الأربعاء، يناير 18، 2012

لسعت خلاص

محمد علي لسه في البانيا بيبيع سجاير في الكشك بتاعه و المماليك في كل مكان بيتصارعوا في شوارع المحروسه علي اخر شوية كوينات فضة من ام ربع جنيه , الفرنسيس رحلوا خلاص من سنة فاتت و خورشيد باشا قاعد في القلعة فوق مش عارف حاجة من اللي بتحصل تحت , سعد زغلول لقيته واقف لوحده شرق النيل و عمال يلف , كان بيسأل الناس ميدان طلعت حرب من فين علشان كان بيدور علي قصر عابدين , كان واخد ميعاد من عرابي علشان يروحوا سو...ا يشخروا للخديوي اسماعيل و مصطفي النحاس كان مصر يقول للعرابي اقتل توفيق ده هيمسك البلد بعد اسماعيل و يسيب الانجليز , عمر لطفي كان بيحشد العربان و البدو من حوالين اسكندرية و امر عسس الشرطة ينزلوا من غير سلاح علشان تحصل مدبحة و الاسطول الانجليزي يخش بعد ما يحرجوا عرابي , وسط كل ده التليفزيون المصري كان بيعرض فيلم تحشيشي عن الملك منقرع , و الحاج ابراهيم بيتقرع بعد بق من البيبسي كانز ... ايه سفن ايه
###
ايمن نور طلع من بلكونة مكتبة فجأة و نده علي سعد باشا , يا باشا يا باشا , قام سعد بص فوق و قال له نيله عليك و علي السيد البدوي , فدخل جوا تاني و قعد علي كرسي رئيس البرلمان في البرلمان الموازي بتاعه , و في الوقت ده كان في اتنين نشطاء قاعدين ف...ي نفس العماره في النادي اليوناني واحد بيقول للتاني علاء الاسواني قاعد في نادي السيارات بينحت قصة عن رواده زي ما عمل مع بتوع استوريل بالظبط , و هياخد جوايز و هاتترجم , قوم يسمعوا المظاهرات هاجت تاني ينزلوا ينضموا ليها و يلاقوا نفسهم بالصدفة يوم جمعة قندهار و قزازة النبيت الروزيه لسه في ايديهم , فيقفوا يشربوا وسط الصينية و هما بيتفرجوا علي مصر في زمن المسخ و لما تخلص القزازة يروحوا علي محل الاقصر قدام الجريون يشتروا قزازة زبيب مضروب و يكملوا شرب , و يخرج في اللحظة دي محمد علي , ماسك في ايدة سيجارة ماليمبو صيني من اللي دخلت مصر بعد الثورة , يشد تفه و يقوم تفف عالارض و يسأل النشطاء قدام الجريون , هو القلعة من فين , فيقولوا له حسب انت قلعتها فين , فيضحك و يركب لركب و يطلع عاليونان بدل ما يروح عالاستانة , بس بعد ما يبيع كليته علشان مقاول التسفير في ليبيا كان عايز خمستاشر الف جنيه , و علي رأي الاسطي زلطة عابوكو كلكم
###
ينتقل المشهد فجأة لعام 2015 و ميدان التحرير قاعد في الصينية فيه مجموعه من اهالي الشهداء بتوع سنة 2021 و احمد شفيق يظهر فجأة لابس حلة علي دماغة و بدلة مشرشرة الوان كتير , و يقف علي منصة الاخوان قدام هارديز وسط تهليل الحرافيش , و يقول لهم , ا...نا عمري ما خفت من المشير انا ول عمري جامد جدا و باطير , و يقوم ناطط من عالمنصه العالية , رجله تتكسر و واحد من بتوع الموتوسيكلات يشيلوا يوديه المستشفي الميداني يلاقي الدكاترة رافضين يعالجوه و مطنشينه و كل ما يسأل حد منهم هتعالجوني امتي يقول له ... سووون يا شفيق ... سوووون
###
علاء الاسواني ساعتها هيبقي قاعد علي سوق الحميدية بيكتب عن الناس اللي فيها رواية برضه , و فريد الديب جاب سيجار اكبر من اللي معاه لدرجة انه بيمشي اتنين محامين تحت التدريب قدامه علشان يسندوا السيجار بتاعه ما يقعش , و طبعا الاتنين محاميين دول بيروحوا شبه محروقين بس هما مبسوطين من الشغل مع الاستاذ , حسني مبارك هيكون رفع قضيه علي صاحب قهوة في الازهر لأنه مش عايز يعلق صورته و حط بدالها صورة بطيخه و حواليها عنب و موز و موكل فريد الديب علشان يتابع القضية و هو رفع ضهر السرير فبقي عامل زي الكرسي كده و سابوا له القاعه في اكاديمية الشرطة علشان يكمل فيها قضيته بتاعة انه الناس بتنزل صورته و تعلق مكانها حاجات تانيه

2 comments:

Blogger ياسمين حميد said...

مبروك اللسعان. عقبالنا.

9:29 ص  
Anonymous غير معرف said...

عليا المهدي
من ضمن مصابين الثورة
مواطنون لسعوا من الأحداث العبثية التي تحدث في الساحة
مع التمنيات بالشفاء العاجل :)

3:59 م  

إرسال تعليق

<< Home