************


بالنسبة للتلفونات الغريبة دي حقلك انا بقى حكشفلك السر

لو انت كنت مديني رقمك كنت حقلك انا اللي بتصلك و اعاكسك و اقفل لكن بما انك مش مديني رقمك فيبقى مش انا
ههههههههههههههههههههههههه
يلا سلام

6:59 ص  
Blogger مش أنا said...

هذا الهاتف هو السخرية ذاتها

12:20 م  
Blogger karakib said...

egiziana
قعدة البعبعه دي هي اجمل حاجه في حياتنا عندما نزيل الأقنعه و نجلس بلا تكلف و لا لف و لا دوران .. فقط نحكي ما نريد و نحن مبتسمين و يتقبله من حولنا بأبتسامه أخري ... زيارتك فعلا تسرني .. شرفتي المكان بجد



ohbebo

ما هو أكيد كل واحد فينا فيه اللي فيه و متضايق من الف الف حاجه لكن تفتكر مافيش أي حاجه تفرح فعلا ؟؟
أعتقد لأ ده في حاجات كتير أوي اوي بتفرحنا و تضحكنا و الا يبقي احنا لسه عايشين ليه ؟؟ أكيد في سبب يخلينا فرحانين و لسه عايشين

lastknight
تصدق كلامك ده فكرني بكلامي مع واحد صاحبي من يومين .. كنت باقوله أنت ممكن تهاجر برا مصر ؟؟ سكت كده و بص لي و قال لي .. و أصحابنا ... و كل اللي بنحبه يروح فين ... رديت عليه و قلت له اللي عمل أصحاب هنا هيعمل أصحاب هناك لو عالاصحاب (كنت باستفزه) قال لي لأ بس مش هيكونوا انتم :) أنا فعلا بحب البلد دي أوي لأنه مصر يعني أصحابي و أهلي و المدونين و كل الناس اللي بحبهم يبقي أزاي ما اكونش فخور بأني أنتمي لمثل هذا المكان .. علي قد مشاكله الكتير .. علي قد كوارثه الكتير أوي أوي .. لكنه جميل و باحبه هنا كل ذكرياتي ... هنا وقفت علي سور المترو أكتب جزء من سيناريو لواحد صاحبي هيطلع عالمسرح علشان يشوفوه و يصوروه و الصور تبقي سي في ليه .. هنا كان أول مره أعرف يعني ايه حب
هنا كان أول فشل ليا و أول نجاح ليا هنا كل حاجه ... أنا موجود هنا و جذوري كلها هنا يبقي أزاي ما أعشقهاش يا فارسنا

4:55 م  
Blogger karakib said...

يا مراكبي
:) عمنا ... ايه أخبارك .. شكل بتوع هندسة عين شمس كلهم كده .. انا معظم أصحابي منها أصله و كلهم غاويين قعدة الصفا الليليه ...عارف بقي فالصيف ليها طعم تاني خالص غير الشتا
لأنه فالشتا بنبقي قاعدين مستخبيين جوا الكوفيات و الشاي في ايدينا أنام فالصيف الجو بيرطب بالليل و الهدوء معاه بتخلي الواحد مبسوك أوي أتمني لما تيجي مصر أشوفك


zordeak
الدفا طالع من مشاعر الصداقه و شكلك عارفها كويس و الا ما كنتش فهمتها يا دكتور
حاجه كبيره أوي و جميله اوي اللقا ده



أنـــا حـــــــــرة

مش هاعرف أقولك تعالي .. اصلها قهوه بلدي في شبرا و بتبقي سهره كمان .. عموما لو فيس يوم حبيتي تشوفي الكلام ده بصي علي أي قهوه في منطقه شعبيه باللي هتلاقي زينا كتيييير

5:01 م  
Blogger karakib said...

hebaz
ما هو لأن الدنيا تلاهي فمينفعش نسيب نفسنا ليها
ما ينفعش غير أننا نوقف عقاربها شويه كل شويه بقعده شبه ديه ... لازم لأنها لو خدت حد في ساقيتها مش هايعرف يطلع منها و لا لو عمل ايه


حفصوتشا ام مصطفيتش
يا حفصه الراجل بتاع موبينيل (خدمة العملاء ) قال لي نمره من برا أو جهه أمنيه ... أن كان نمره من برا فمافيش حد من اصحابي اللي برا مصر بيتصل بيا فالميعاد ده مرتين أبدا و أن كانت جهه أمنيه فهما أكيد راحوا للبني أدم الغلط أو مش عرف بقي



مش أنا

أي سخريه هي التي تتكلم عنها ؟ مش فاهم

5:05 م  
Blogger whyme said...

احساس الصداقه اجمل احساس و خاصه لو كان له اساس متين فهو كل ما مر عليه الزمن تفوح رائحته اكتر و اكتر و ينتعش الكل بعبيره حتى الماره و القهوجى


تحياتى
واحد هاوى صداقه والحمد لله على النعمه دى

6:48 م  
Blogger bluestone said...

بعض العلاقات الانسانية تترك بصمات تثري مشوار المرء .. القصة ليست عمقا فقط بل قدرة مذهلة على احتواء الاخر بكل احماله ثم مساعدته على تحويلها لمادة خفيفة يمكن ان تكون مثارا للضحك
فمهمة الصديق ليس ان يحل مشاكلك بل يساعدت على تحملها ...
--

7:17 م  
Blogger tota said...

كراكيب

فى عمرنا بيكون فى لحظات جميلة جزء منها هو علاقتنا باصدقائنا واللى ليهم مكانة خاصة فى قلوبنا فى الجو ده بتصفى الدنيا وبننسى مشاكلنا بنغطيها بنخبيها المهم ان مش عايزين هموم وقتها
وصفت متعة الاوقات فى العلاقة الجميلة البسيطة دى بكلمات سهلة ولمست الهدف بسهولة

مشكلة اننا معندناش قهوة للستات لوحدهم منتهى العنصرية بصراحة بس ماشى بكرة نعمل دى كمان
:)
تحياتى

9:24 م  
Blogger ام العيال said...

اجل حاجه الصداقه

تسلم يا هاني

تحياتي

11:54 م  
Blogger جبهة التهييس الشعبية said...

هاني

هو غالبا بيعمل بالمثل القائل

طلبته سمعت حسه وقفلت السكة تاااااااااني

12:49 ص  
Blogger توهة said...

انا بقالى زمن مادخلتش هنا

واظهار إن انتيكه وأنتوك انفصلوا ولا ايه ؟؟؟

بس مافيش حاجه بتفضل على ايه



الصداقه جميله ... والسخريه من مشاكلنا شئ مريح


بس المراره بعد الإفتراق وعوده لمشاكلنا

تكون شاقه جدا

2:27 ص  
Blogger karakib said...

whyme
كلامك فعلا حقيقي فالورود الحقيقيه لا تفقد رائحتها مهما حدث لها

bluestone
قدرة مذهلة على احتواء الاخر بكل احماله ثم مساعدته على تحويلها لمادة خفيفة يمكن ان تكون مثارا للضحك
يااااه أهي دي بقي ترجمه تانيه لفكرية السخريه و انه بقوة الصداقه بنقدر نتحمل كل شيء و نحس أننا أكبر منه لدرجة اننا نسخر من تفاهته
كتير فعلا لما كنت بابقي متضايق بابقي عايز أحكي .. مش مهم أسمع رأي لكني عايز احكي ... الصاحب الحقيقي ... اللي بيعرف أمتي يسمع ... كتير كنت بقابل ناس مش عايزين حلول انما عايزين أذن تصغي اليهم ليقولوا ما يريدون و يفرغوا ما في جعبتهم فقط

tota
الستات ليهم اماكن تجمع بيشعروا فيها بنفس الأحساس أن ما كانش اكتر ... كنت باتفرج علي مجموعة ناس بدون ذكر أسماء بيقعدوا ساعة العصاري يرغوا و معاهم كوبايات قهوه و كلهم ستات .. أعتقد أنهم كانوا يقدرون معني هذه الجلسات جيدا لأنهم حافظوا عليها لسنين طويله

3:38 ص  
Blogger karakib said...

ام العيال
نورتينا يا ام العيال ... فعلا الصداقه شيء ممتع
اتمني دوام المرور



جبهة التهييس الشعبية

ده يبقي بيحبني بقي :) دي حاجه تخوف كده أنه الأخ أبو صوت غريب ده يحبني ربنا يستر بقي و تطلع كانت النمره غلط


توهه

هو كل واحد فينا بيكتب في مدونه و أحنا الأتنين كونتربيوترز عند بعض لو لاحظتي ... المراره أحساس طبيعي .. تأتي بعده الأفراح و نقدر قيمتها بالفعل ... نستمتع بحياتنا بشكل أكثر نضوجا و أحترافا ... شرفتي المكان و أرجو دوام المرور

3:44 ص  
Blogger Epitaph said...

خدني معاك
واعزمني علي فنجان قهوة

بس مالقولتليش مين بيرن عليكم
من بريافت نمبر
يكونش القهوجي بيمسي؟
;)

5:25 م  
Blogger karakib said...

Epitaph
أعزمك علي قهوة بس
ده انت تنوريني
بس المشكله بقي أنه المكان لا يسمح للبنوتات القمرات من اللي شبهك كده يقعدوا فيه .. بس انا عازمك علي فنجان قهوة في مكان تاني
حددي المكان و الزمان و الباقي عليا
اللي بيتصل لازال مجهول فعلا

1:13 ص  
Blogger Chaplinov said...

حلوة اوى الصورة اللى انت حاططها فى الموضوع دى .

6:50 م  
Blogger karakib said...

Chaplinov
اتفضلها هي مش بتاعتي أنا لقيتها علي الياهو و أنا بادور علي الصور
شكرا لمرورك من هنا

1:49 م  
Anonymous محمود النعماني said...

تشابهت الاسماء صدفه
لكنك كنت اسبق
هذا رابطي
http://elnomany.jeeran.com/
اتمنى الزياره
ساقرأ لك لاحقا
لاني في عجلة من امري

6:39 ص  
Blogger karakib said...

محمود النعماني
اهلا و سهلا بك
و شكرا لتعريفك لي بمدونتك
لتتشابه الأسماء و يختلف المضمون يا عزيزي
شكرا لزيارتك

3:23 م  

إرسال تعليق

Links to this post:

إنشاء رابط

<< Home