الثلاثاء، يناير 01، 2008

مش مكسورة .. بس هنجبسها



الجو شتوي هاديء مناسب لنهايات العام ... بلا مقدمات تلسعني صواريخ الهواء التي تنفذ من فتحة الزجاج في شباك الميكروباص .. احتمي بكوفيتي السوداء الناعمه منها ... نوبة من الصمت المفاجيء في الشارع جعلتني اتأمل قفا السائق و شعره الاسود المختلط بشعيرات بيضاء متناثره غير قليله ... فتح مسجل سيارته و كأنه يقاوم الهدوء .. صوت جورج وسوف .. لا عجب في ان كل سائقي الميكروباصات يحبونه .. يشبه صوته ازيز محركات الجاز التي يركبون فوقها طوال النهار .. اجلس علي كرسي مائل بزاوية الي الامام خلف السائق ... و في كل فرملة انزلق فوق كسوته من المشمع الرخيص .. فارتكز علي كعب قدمي اليمني لأعود الي الخلف .. نظرت من الشباك ... هنا توجد ناصية مستشفي شبرا العام حيث اصطحبتني عمتي لزميل لها يعمل كطبيب عظام .. كنت قد ضربت بكف يدي بعنف في الحائط اثر نوبة غضب عارمة فتورمت .. و المتني كثيرا بعدها
نظر هذا الطبيب الي انفي و ليس عيناي عدة مرات .. و عاد لينظر الي الاشعة السوداء فوق الصندوق الخشبي الذي يوجد في مقدمته جزء منير دون ان ينبث ببنت شفة ...ثم قال لي .. مش مكسورة بس هنجبسها .. قالها هذه المرة دون حتي ان يكلف نفسه عناء الالتفات برأسه الي ... لم افهم لماذا يريد تجبيرها و هي غير مكسورة .. و لماذا لا ينظر الي عيناي و هو يكلمني و كأنه احد ضباط الشرطه يطلب رخصة القيادة ... او احد تجار التقسيط بشارع عبد العزيز ... وددت ان اقول له ان يدي تؤلمني بالفعل و لكنني لن اضعها في جبيرة .. و أن ذراعي لا زال قويا بما به الكفايه لخلع رأسك من مكانه ما دمت لا تنظر الي اثناء الحديث ... و لكن لحسن حظه انه قرر تأجيل فكرة الجبيرة لأسبوع بعدها ... و تعافت يدي و لم احتاج لجبيرة

لازلت في الميكروباص منتظرا وصولي الي درس الاجهاد ... ليس غريبا .. المادة المقررة علي اسمها اجهادات
يظل الرجل يحكي لنا قصصا مملة عن اعمده معدنيه تستطيل و تقصر و تنكمش ... و في بعض الاحيان تنحني .. و لا مانع من دخول ابطال جديدة في قصصه الممله مثل التروس و الثقوب و الجلب ... ليس غريبا انهم يسمونها بالانجليزيه ... سترس ... اجهاد ... فتلاوة نفس القصة العديد من المرات عن عامود معدني يتشوه قليلا .. و علي ان احسب مقدار التشوه به لهو شيء مجهد ... مجهد بحق
بالامس حلمت حلما اخر لست انا بطله .. غريب امر ان اكتفي بدور المشاهد .. تقريبا في معظم احلامي .. اظل انا الراوي او المشاهد دون ان اتدخل في الاحداث

رأيته بالامس يقف في شرفتي يتأمل السماء و ينتظر حدوث شيء ما ... وقفت امامه عصفورة ملونة .. و عرضت عليه ان يتبادلوا الاجساد بشرط الاحتفاظ بالارواح و العقول ... فيوافق هو
تنقر العصفورة عدة مرات بين عينيه ... فتنسحب روحه منه مكونة الوان منيرة زرقاء و صفراء و بيضاء ... تخرج من انفه و عينيه و اذنيه ... و تدخل الي العصفورة من عينيها ... و يغيب عن الوعي لدقائق .. ليعد مرة اخري و لكن في جسد عصفور لديه حرية الطيران ... يطير سعيدا بما حصل عليه مؤقتا ... و عندما يعود بجسد العصفور قبل الغروب ...يجد احبال الغسيل في شرفته ... متشحه بالسواد .. فيدرك أن جسده و روح العصفور قد زهقوا .. و عليه ان يتقبل الامر ... فيعاود الطيران فاقدا جزء من سعادته لعلمه بأنه لم يعد امرا مؤقتا
انهي كتابة هذه التدوينه و انا فوق مرتبة سريري الاسفنجيه الجديدة ... اغوص بداخلها فتختضنني و انا نائم ... في اخر مرة شعرت باحتياج لان احتضن احد ... احتضنت نفسي .. وضعت ذراعاي حول اكتافي .. و لكنني لم اجد كتف يمكنني وضع رأسي عليه ... فادركت عبثية الفكرة ... و تخليت عنها

انا هنا تحت الاغطيه هروبا من القنوات التليفزيونيه ... مستقبل الاقمار الصناعية معطل ... و علي ان اشاهد القنوات الارضيه .. في القناة الاولي مجلس الشعب ... اول ما رأيته ... شممت رائحة سيئة لم اتبين مصدرها ... فقلبت القناة .. وجدت فنان تشكيلي .. هكذا عرفه المذيع للمشاهدين ... كان يتلو شعرا ... من نوعية الحلزونة ياما الحلزونة ... اغلقت التلفاز لأن الرائحة ازدادت بشدة ... كنت قد وضعت قدمي تحتي لأجلس مربعا اقدامي ... و كانت الرائحة السيئة تأتي من اصابع قدمي ... فقمت لأغسلها و أنام

لدي فضول لمعرفة ماذا سيحدث للعصفور الذي يحمل روح رجل ... حان موعد بروفة الموت ... النوم ... اتبتل استعدادا للبروفة بأغنية مع صديقي القديم .. منير ... بعد ما أدي و بعد ما خد .. بعد ما هد و بني احتد .. شد لحاف الشتا في البرد .. بعد ما لف و بعد ما دار .. بعد ما هدي و بعد ما صار .. بعد ما داب و اشتاق و احتار ... حط الدبلة و حط الساعة .. حط سجايره و الولاعه .. علق حلمه علي الشماعه .. شد لحاف الشتا علي جسمه .. دحرج حلمه و همه و اسمه ... داري عيون عايزين يبتسموا .. داري عيون عايزين يبتسموا .
كل سنة و انتم طيبين .. النهار دة عام جديد 2008 .. في ناس بتقضيه في جزيرة القرصاية تضامنا مع سكانها ... و ناس بتقضيه مع هيفاء وهبي و محمد حماقي ... و ناس بتقول حرام نحتفل بهذه المناسبه ... وناس في الاوبرا مع الكينج منير ... و ناس تانيه زيي كده ... بتقضيه في جزيرة القطن ... اللحاف سابقا

------------------------
امانه عليكوا ... لو حد شاف الكرة الارضية ... يقول لها ... الله يخليكي دوري بالراحة شوية .. اصل بجد 2007 خلص بسرعة اوي

43 comments:

Blogger بندق و بندقة said...

اول تعليق :)
كل سنة و انت طيب يا هاني الجميل و يارب 2008 تبقى سنة سعيدة عليك .. مبروك المرتبة الجديدة :) كل سنة و انت احسن و كل سنة و كل حاجة في الدنيا افضل

10:25 ص  
Blogger Gid-Do - جدو said...

عزيزى هانى

هكذا انت تضيف دائما رائعة تلو اخرى على هذة الصفحات وكان دراستك لعلوم الهندسة الجافة تفجر داخلك ينابيع الابداع الادبى ـ كل عام جديد وانت بخير وكل 7 يناير وانت بخير وامنياتى لك ان تحقق كل احلامك ـ وسيب الزمن يجرى لان بكرة احسن من النهارة

4:57 م  
Blogger ŞoŖśậŖấầ said...

يااااااه ايه الاحلام الجميلة دى

انا بحب جدااا عالم الخيال وبالذات بقى لما يكون فى صورة ابداع ادبى بالشكل دا

وكل سنة وحضرتك طيب



__??_??
_??___??
_??___??_________????
_??___??_______??___???? H
_??__??_______?___??___??
__??__?______?__??__???__?? A
___??__?____?__??_____??__?_____
____??_??__??_??________??
____??___??__??
___?___________? P
__?_____________?
_?____?_____?____? P
_?____/___@__\\___?
_?____\\__/?\\__/___? Y
___?_____W_____?
_____??_____??
_______????? NEW
YEAR 2008

8:02 م  
Blogger Carol said...

جزيرة القطن
حان موعد بروفة الموت ... النوم

أثاروا إعجابي تلك الكلمات
الأولى شعرت اتجاهها بالدفء و الأخرى بالسكون و الهروب
بوست مليء بالأحداث زحمة و لكن يبدو ان سنة الماضية ليست سيئة الحمد لله

12:14 ص  
Blogger نهى جمـال said...

يشبه صوته ازيز محركات الجاز

....

بقول كده برده والناس بتقول عليا غريبه :)

بوست أليف جدا

حسيته وأمتعني

تحية

12:55 ص  
Blogger karakib said...

بندق و بندقة

كل سنة و انت فادي يا فادي
تصدق ما كنتش عارف ان انت صاحب التعليق الا لما رحت مدونتك
الاسم المستعار ما فهمتوش :)




Gid-Do - جدو

و حضرتك بخير وطيب يا احلي جدو و اتمني اشوفك في القريب ان شاء الله
توصل بالسلامة يا جدو
مبسوط انها عجبتك :) يا رب دايما

6:29 م  
Blogger karakib said...

ŞoŖśậŖấầ

و انت طيبة و بخير بس عايز اقول لك اني مش حضرتك خالص انا اكبر منك بسنتين بس :) يا رب يكون عام سعيد علينا كلنا


نهى جمـال

ده وصف محترم جدا لصوته
اصل كل اللي بيسمعوه من كبار ضريبي المخدرات !! لازم علشان يستحملوا الزن و المقاوحة دي كلها في الغنا يكونوا شاربين حاجه
و استحاله تكون قهوة مظبوط طبعا

6:32 م  
Blogger karakib said...

Carol
السنه الماضيه و اللي قبلها و اللي قبلها لم يكن ايا منهم سييء الحمدلله
و ات طيبة يا كارولين و الاسرة كلها بخير

6:33 م  
Blogger يا مراكبي said...

و2008 هيعدي أسرع من كده كمان

بكرة تشوف

2:08 ص  
Blogger ست المرتفعات said...

ياااه
ايه الدفا دا ياهانى

كل سنة وانت بالف خير
:)

لولا

2:34 ص  
Blogger The Alien said...

أوعدك لما أشفها هقلها

تحياتي
وكل سنة وإنت طيب

2:16 م  
Blogger شــــمـس الديـن said...

كل سنة و انت طيب با هاني بمناسبة اول ا لسنة و الكريسماس و 7 يناير

و حلوة اوي النهاية بتاعتك ...ناس بتقول حرام و ناس مش عارف ايه
:)))


بس هي علي فكرة الاحلام مش بتكمل ... هويس ان انت احلامك منطقية
بس العجيب انها احلام ادبية زييك

دمت بكل ا لخير شد في الامتحانات

12:05 ص  
Blogger توتة توتة said...

الاغنية دي لايقة اوي على راس السنة و على وضعنا و على روحنا الاغنية دي لايقة اوي علينا

كل سنة و انت طيب و كويس كل سنة و انت من غير استرس

12:31 م  
Blogger sofinqoraso said...

كل سنة وانتى طيبة وإن شاء الله 2008 هتبقى أحلى
معظمنا قضى راس السنة فى جزيرة القطن فمتقلقيش انتى مش لوحدك
كل سنة وانتى بخير

11:21 م  
Blogger بنت القمر said...

كل سنه وانت طيب
سهرت في البيت ؟؟الحمدلله مشفتش انجي علي المبدعه في دريم مع المبدعه سميه الخشاب والموهوبه مي سليم!!!
الحمدلله انها عدت2007
وعقبال اللي وراها
يلا خلينا نخلص بقا
عشان مستعجله طحن
اصل الكرة الارضيه وهي بتلف دوختني موت ولا ملاهي دريم بارك
او يبدو ان الكبالن عندي مش مستحمله الدورانات الجامده
تحياتي

9:21 ص  
Blogger بنت القمر said...

عيد سعيد...

12:56 م  
Anonymous Basma said...

أولا كل سنه وأنت طيب ومصر تعود طيبه وبخير
ماتزعلش علي سهره رأس السنه أنا عن نفسي قعدت أشتغل من الزهق

لكن أيه ده؟؟ أتنرفزت ... خبطت أيك كسرتها؟؟؟
لأ .. وأنا من فتره بأقول لفارس دماغه حلوه ... ماتيجي نرتبله طريقه يقابل بيها (....) دي صاحبتي وعروسه زي الفل وموزه
هههههههه .. طبعا رجعت في كلامي أنا أخاف علي البنت
تحياتي وألف سلامه

2:08 م  
Blogger HafSSa said...

مع اني كنت مع الناس اللي في الاوبرا مع منير
و مع اني سمعته و هو بيغني نفس الاغنية اللي انت كتبتها
يعني المفروض اني نهيت سشنتي نهاية سعيدة
الا اني بكيت لما قريت كلامك
ليه مش عارفة
هل بكيت على الطير اللي مات؟؟
ولا بيكت على السنة اللي عدت بسرعة و ليه ايدي مصرة تكتب سبعة بدل تمانية ف يكل ورقة شغل بكتبها
ولا على ايه بالظبط؟؟؟
كل سنة و انت طيب يا عزيزي
التدوينة دي فاقت جميع ما كتبته روعة و سحر
تحياتي و الف سلامة على ايديك
شكلك ميدلش انك قوي الغضب للدرجة دي
تحياتي كمان مرة

12:15 ص  
Anonymous غير معرف said...

http://acropolisreview.com/2008/01/january-11-2008-guantanomo.html

2:41 ص  
Blogger يَحيى المِصري said...

كل سنة و إنت طيب يا هاني
عيد ميلاد مجيد

12:24 م  
Blogger VioLotus said...

Hi
remember the alien who talked with you some weeks ago? The only one who gave you ever a younger age than the actual yours? lol, that;s me ^^
That's a very cute blog, but I wanna know, If
اذا كانت ايدك بقت كويسة من غير حاجة بعدها باسبوع، ليه كان عايز يجبسها؟ هو بيمارسها كهواية مثلا؟

::Happy New Year::
^>^

5:22 ص  
Blogger film69 said...

كل سنة وانت طيب يا هاني
عيد سعيد
الكون كله بيدور
واحنا وياه بندور

7:15 ص  
Blogger No Fear said...

مستنيكم يوم الخميس في مكتبه البلد أمام الجامعة الأمريكية الساعه 6 علشان حفل افتتاح موقع دار الكتب هذا الموقع الأول من نوعه

و لنشارك جميعا مصطفي الحسيني نبع الأفكار في رؤية حلمه يتحقق

12:36 م  
Blogger david santos said...

Happy New Year, Karakib! And best wishes for a healthy and successful 2008

12:01 ص  
Blogger karakib said...

اسف جدا لتأخيري في الرد علي الكل لظروف .. فعلا مشغول في الامتحانات و بالقوة باقدر اقرا كام مدونة كل يوم

6:43 م  
Blogger karakib said...

يا مراكبي

بيتهيألي زي ما بتقول يا بشمهندس .. اكيد زيه زي اللي قبله
بس الاحساس بالزمن لما بيطول بيبقي في حاجة غلط
الحمدلله علي كل حال



ست المرتفعات

انت بقي اصلا ليكي معزة خاصة عندي مع انك علي عكس ناس كتير من المدونين لا شفتك و لا اعرف حد يعرفك
بس تعليقاتك منعشه
فعلا منعشة
شكرا يا اجمل ست مرتفعات في الدنيا

6:45 م  
Blogger karakib said...

The Alien
بيشوي جاري العزيز
لأ لأ مش هاتشوفها
ما هي ما بتعديش من عندنا
و انت طيب يا عم بيشوي


شــــمـس الديـن

و انت طيبة يا شمس و بخير و مصر كلها بخير يا رب
ايه مش هاشوفك انت و ايمان و لا ايه ؟ لازم يعني حد غيرنا يوضب لها علشان نتقابل
النهاية بتاعة ناس بتقول عليها حرام تعليقا علي شوية احداث شفتها من ايميلات و نوتس علي الفيس بووك

6:48 م  
Blogger karakib said...

توتة توتة

هو محمد منير غنا حاجة وحشة !
تعرفي انا لو وزير ثقافة
اطلب من الراجل ده يعمل شريطين في السنة
و اطلب من كل الشعرا يكتبوا كلام شبه اللي بيغنيه
و فوق كل ده هاحط له تمثال فوق محطة القطر في رمسيس
تمثال وسط تماثيل لناس تانيه كتير عايشة وسطنا و محدش مديها اهميه


sofinqoraso

بما انك ما شفتيش اسمي .. هاني جورج .. و ما شفتيش البروفايل و انه بيقول انه ذكر
و بما انك حتي ما قريتيش التدوينه اساسا و عرفتي منها اني رجل
ذكر يعني
اقدر اقول لك انا مش واحدة
انا واحد


واحد لمون :) هههههه

6:52 م  
Blogger karakib said...

بنت القمر

و انت طيبة يا جميلة
بلاش انجي علي .. شفتها من شهرين في سينما نايل سيتي واقفة مع واحد مدير تصوير مشهور مش فاكر اسمه
مش ممكن خالص خالص
خالص
خالص
بتفكرني بتدوينة زبيدة (الحرملك) القرشانة لازم تنزل


بنت القمر
تاني :) يا رب يكون سعيد علي مصر كلها

6:55 م  
Blogger karakib said...

Basma
لا انا مش زعلان :) خالص
بعدين ده مش الطبيعي بتاعي اني اتنرفز للدرجة دي
اول مرة تحصل اني اتعفرت بالشكل ده لأنه شيء من الاشياء التي تصبرين عليها يمكن تنتهي
و ما بتنتهيش و صاحب الفعل شخص لا يقدر انه شيء مقلق
و طبعا كان من الافضل اني اعبر عن غضبي بالشكل ده بدل ما ادور علي حد اخبط ايدي فيه :) ههههه
و بعدين عروسة مرة واحدة !! طيب خدي عندك بقي
قولي لها اني احول.. و باتفتف و انا باتكلم ... و قفايا طويل اوي
و لوني بيقلب اخضر لما باتضايق
لو موافقه علي كده يبقي ماشي
عروسة ايه يا بسمة اللي بترتبي لها مع فارس
انا اخري عروسة حلاوة
اكتر من كده مش هينفع ههههههههههه



HafSSa

اوعي تبكي تاني يا حفصة ... اصل مافيش حاجه تستاهل ... اصحابي راحوا حفلة منير
لكن انا ما كانش ليبا مزاج
عملت حفلتي الخاصة لوحدي و سهرت معاه اغني
العصفور بيطير ... يبقي مش حزين لكنه اكتشف انه السعاده و الحزن ممكن تكون زي اي شيء اخر .. قابلين للنسبيه
--
عارف انه شكلي ما يقولش اني ممكن اتنرفز خالص :) المشكلة بقي انه شكلي بيخلي الناس تتمادي في انها تنرفزني
مشكلةن يا حفصة !! مشكلة :) بعدين مش كنتي تقولي انك رايحه الحفله !؟ كنت جيت عالاقل علشان اشوفك يعني

7:03 م  
Blogger karakib said...

يَحيى المِصري


و انت طيب يا صديقي المثقف الجميل
و مصر كلها بخير و طيبه يا رب طول ما فيها ناس زيك


VioLotus

طبعا فاكرك .. و فاكر الفضاء بتاعك و احلامك :) فاكره لدرجة انه الجاذبية علي كوكبك كانت لذيذة :) و انت طيبة يا جميلة
صدقيني انا شخصيا مش فاهم لحد دلوقتي كان عايز يجبسها ليه !؟؟ تقريبا فعلا هوايه !

7:06 م  
Blogger karakib said...

film69
و انت طيب يا مخرجنا الجميل
مش هاشوف الفيلم بقي ؟؟ امتي العرض ؟؟ اوعي ما تعزمنيش هازعل بجد


No Fear
مصطفي الحسيني شخص فعلا محترم

david santos
thx and i wish you the same

7:08 م  
Blogger شـــــهــــروزة said...

يبدو انك من نفس فصيلة البشر اللى كل تضيق الدنيا بيهم او يلاقوا الدنيا كحلى او مزغللة ادامهم
يجروا على منير
يسمعوا نفسهم فيه


أنا كمان زيك بالضبط

..........

واحتراماتى العميقة لتوصيفك لجورج وصوف
مكنتش عارفة الاقى له وصف الحقيقة
مجرد سماع صوته بيحسسنى ان فيه حد طابق على رقبته وبيخليه يغنى بالعافية وهو مطبوق عليه
علشان يخرج بالشكل الغريب دة

.............

نظرتك للستريس
ماليكش عليا حلفان
نفس النظرة والاحساس المشمأنط تجاهها
تقولش ضرتى؟
كانت أزمتى الوحيدة فى ثانوية عامة وفى الكلية فيما بعد

........

اما عن جزيزرة القطن
وانت بتوصفها هى والمرتبة حسستنى انى عاوزة أنام تانى مع انى لسة صاحية دلوقتى

أمنياتى الصادقة انك تلاقى ونيس تحط راسك على كتفه فى الأيام الجاية

كل سنة وانت طيب
ولو انها متأخرة تلات شويات

12:21 م  
Blogger DantY ElMasrY said...

هانى.. ياريت تكمل حكاية العصفور والبنى إدم هاتوصلك لحالة فانتازيا جامدة ...اتفرجت على فلم _من شابه أباه
like father like son
عقدة الفلم جت من فكرة زى فكرتك بين أب وابنه بدل عصفور وبنى إدم

5:23 م  
Blogger خمسة فضفضة said...

باجي هنا بنتظام وتقريبا قريت كل التدوينات ،بس دي اول مره اعلق هنا

بجد انت فنان ، الله عليك كل مره بقرأ تحفه جديده
المره دي ماقدرتش امنع نفسي من التعبير عن انشكاحي الشديد جدا جدا بالتدوينه الروعه دي

كل سنةوانت طيب

12:33 م  
Blogger TAM said...

الناس الللى بتقرا لمكسوفة هل ممكن تصوتو ان كنتو موافقينها على الاعدام ولا لا ؟

2:26 ص  
Blogger Sherif said...

أول مرة ادخل مدونتك ..

وآسف للتأخير .. لكننى لم اكن اعلم عنها ..

كما لم اتخيل انها بمثل هذا الرقى الادبى ..

احلى ما فيها قدرتك الفذة على تصوير السيناريو وكاننا معك بالضبط

تحياتى

10:46 ص  
Blogger Nsreen Bsunee said...

عزيزى هانى

بجد ندمانه اوى انى معرفتش المدونه دى من زمان

بجد جميله

5:22 م  
Blogger karakib said...

شـــــهــــروزة
كلنا من هذه الفصيلة يا شهروزة :)
و معايدتك مش متأخرة و لا حاجة لأنه انا عارف انه دايما اللي في القب في القلب :) اما عن عن جورج وسوف و الاستريس
فلا تعليق خالص



DantY ElMasrY

العصفورة تشكل جزء كبير من كل ما اكتب لدرجة خلتني احس اني محتاج اعمل مدونة عصافير كاملة
علي فكرة انا من مربي العصافير .. و باحبهم جدا
بالذات الاسترالي الملون
لذا يزورونني في احلامي كثيرا

ما شفتش الفيلم اللي بتقول عليه لكن هادور عليه و انزله
شكله حلو

6:18 م  
Blogger karakib said...

خمسة فضفضة

و انت طيبة يا دكتورة ... يا رب دايما اكون عند حسن ظنك
و شكرا لتعليقك و فيتامين الكلام الحلو اللي قولتيه عني ده
جزيل الشكر

TAM
لأ طبعا !! انا ضد الحكم ده
الموضوع مسألة وقت و مكسوفة هاترجع
مجرد احباط كلنا بنمر به من وقت للتاني
انها أفة الاحساس يا صديقي
الاحساس احيانا بيكون نقمة

6:21 م  
Blogger karakib said...

Sherif
فعلا اول مرة تشرفني بالتعليق و اتمني ما تكونش الاخيرة
و بعدين الكلام الكبير اوي اللي قلته عني ده يخليني مبسوط اوي كده و منفوخ زي الديك الرومي :) ربنا يخليك يا شريف
و اتمني دوام الزيارة


Nsreen Bsunee

هي مش جميلة و لا حاجة
الجميل هو اللي بيشوف كل شيء جميل
و لا داعي للندم ابدا يا عزيزتي لأنه المدونه هي اللي نورت بزيارتك
شرفتيني في مكاني المتواضع ده :)
و متشكر اوي علي الكلام الحلو ده

6:24 م  
Blogger Ellithy said...

انت مدعو للكتابة في مدونة كل العرب
مشروع الجريدة العربية الموحدة
تكمن فكرة هذه المدونة لجمع اكبر قدر من المدونين العرب واقدرهم وافصلهم لكي يكتبو في مكان واحد
ذلك للحصول في النهاية على مدونة اشبه بالجريدة العربية تناقش القضا ياالعربية وخلافات العرب حيث ان كل الطوائف والبلاد مدعوة للكتابة
وقد تكون نقطة انطلاق للتفاهم والنقاش حول القضايا العربية المختلفة وتقابل وجهات النظر

للمشاركة ارسل ايميلك (بريدك الالكتروني) في تعليق على هذا المقال وسوف تتلقى دعوة للكتابة في هذه المدونة

مزايا الكتابة هنا :
للكاتب :
1- عدد اكبر من القراء
2- تحسين نتايج البخث لعناوين المقالات
3- انت كاتب وفي نفس الوقت قارئ تقرأ ما يكتبه كبار المدونين العرب
4- شهرة اكبر ودائما اقول ان في الاتحاد قوة وهذا هو اتحاد المدونين العرب

للقارئ :
1- القراء للمدونين الكبار تحت صفحة واحدة
2- تجميع المدونات وجعلها مث ل جريدة الكترونية
3- سهولة الوصول للمقالات المرادة

شروط الكتابة (لن يتم التعديل لو مسح اي مقال ):
1- عدم الاساءة للاديان السماوية
2- عدم نشر مقال من اجل ربح المال او التنفع المادي ولكن الشروحات مقبولة ومرحب بها
3- عدم كتابة كلام خارج او الفاظ اباحية
4- الكتابة باللغة العربية

الفكرة تتلخص في ان كل مدون له حق الكتابة فقط بارسال ايميله في تعليق على هذه المدونة
اذا كانت لك مدونتك الخاصة فلا مانع من نسخ مقالاتك الهامة والتي تراها ترقى كي تكون في الجريدة العربية الالكترونية او مدونة كل العرب

وانا شخصيا ساكتب في مواضيع مختلفة وساهتم بتحقيق افضل نتائج للبحث والحصول على اكبر قدر من الزوار حتى تصل مقالاتك لاكبر عدد من القراء
كما ان تجمع المدونين سيجيئ بقراء اكثر وهكذا

اذا كنت مدونا كبيرا فانت مدعو بشدة وان كنت صغيرا فابدا معنا

فهيا ننطلق لوحدة المدونين العرب

برجاء ارسل لنا بريدك الالكتروني كي تستطيع الكتابة في هذه المدونة
ادعو الله ان تكون هذه المدونة ملفتة لنظر القراء ومحط انظار الراي العام العربي


والله ولي التوفيق

8:22 ص  
Anonymous غير معرف said...

A片,A片,成人網站,成人影片,色情,情色網,情色,AV,AV女優,成人影城,成人,色情A片,日本AV,免費成人影片,成人影片,SEX,免費A片,A片下載,免費A片下載,做愛,情色A片,色情影片,H漫,A漫,18成人

a片,色情影片,情色電影,a片,色情,情色網,情色,av,av女優,成人影城,成人,色情a片,日本av,免費成人影片,成人影片,情色a片,sex,免費a片,a片下載,免費a片下載,成人網站,做愛,自拍

情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品

A片,A片,A片下載,做愛,成人電影,.18成人,日本A片,情色小說,情色電影,成人影城,自拍,情色論壇,成人論壇,情色貼圖,情色,免費A片,成人,成人網站,成人圖片,AV女優,成人光碟,色情,色情影片,免費A片下載,SEX,AV,色情網站,本土自拍,性愛,成人影片,情色文學,成人文章,成人圖片區,成人貼圖

情色,AV女優,UT聊天室,聊天室,A片,視訊聊天室

一夜情聊天室,一夜情,情色聊天室,情色,美女交友,交友,AIO交友愛情館,AIO,成人交友,愛情公寓,做愛影片,做愛,性愛,微風成人區,微風成人,嘟嘟成人網,成人影片,成人,成人貼圖,18成人,成人圖片區,成人圖片,成人影城,成人小說,成人文章,成人網站,成人論壇,情色貼圖,色情貼圖,色情A片,A片,色情小說,情色小說,情色文學,寄情築園小遊戲, 情色A片,色情影片,AV女優,AV,A漫,免費A片,A片下載

11:56 ص  

إرسال تعليق

Links to this post:

إنشاء رابط

<< Home