الأحد، نوفمبر 12، 2006

خيبه الامل راكبه جمل


اثناء عودتي من كليتي التي تقع بميدان عبده باشا الي منزلي بشبرا استقل احد الاساطير الاغريقيه .. اتوبيس 14 الذي يمتد مشواره من عبود بشبرا و حتي الحي السابع بمدينه نصر ... اتوبيس 14 الذي يركبه البشر و لا يغادرونه ابدا..كارثه متنقله علي اربع عجلات ....طوال تاريخي معه لم يركبه احد امامي و خرج ... في يوم 14 /10/2006 القيت بنفسي وسط جحافل و اكوام البشر الداخله في بعضها مصوره احد اقوي الملاحم الوطنيه التي اصبح جزء منها فور دخولي... وحده واحده لا تتجزأ ... و من هنا ادعو كل القوي الاجنبيه العميله و كل الموتورين و اعداء النجاح لمصرنا العزيزه الغاليه ان يصوروا هذه الملحمه ليعلموا كم نحن كالبنيان المرصوص ... احاول ان اخلو بذهني و امارس تمرينات النفس و هي مهمه جدا لكل من يريد ان يبدأ في تعلم اليوجا و من يمارسونها يستطيعون ان يمشون علي الجمر و لا يتألمون بفضلها و لكن هيهات فوجه الكمساري يمنعني من التنفس فقد سحب كل الاكسجين من الاتوبيس بفضل انفه التي ظل يسلكها باصبع يده ليخرجه و يضعه بين اصابع اقدامه ثم في فمه ليعود لانفه ... و يهرش قليلا في شعيرات ذقنه الغير حليقه ... احاول ان اركز قليلا و اتناسي الوضع الاكروباتي الذي اقف فيه و امارس تمرين النفس الا ان الملصقات و الاعلانات عن الضعف الجنسي التي غطت سقف الاتوبيس تماما تشتت انتباهي مره اخري ... معقول كل دي اعلانات عن ال... و بيكسبوا بقي ؟
يختلط صوت الكمساري بصوت بائع الامشاط و الفلايات ... فلايات ... اطلع قدام .... امشاط ... و ابعت تذكره
اتأمل الكمساري مره اخري مرغما هذه المره و هو يجمع بعض التذاكر القديمه و يفردها ليبيعها مره اخري لحسابه الخاص ... ينظر ال متبجحا عندما ينتبه انني الاحظ ما يفعل
تنهار مقاومتي و ابدأ اصرف النظر عن البدء في تعلم تمرينات النفس لكي اجد موطئا لقدمي علي الارض حتي لا اقع مع اول حفره او مطب قادمين ... تمرينات يوجا ايه !!
و تمرينات نفس ايه !!؟
بلا هم يا راجل صحيح خيبة الامل راكبه جمل

60 comments:

Anonymous yank said...

A fantastic blog. Keep it up.
just visiting my site
COMPUTER INFORMATION
Parisj Van Java
Anti Virus Protection
New Anti Virus
Anti Virus Info an Virus Remover
Brontok Information
Make Money Online
MP3 Music Download
thanks.

4:18 ص  
Blogger Desert Rose said...

:)
i kept laughing on reading it.. donno what to tell you, its great u tried to be pro-active, but its not easy..

4:43 م  
Blogger Lasto-adri *Blue* said...

ههههههه
انا كل يوم من دا
ربنا يخلينا عم سيد

:D

6:21 م  
Blogger ابن مرّ said...

برغم اني المفروض أحس بالاحباط نظرا لحالتي النفسية لكن حسيت بأمل كبير صحيح مش ليا،بس للناس اللي لسه عندها ابتسامات وحاجات تعيش بيها
عموما ادينل بنمد ايدينا ونحاول نتواصل

7:48 م  
Blogger karakib said...

Desert Rose
اكيد مش مش سهل خالص اي حاجه تتعمل غير انه الواحد يحافظ علي انه دماغه تبقي فوق الميه علشان ما يغرقش :) زي البحر تمام و كمان مش بتعرفي تعومي خلي دماغك فوق الميه ... كويس انها ضحكتك انا قريت عندك موضوع غرامه الحزام و انك عايزه 51 في كل مره انا بقي الحفر دي بالاقي ناس خبطت في بعضيها و ناس وقعت من نفسها و في الزحمه دي علي اقل سبب ممكن اتنين
يمسكوا بعض يولعوا في بعض علي اي حاجه تافهه زي انت دوست علي رجلي مثلا ... مع انه اصلا اكيد في ناس كتيره دايسه علي رجلين و رقاب بعضيها حتي بس اهه اخلاقيات الزحام و الفوضي تسيطر
انتوك

8:16 م  
Blogger karakib said...

Lasto-adri *Blue*
كلنا فالهم سوا :) و عبده باشا سوا :) و لازم نحارب جامد ... نحارب ايه مش عارف و لازم ليه اكيد مش عارف برضه بس لازم نحارب جامد علشان هو كده اللذيذ فالموضوع بقي انه الناس هنا مش عارفه ما ينتظرني بعد هذه الرحله صباحا من الاعتقال في معسكر النازي المسمي بالكليه ... انت حاسه بيا اكيد :) نازي نازي يعني و معسكرات الاباده الجماعيه موجوده و الجنس الارقي و الانقي الأري من الدكاتره ... الدكاطره علي رأي واحد صاحبي رفيق رحله كفاح و بما اني استشهدت بمقوله منه يبقي اكمل هو بيقول كل ليل و له اخر ... و الشمس طالعه اكيد ده انا كل ده باحكي عن 14 الاتوبيس الكبره المحترم امال لو اتكلمت عن 710 اللي هو بيطلع من المصنع جديد مافيهوش اماكن اصلا هاقول ايه بس ... خيبة الامل راكبه جمل ... هو ده اللي عندي
تحيه الي الاخت العزيزه مناضله الاتوبيسات لست ادري :)
انتوك

8:22 م  
Blogger karakib said...

ابن مرّ
متضايق ؟؟ ليه متضايق ... يا رااااااااجل
انا لو منك انزل اركب 14 و ارجع البيت تاني بعدها بساعه كده خدلك لفه بيه هتعرف انك زي الفل يا راجل الفراغ من حولك كله ملكك لا يشاركك فيه احد الا قليلا !! هتعرف انك مستمتع بحريتك جدا جدا لو ركبته و هتنبسط و تبقي زي الفل صدقني :)
انتوك

8:25 م  
Anonymous غير معرف said...

يوجا!!
ف اتوبيس 14؟
أعتنقت الدين الجديد ياابن ابى شفلحه؟

9:11 م  
Blogger karakib said...

SaSo
:)))) لأ دين ايه هي ناقصه بيقبضوا عالمدونين دلوقتي :) ده انا كنت باهرج و اتوبيس 14 و شاي بالنعناع و يوجا ايه لأ لأ دي حتي قله ادب يعني و اتوبيس 14 ده ميه ميه و زي الفل و اصلا كويس اني لاقيه مش عارف انا باتبطر عالنعمه و لا ايه !!:)))))))))
زي الفل ده حتي 710 كمان فاضي و الناس هي اللي بتستهبل و من كتر حبها فالاتوبيس ده مش بتنزل منه محبه بقي و انا حقودي اصلي انا عارف اني حقودي و اسود خالص من جوا علشان اتكلم علي اتوبيس زي ده بالشكل ده له عشاقه و محبينه من الشعب المصري ده يمكن حتي يختاروه اتوبيس القرن ... قرن الشطه الحامي :)))
انتوك

9:24 م  
Anonymous غير معرف said...

حلوة يا كيبوا

2:40 ص  
Blogger أُكتب بالرصاص said...

دي تهيسية ...
صح ؟

9:13 ص  
Blogger karakib said...

شاب اسكندرانى
الله يخليك يا باشا بس يعني ايه كيبوا ؟

---------------------
أُكتب بالرصاص
مش تهييس لأ ده حصل فعلا

----------------------
انتوك

12:22 م  
Blogger مصرى said...

إيه ده عبده باشا دا إحنا ولاد كلية واحدة
كليه الهندسة جامعة أوشفيتس
;)

12:52 م  
Blogger karakib said...

مصرى
قسم ميكانيكا و التروس و الشحم و الداخل مفقود و الخارج مولود
:)
انتوك

1:16 م  
Blogger مصرى said...

أنتوك

أنا و قسم إتصالات يعني الحاجات اللي بتمشي في الهوا

يعني من الآخر إحنا اللي دهنا الهوا إلكترونات
;)

2:43 م  
Blogger karakib said...

test

3:59 م  
Anonymous غير معرف said...

نشرت بوست جديد دمه تقيل جدا .. و أعتقد فيه تفسير لموضوع الفيديوهات اللى اتكلمنا عنها عند القهوه العاليه .. ياريت تشرفنى

5:17 م  
Blogger bluestone said...

حضرتك داخل ولاية شبرا قادما من عبده باشا .. مستني ايه يعني؟؟د
ده منطقي جدا مش الكبنيان المرصوص ده كالبنيان المحشور

سمعت في احد المرات انهم عايزين يستقلوا ويعلنوها جمهورية منفصلة ..
ضحكتني بجد
شبرا من اجمل الاحياء في القاهرة لانها حي مصري بجد وفيه للعارفين فقط كل ألوان الطيف المصرية من طبقات وأديان وحالات اجتماعية واقتصادية من أول الشبح لحد شحاتين الرغيف

5:23 م  
Blogger karakib said...

مصرى
احسن ناس الناس بتوع اتصالات و كلهم اصحابي بس يا عم ربنا يكفينا شر الكهربا برضه :)


------------------------

lastknight

قرأت لديك التحليل الرائع للاحداث و المديتشي ... كلام كبير اوي و من العيار الثقيل ... معرفتش اعلق عندك مش عارف ليه ... مش بيرؤضي ياخد التعليقات ...

-------------------------
انتوك

8:27 م  
Blogger karakib said...

bluestone
شبرا اكتر حي في مصر غني له مطربين ... هو انا باحب شبرا لانه ذكرياتي و تقريبا كل حياتي فيها ... و فعلا شبرا زي ما بتقولي واضح انك عارفه فيها كل الوان الطيف من اول اغاخان و الكورنيش لحد المساكن الشعبيه و المناطق المشبوهه ... عالم سحري بكل ما يحتويه من كل شيء ...
اما عن موضوع الاستقلال ده مافيش اي حد من العيال اصحابي قالي عليه بس و ماله نستقل و انا عايز ابقي العقيد شمال يمين رئيس مراجيح مولد النبي :) اهه شغلانه مهمه و خلاص
انتوك

8:37 م  
Anonymous غير معرف said...

مالكش عندي حل غير في كلمتين


انت رائع


تحياتي

1:11 ص  
Blogger Desert Rose said...

well.. definitly i understand what u mean.. my post was talking of something different, which is JUSTICE.. i was mocking justice in here..
The ethics is another story that i suffer from as well, bas its not only you and me that are swimming, we all are swimming and trying to keep our heads up..
by the way, i was in same koleya, bas kont barkab rakam tany :) bas that was 5 years ago!!
good luck

12:58 م  
Anonymous غير معرف said...

el72e2a enta btgsd m2saty keda....ana klyty fnfs elmkan...we sakn fe elharam b2a...edrb ur story *100...lol,rbnya ysbrna we y3dl 7al elblde b2a

4:12 م  
Blogger bluestone said...

اكيد عارفة يا انتوك
طلعت جار يا رفيق

ان شاء الله مع الاستقلال هاخدلي وزارتين تلاتة كده على الكورنيش

4:44 م  
Blogger Eanass Abouzeid said...

"اتوبيس 14" كل ما أقرأ الإسم ده و انت بتتكلم احس اننى فى رواية من ما وراء الطبيعة بس كان نقصك البدله الكحلى بتاعت رفعت باشا.
وانا كل ما أركب اتوبيس ألاقيه فاضى و أقول أومال الناس اللى بيقولوا عليهم فين؟ أتاريهم بيتجمعوا فى اتوبيس 14 و هو بيوزعهم بمعرفته.
حقيقى بلوج سكر

11:05 م  
Anonymous غير معرف said...

Thanks to my work in freezone, i live in nasr city :) far far away from el za7ma.
and thanks to Dalila, my beloved car, we follow a well designed route every day to avoid traffic, people, and - yeg3al kalamna khafif 3alehom - omana2 el shorta :)

Good to see you again guys, i've been away for quite some time.

12:49 ص  
Blogger karakib said...

Hafsa
ربنا يخليكي اهتمامك بعيدا عن البلوج و الكلام المكتوب هنا بيسعدني جدا شكرا ليكي يا حفصه
انتوك

1:21 ص  
Blogger karakib said...

Desert Rose
فعلا كلنا بنحافظ علي راسنا فوق الميه :) ده حقيقي بنحاول يا خوفي لا الميه تعلا عن كده
كنتي في نفس الكليه ؟ صدقيني الداخل مفقود و الخارج مولود :) و انت عندك خمس سنين دلوقتي :)
انتوك

1:23 ص  
Blogger karakib said...

frozen love
فالهرم !!! صحيح اللي يشوف بلاوي الناس تهون عليه بلوته :) الا هو كل البلوجرز طلبه في هندسه و لا ايه :) ؟؟
انتوك

1:24 ص  
Blogger karakib said...

bluestone
طلعنا جيران بجد ؟؟ ياااه و انا عمال اقول المنطقه منوره ليه ... ليه و اذا عرف السبب بطل العجب ... :)
لما تاخدي وزارات في الاستقلال ما تنسينيش الحقيقه انا نفسي في معاش مبكر جدا و ده نظام لازم يتطبق علشان اللي عالمعاش دول يا بختهم بيناموا براحتهم و بيقعدوا عالقهوه و يخرجوا برضه براحتهم يا بختهم بجد :)
انتوك

1:27 ص  
Blogger karakib said...

Eanass Abouzeid
امسك ... اتوبيس فاضي !! ده انا بقي بقالي كتير ما نزلتش من البيت ده حتي 11 و 1 و امثالهم من الميني الباص المكيف ابو 160 قرش و البريزه قبل الجنيه و نص ... زحمه جدا !! و مترو الانفاق كمان ... طب ده انا خايف التاكسيات تتزحم قريب !
ربنا يستر انت عايش فين ... ؟ هاه انا عايز اعزل عندكم !!
اتوبيس فاضي !! صحيح اللي يعيش ياما يشوف
ده حتي المستحيلات الثلاث ... العنقاء و الخل الوفي و المش عارف ايه بتاعتهم دي الغول باين كلهم بدلوها بالاتوبيسات الفاضيه من زماااان
انتوك

1:31 ص  
Blogger karakib said...

Misho
وحشتني يا عم ميشو .. انت فينك من زمان ؟ ربنا يخلي لك دليله و لا يدللها عليك الا في كل خير و ان تسمع صوت الموتور دائما سليما معافا زي الفل و ان يركب لك اسطوانه دبرياج من الزبرجد الاحمر ... لكي لا يعطب ابدا و فرامل من العقيق الاخضر تحميك من السرعات العاليه :) و بنزين لا ينتهي ابدا ... و اجعي لنا بقي نركب اتوبيس فاضي و لو لمره واحده :)
انتوك

1:36 ص  
Anonymous غير معرف said...

انا متعودة اتخيل المواقف اللى بقراها او بتتحكالى

بس بجد بجد....ياريتنى ماكنت بعرف اتخيل

خصوصا مع الراجل الكمسرى المؤرف دا

كان لازم يعنى تحكى بالتفاصيل؟

12:23 م  
Blogger karakib said...

dandana87
سيدتي لو كنت حكيت لك بالتفاصيل فعلا كنت قرفتي اوي اوي
اكتر من كده
ما تستغربيش اصله لما الواحد يبقي ماشي فالشارع و يلاقي واحد بيعمل اخخخخخخخخخخخخخخخم تفوووووووه
هتعرفي قد ايه انا كنت قاعد قرفان و لا لما واحد يلبس وجه التعفف الزائف و يقولك عيب كده انت واقف وسط حريم و هو اصلا واقف وسطهم يقرفهم و حاجات كتير لا داعي للخوض فيها علشان مقرفه فعلا فعلا ...
عادي بقي و عموما حقك عليا مش هاحكي عن الحاجات دي تاني هابقي احكي عن حاجات حلوه بس :)
انتوك

12:32 م  
Blogger Elsede3' said...

rekebto marra
we mesh hatetkarrar isA
seebak tab3an men 40 elly law za2etoh besba3ak hayet2eleb na7yet elyemeen, welnas elly beto2a3 barrah 7'ales ma3a awel matab...mesh kefaya 3aleena handasa????

12:45 م  
Blogger karakib said...

Elsede3'
فكرتني صحيح انت بتشوف الاتوبيسات اللي مايله بزاويه 60 درجه عالاقل علي جنبها و ماشيه و مليانه ناس و بتوقف و تجري و كل ده و هي مايله ؟
شفتها ؟
:)
حاجه تجيب العصبي
انتوك

1:51 م  
Blogger sarah la tulipe rose said...

هههههههههههههههههه
ضحكتني جدا
احنا عندنا خيبة الامل مش راكبة جمل بس لأ راكبة ديناصور
بس وصف الكمسري فظيع فعلا! و عادي التبجح سمة الفاسدين ماهو رب اليبت بالدف ضاربا
طبيعي لما يشوف الاكابر بتوعنا يبيعوا عمر افندي و غيره برخص التراب و مش مكسوفين لازم يعمل كدة

6:07 م  
Anonymous غير معرف said...

بس اكيد تلاحم قوى الشعب العامل ده حاجة حلوة برضه .. يعنى الواحد ساعتها بيشعر بالانتماء لشىء ما .. مهما كانت ريحته معفنة او بيحب ياكل كرنب كتير..بيحس انه مش منبوذ بل بالعكس فى ايام السقعة ناس كتير بتحب تلتصق بيه ..حاول تبص للنصف الممتلىء من الكوب ..
وصباحك لذيذ

6:17 م  
Blogger Epitaph said...

loooooooooool

يا سيدي اتوبيس اربعتاشر ده
باشوفه بيعدي قصاد كليتي
و مبعرفش انط فيه من البشر اللي خلاص بتقع منه
و المرتين اللي ركبته فيه كانت مأساة
انا بادعي ربنا اني متحوجش ليه ابدا
خاصة اني بانزل منه و اركب تاكسي عشان اوصل البيت هههههه
الحمد لله علي نعمة اتوبيس الجامعة و عم سيد برضه زي بتاع لست ادري

اه علي فكرة النا فيه مرة قعدوني في 14 ده علي الارضية اللي جنب السواق

انا باتبهدل فيه بصراحة

هههههه

و احب اسجل من منبري هذا
ان المواصلات صهلة و الرغيف كبيييييير
:)))

9:09 م  
Blogger IRC President said...

Are you in Mechanics karakib? I know someone in 2nd year in ASU (H).

Anyway do you know that even in 794 (el mokayaf) sometimes I do some acrobates in it? kolena fel hawa sawa :D

1:32 ص  
Blogger IRC President said...

And btw, how is the Toroos project :P?

1:32 ص  
Blogger karakib said...

sarah la tulipe rose
النظره اللي كانت في عينيه يا ساره تخلي الواحد يحس انه هو الغلطان لأنه بيشوف هو بيعمل ايه قله ادب يعني كأني باشتمه مثلا !!!

--------------------------
Immature
التلاحم مش لذيذ خالص لأنك مش بتبقي شايف قدامك و لا وراك و لا فوقك و لا تحتك انت بتبقي فعلا بتحاول تحافظ علي راسك فوق الميه علشان تعرف فاضل قد ايه و تنزل و علشان ما تغرقش :)

---------------------------
انتوك

1:37 ص  
Blogger karakib said...

Epitaph
الرغيف كبيييييييير و المواصلات سهله و من هشام و ماجد و هاني الي الاستاذ ثابت جوز خالتو اميره البحراوي بنهدي اغنيه سوق بينا يا سطي و بنطمن خالتو اميره ان مرتب المعاش اتقبض .. فكرتيني بفقره الاهداءات اللي بتيجي فالتليفزيون و الراديو و قريب اوي هتكلم عنها ... :)

---------------------------
IRC President
انا في تانيه اصلا شكلك انت كمان في تانيه ما انت بتسأل عن المشروع اسمي هاني جورج لو في يوم فاضي تعالي شرفني يا هندسه ده واضح ان الكليه كلها مدونين بقي :) المشروع انا لسه ما ضربتش فيه قلم لحد دلوقتي صدقني :)
-------------------------
انتوك

1:44 ص  
Anonymous غير معرف said...

السلام عليكم
مش عارف أنت محسساني أنك لسه مولود أول أمبارح
مش فاكر أيام زمان لما كنت بتعيط لو خارج مع أي حد علشان متركبش الأتوبيس
المهم كويس طلعنا قرايب شبراوية
و لو عايز تتطلع علي ملحمة حقيقة أتجه إلي الأختراع الرهيب الذي يدعوه الجهلة بالمترو
ده فعلا الملحمة أنا كنت من الرائدين في جامعة حلوان
أنا كنت يدوب الحاجة الوحيدة اللي بعملها بمزاجي إني أصحي و بقوة الدفع من الشعب أجد نفسي بقدرة قادر في المدرج إزاي حتي الأن لا أعلم
و العودة للبيت لازم تفتش نفسك الأول قبل الدخول للبيت لأحسن يكون في عيل صغير شابك فيك الكلام ده مش تهريج
عاوز قصة بطولية فعلا خلي المترو يتأخر خمس دقايق مش هقولك ساعة
تحس فعلا إن شعب مصر ده فعلا شعب يتحمل القاسية حقيقي
غير العطور فرنسة الإيحاء و غير الأجهزة الغريبة التي يحملها البشر غير غير مش هطول عليك
سلام و سلملي علي المترو

3:35 ص  
Blogger karakib said...

No Fear
لأ لأ و انا جيت جنب المترو او اتكلمت عليه انا !! مالي انا و مال المترو ده الهرم الرابع يا بني انت شكلك كده من الحاقدين علي فكره و من اعداء النجاح ... ليه كده ؟ ده مترو الانفاق ده مشروع مافيش زيه و احساساك و انت راكبه مافيش زيه تكييف سخن من مناخير اللي وراك في قفاك و جلسات مساج طويله حسب المده مجانيه تماما ... ده غير انه ساعات الساونا بتبقي شغاله علشان تجري الدوره الدمويه و تخسسك لو تخين و تخفيك لو رفيع ... يا سلام عالمترو و جمال المترو لأ لأ 14 فعلا جنبه هو اللاشيء ... بس انا باركب 14 اكتر و لذلك استفزني هو و 710 يعني انما لو عالمترو الوضع هيختلف و ان شاء الله هتكلم عن جمال المترو قريب ...
انتوك

2:47 م  
Blogger smraa alnil said...

هههههههههههههههه
حلو اوي الانتري دي
اتوبيس ليه هو انت فقير
اركب تاكسي العاصمة اللي لما تفتح بابه بس تدفع 3 جنية
يا نهار ابيض 3 جنيه دول شوف يجيبوا كام سندوتش فول
وبعدين ما تاخدها مشي يا سيدي زكي عن صحتك وعافيتك
وماله السي تي ايه
مكيف وحلو والولاد بيركبوه مع البات عشان يعملوا فيه قلة ادب
بلاش ماله المترو فله وفيه كل حاجة انت عايزها
يعني من الاخر مش هتتعب نفسك لا انت طالع ولا انت نازل
انت سيب نفسك خالص واقف بي مع الشعب
هتلاقيك متشال علي كفوف الراحة وطالع المترو لوحدك
انا مش عارفة ايه اللي جبرك علي كدة
ما الياة حلوة اهي وانا حليتهالك وقلتلك علي اكتر من مواصلة
وبرضه مش عاجب
اعملك ايه يعني اجيبلك الطيارة الهيلوكوبتر بتاعت دادي
هههههههههه
الله يرحم جدي

3:55 م  
Blogger tamer said...

هو بس اتوبيس 14 دة كل اتوبسيات النقل العام ممكن يتعمل عليها افلام وينكتب فيها قصائد شعر كمان

ربنا يعين

تحياتى

4:06 م  
Blogger karakib said...

smraa alnil

هو من جهه اني باركب 14 مش علشان حاجه صدقيني الهليكوبتر فوق السطح و الكرايرا و اللامبورجيني و البوكستر و الفيراري فالجراج ... لكن انا بحب اعيش معاناه الشعب و اقعد عالقهوه و اشرب شاي و الكلام ده ... تغيير صدقيني انت بس سيبي الهليكوبتر بتاعتك كده فوق السطح يومين و انزلي اتمشي علي رجليكي هتحسي باحساس ووواووو مختلف عرق بقي و الناس عرقانه بقالها سنين كده و مش مستحميين خالص و محدش حاطط برفانات ... تخيلي!!
لعلمك بقي تاكسي العاصمه ده اي كلام كله عربيات اي كلام و ما يعجبش خالص بلونه الاصفر الفاقع ده انا رأيي في شركات ليموزين افضل كتير منه و تمنها مش غالي اوي علي فكره الضعف بس ... شوفتي بقي ... مش سهل خالص الواحد يصرف الفلوس :)
انتوك

7:40 م  
Blogger karakib said...

tamer
فيلم عن الاتوبيس ؟؟ ده هيبقي فيلم نكدي اوي و اسود من قصص شكسبير و شارلز ديكنز يا راجل ليه افلام كئيبه كده و اتوبسيسات و مترو و الحاجات دي ؟؟ انا رأيي نعمل فيلم عن شاب نزل يدور علي وظيفه فلقي عشره ... او ممكن فيلم عن شاب فرحان و مبسوط علي طول زي بتوع الاعلانات كده (مهبل فنفسه)
لكن فيلم عن المواصلات العامه لأ لأ لأ يا راجل ما يصحش كده هي الناس ناقصها يا عم تامر ؟

انتوك

7:43 م  
Anonymous غير معرف said...

حلوة أقوى الملاحم الوطنية دي 00بس ربنا يفك البنيان بتاع الملحمة ده ويسترها على عباده 00الزنقة وحشة 00مش كده برضه؟00

12:40 ص  
Blogger مُزمُز said...

يبدو أنه قد آن الأوان لكي أجرب الأتوبيس العام

لابد أنها سوف تكون تجربة فريدة

بوست فعلا بديع

3:14 ص  
Blogger karakib said...

د/أحمد المصري
الحقيقه يا دكتور الزنقه صعبه جدا جدا ربنا يسترها علينا و يفكها لحسن الزنقه الكتيره وحشه اوي ما يعرفهاش الا مرتادي 14 :)
---------------------------
---------------------------
مزمز أو موزة
ايه ده بقي لقد ان الاوان ده ؟؟يعني ما ركبتش ابدا ؟
انا كمان علي فكره ... علي طول رايح جاي بالسواق و الرولز رويس بتاعتي بس اعمل ايه كل يوم احلم اني راكب 14 كل يوم ...قمت قولت اكتب عنه بوست بقي ... و بيتهيألي انا كمان أن الاوان اتوقف عن الحلم ده .. قصدي الكابوس
---------------------------
---------------------------
انتوك

5:38 ص  
Anonymous غير معرف said...

عبدة باشا و شبرا !!!!!

اخي في هندسة ميكانيكا و بردوا ساكن في شبرا ... بس عمرة ما حكي لي عن مغامرات اتوبيس 14 دا
الظاهر بياخد حاجةتانية للكلية

البوست رائع و بيفكرني بايام الحشر بس في مترو الانفاق ...ايام كا كنت لسة بدرس و بروح الكلية

بس كان حقتك كنت تسمي خيبة الامر راكبة "14"

ما خالص تحياتي :)

9:17 م  
Blogger karakib said...

شــــمـس الديـن
شمس باشا ... ازيك ؟ اخوك معايا فالكليه يا مرحبا يا مرحبا ده الكليه كده نورت تلاقي اخوك تعبان بس كاتم في قلبه يا عيني حاول تخليه يفضفض علشان ممكن يتعب كده :)
انتوك

10:03 م  
Blogger مُزمُز said...

لا لا لا أنا مش قصدي كده خالص مالص

أي نعم بابي جايب لكل واحد فينا طيارته الخاصة

بس أنا متواضع مع العامة من الشعب وبعطف عليهم مووووت

أصل بابي بيخوفنا من ثورة البروليتاريا ولا اسمها ايه دي

باي باي بقى

10:23 م  
Blogger karakib said...

مزمز أو موزة
البلوريتاريا ... ده نوع دوا و لا اسم سندوتش :) عارف انه في بينا ناس كتير اوي لا تفهم هذه المصطلحات من نوعيه برجوازي و بلوريتاري و الكلام الكبير ده :)
انت عندك طياره خاصه ؟؟
زيي يعني بس انا راكنها علشان مش لاقي بنزين خالص راكنها و الموتور جاب وش سلندر و عايزه اربع مقصات بعد ما خمست بيها فوق كوبري الساحل من يومين :) تعرفش ميكانيكي طيارات كويس ؟؟


انتوك

1:08 ص  
Blogger واحدة وخلاص said...

"الاتوبيس بفضل انفه التي ظل يسلكها باصبع يده ليخرجه و يضعه بين اصابع اقدامه ثم في فمه ليعود لانفه"
حرام ....حرااااااااام
ليه تعمل فينا كده ؟
مدونتك جميلة انا كمان اول مرة اجى
ماسعدنيش الحظ انى اجى هنا قبل كده
بس بجد اسلوبك فى التصوير حلو جدا

1:21 ص  
Blogger karakib said...

واحدة وخلاص
انت اول مره تيجي هنا صح و انا اقول النور ده كله جاي منين المدونه نورت يا فندم بيكي
الحقيقه انا عايز اقولك اني فعلا لم احاول الامعان في التشبيه للراجل علشان الناس تقدر تقرا للأخر لأنه فعلا كان بيعمل حاجات غريبه و شكله غريب و كان نفسي احلف له انه الميه مش غاليه كده و ينفع يبقي يستحمي مره فالشهر يعني مش لازم ييجي علي نفسه ده غير اني كان نفسي ارجوك البس الجزمه ارجووووك مش قادر المكان مقفول و انت قالع جزمتك و الريحه صعبه صعبه اوي كنت هاعيط من الريحه و المنظر كان شيء فظيييييييييييع و بيحصل بأشكال مختلفه كل يوم !!


انتوك

3:12 م  
Blogger واحدة وخلاص said...

ده نورك انت يا فندم المدونة منورة بصاحبها واسلوبه الجميل بس
انت بجد مشكلة
طب افرض الراجل ساكن فمدينة نصر يعنى معندهوش ميه طول النهار مش لازم تلتمسله العذر او ساكن فى المرج والمناطق العشوائية التابعة ليها فالميه -اذا جت يعنى -بتنزل من الحنفيات سووووووووووودة ومليانه طين ومختلطة بالصرف الصحى لدرجة ان الصرف الصحى بقى هو الاصل والميه بتاعة الادميين ( اذا كان فيه حاجة زى كده فمصر) هى اللى دخيلة على الصرف يبقى معذور بقى ولا لا لما يخاف على نفسه وميستحماش لمجرد ان المية اللى مبيشوفهاش مش غاليه
وبعدين مخطرش فبالك انه ممكن يكون لابس الجزمة فعلا بس هى مقطوعة من كل ناحية فسربت الريحة دى
الخلاصة انك متتوقعش تصرفات ادميه من ناس لا تعامل باى ادمية فوطنها
وعلى فكرة انت دمك خفيف جدااااااا بجد

8:48 م  
Blogger karakib said...

واحدة وخلاص
ده من ذوقك يا فندم ربنا ييخليكي ... علي فكره التدوينه دي تم نشرها في جريده الدستور ... بتاريخ
29-11-2006 لو اتكلمنا عن مشاكل البلد هنلاقي كمية حاجات تضحك مش طبيعيه ...
و كم في مصر من مضحكات
و لكنها مضحكات كالمبكيات


هاني جورج حليم

9:15 ص  

إرسال تعليق

Links to this post:

إنشاء رابط

<< Home